Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

1 Ahene 9:1-28

9  Bere a Solomon wiee Yehowa fie+ ne ahemfie+ no ne biribiara a ɛbaa Solomon komam sɛ ɔbɛyɛ+ no ara pɛ,  Yehowa yii ne ho adi kyerɛɛ Solomon ne mprenu so sɛnea oyii ne ho adi kyerɛɛ no Gibeon no.+  Ɛnna Yehowa ka kyerɛɛ no sɛ: “Mate wo mpaebɔ+ ne wo nkotɔsrɛ a wode baa m’anim bɛsrɛɛ me no. Mayɛ ofie a woasi yi kronkron+ de me din ato so+ kosi daa; m’aniwa+ ne me koma bɛtena hɔ daa.+  Na wo, sɛ wode koma a edi mũ+ ne teeyɛ+ nantew+ m’anim sɛnea wo papa Dawid+ nantew m’anim no, na woyɛ nea mahyɛ wo+ nyinaa, na wudi m’ahyɛde+ ne m’atemmusɛm+ so a,  me nso mɛma w’ahengua atim Israel so daa, sɛnea mehyɛɛ wo papa Dawid bɔ no, sɛ, ‘Obusuani a ɔbɛtena Israel ahengua so remmɔ wo.’+  Na sɛ mo ne mo mma dan mo ho fi m’akyi,+ na moanni me mmara nsɛm ne m’ahyɛde a mede asi mo anim no so, na mokɔ kɔsom anyame foforo+ na mokotow wɔn a,  ɛnde me nso metwa Israel afi asase a mede ama wɔn no so,+ na ofie a mayɛ no kronkron ama me din yi, mɛtow afi m’anim akyene,+ na wɔde Israel aka asɛm aserew+ adi ho fɛw aman nyinaa mu.  Na ofie yi bɛdan amamfõ,+ na obiara a otwam no de ahodwiriw+ bɛhwɛ na wabɔ hwirema aka sɛ, ‘Ɛyɛɛ dɛn na Yehowa yɛɛ asase ne ofie yi sɛɛ?’+  Na wɔbɛka sɛ, ‘Wɔagyaw Yehowa, wɔn Nyankopɔn a oyii wɔn agyanom fii Egypt asase so+ no ntia; wɔagyaw no hɔ akodi anyame foforo+ akyi na wɔakotow asɔre wɔn. Ɛno nti na Yehowa de amanehunu yi nyinaa aba wɔn so no.’”+ 10  Solomon de mfe aduonu na esii afie abien no, Yehowa fie+ ne ahemfie+ no, 11  (ná Tiro hene Hiram+ de kyeneduru ne ɔpopaw nnua ne sika dodow biara a Solomon pɛ+ aboa no,)+ na ɛno akyi no, Ɔhene Solomon de nkurow aduonu a ɛwɔ Galilea asase so+ maa Hiram. 12  Ɛnna Hiram fi Tiro kɔhwɛɛ nkurow a Solomon de maa no no, nanso n’ani annye ho+ koraa. 13  Enti obisaa no sɛ: “Me nua, nkurow bɛn na wode ama me yi?” Na wɔbɛfrɛɛ no Kabul Asase de besi nnɛ. 14  Hiram soma ma wɔde sika dwetikɛse ɔha aduonu kɔmaa ɔhene.+ 15  Apaafo+ a Ɔhene Solomon ma wosii Yehowa fie+ ne n’ankasa fie ne Milo*+ ne Yerusalem fasu+ ne Hasor+ ne Megido+ ne Geser+ no ho nsɛm ni. 16  (Ná Egypt hene Farao akɔ Geser so akɔko agye de ogya ahyew, na Kanaanfo+ a wɔtete kurow no mu nso, wakunkum wɔn. Enti ɔde maa ne babea,+ Solomon yere no, de gyaa no kwan.) 17  Na Solomon san kyekyee Geser ne Anafo Bet-Horon,+ 18  ne Baalat+ ne Tamar a ɛwɔ sare so, asase no so, 19  ne adekora+ nkurow a abedi Solomon nsam, ne nteaseɛnam nkurow+ no ne apɔnkɔsotefo nkurow, ne biribiara a Solomon ani gyee ho+ a ɔpɛe sɛ ɔyɛ wɔ Yerusalem ne Lebanon ne nsase a odi so no nyinaa so. 20  Nkurɔfo a wɔkae a wofi Amorifo,+ Hitifo,+ Perisifo,+ Hiwifo+ ne Yebusifo+ mu a wɔnka Israelfo ho+ nyinaa no, 21  wɔn mma a wɔkaa asase no so a Israelfo antumi ansɛe wɔn+ no, Solomon hyɛɛ wɔn ma wɔyɛɛ nkoadwuma de besi nnɛ.+ 22  Israelfo de, Solomon amfa obiara anyɛ akoa;+ mmom na wɔyɛ akofo ne n’asomfo ne ne mmapɔmma ne n’akunini ne wɔn a wɔhwɛ ne nteaseɛnam ne n’apɔnkɔsotefo+ so. 23  Akunini so mpanyimfo a wɔhwɛɛ Solomon adwuma so no yɛ ahanum aduonum; wɔn na wɔhwɛɛ adwumayɛfo a wokura adwuma no mu so.+ 24  Farao babea+ no de, ofii Dawid Kurow+ mu kɔɔ ofie a wasi ama no no mu. Saa bere no na ɔhene kyekyee Milo.+ 25  Na Solomon bɔɔ afɔre mprɛnsa+ afe biara wɔ afɔremuka a osi maa Yehowa no so,+ ɔhyew afɔre ne asomdwoe afɔre. Na ɔhyew aduhuam wɔ afɔremuka+ a ɛwɔ Yehowa anim no so; owiee ofie no.+ 26  Ɔhene Solomon yeyɛɛ ahyɛn pii wɔ Esion-Geber+ a ɛbɛn Elot+ a ɛwɔ Po Kɔkɔɔ no ano wɔ Edom asase so no.+ 27  Ná Hiram taa soma ne nkoa,+ hyɛnmufo a wonim po so adwumayɛ, ma wɔkɔka Solomon nkoa ho, ma wɔde ahyɛn kɔ kwan so. 28  Na wɔkɔɔ Ofir,+ na wonyaa sika+ dwetikɛse ahanan aduonu de brɛɛ Ɔhene Solomon.

Ase Hɔ Nsɛm

Hwɛ 1Sa 5:9 ase hɔ asɛm.