Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

2 Beresosɛm 16:1-14

16  Asa ahenni afe a ɛto so aduasa asia mu no, Israel hene Baasa+ baa Yuda so, na ofii ase sɛ ɔrekyekye Rama+ sɛnea ɛbɛyɛ a obiara remfi adi nkɔ Yuda hene Asa nkyɛn na obiara remfi ne nkyɛn mma.+  Ɛnna Asa yii dwetɛ ne sika fii Yehowa fie+ ne ahemfie+ akorade mu de kɔmaa Siria+ hene Ben-Hadad+ a ɔte Damasko+ no, na ɔka kyerɛɛ no sɛ:  “Apam da me ne wo ntam, ne me papa ne wo papa ntam. Merebrɛ wo dwetɛ ne sika. Kɔ, na kotwa apam a wo ne Israel hene Baasa+ ayɛ no mu na omfi me so nkɔ.”+  Ɛnna Ben-Hadad tiee Ɔhene Asa, na ɔsomaa n’asahene kɔɔ Israel nkurow so, na wɔkɔyɛɛ Eyon+ ne Dan+ ne Abel-Maim+ pasaa, ɛne Naftali+ nkurow mu akorae+ nyinaa.  Na Baasa tee no, ntɛm ara na ogyaee Rama kyekye, na otwaa adwuma a ɔreyɛ no so.+  Ɛnna Ɔhene Asa de Yuda+ nyinaa kɔe, na wɔkɔsesaw abo ne nnua a na Baasa de rekyekye+ Rama+ no, na ɔde kɔkyekyee Geba+ ne Mispa.+  Saa bere no, ɔdehwɛfo Hanani+ baa Yuda hene Asa nkyɛn bɛka kyerɛɛ no sɛ: “Sɛ́ wode wo ho ato Siria hene so+ na woamfa wo ho anto Yehowa, wo Nyankopɔn so+ nti, Siria hene asraafodɔm no afi wo nsa.  Etiopiafo+ ne Libiafo+ no, na wɔnyɛ asraafo bebree a wɔwɔ nteaseɛnam ne apɔnkɔsotefo pii anaa?+ Na bere a wode wo ho too Yehowa so no, wamfa wɔn anhyɛ wo nsa?+  Yehowa de, n’aniwa+ kyini asase so baabiara+ sɛ ɔde n’ahoɔden bedi ama wɔn a wɔn koma+ di mũ wɔ ne ho. Asɛm yi mu de, woadi nkwaseasɛm,+ na efi nnɛ rekɔ, akodi bɛba wo so.”+ 10  Nanso Asa bo fuw ɔdehwɛfo no, na ɔde no bɔɔ dua mu wɔ nneduafie,+ efisɛ asɛm yi maa n’ani beree.+ Saa bere no, Asa hyɛɛ ɔmanfo no binom nso so.+ 11  Asa ho nsɛm nyinaa, ne mfiase kosi n’awiei, hwɛ, wɔakyerɛw wɔ Yuda ne Israel Ahene Nhoma+ no mu. 12  Na Asa ahenni afe a ɛto so aduasa akron mu no, ɔyaree ne nan, na ne yare no mu yɛɛ den yiye;+ ne yare mu mpo, wanhwehwɛ Yehowa akyi kwan+ na mmom okodii ayaresafo akyi.+ 13  Na Asa ne n’agyanom kɔdae;+ owui n’ahenni afe a ɛto so aduanan biako mu. 14  Enti wosiee no wɔ ne da+ a otui wɔ Dawid Kurow+ mu no mu; wɔdedaa no wɔ mpa a balsam ngo+ ne sradehuam+ ahorow a wɔahyɛ da afra,+ ayɛ so ma so. Na wɔhyew ɔhyew kɛse pa+ maa no wɔ n’ayi ase.

Ase Hɔ Nsɛm