Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

1 Ahene 5:1-18

5  Tiro+ hene Hiram+ tee sɛ Solomon na wɔasra no asi no hene, ne papa ananmu, enti ɔsomaa ne nkoa+ kɔɔ ne nkyɛn efisɛ Hiram dɔɔ Dawid daa.+  Solomon nso soma kɔɔ Hiram nkyɛn kɔka kyerɛɛ no sɛ:+  “W’ankasa wunim sɛ ɔko a atamfo de twaa me papa Dawid ho hyiae nti, wantumi ansi ofie amma Yehowa, ne Nyankopɔn din,+ kosii sɛ Yehowa de wɔn guu ne nan ase.  Seesei Yehowa me Nyankopɔn ama me ɔhome afã nyinaa ahyia.+ Ɔtamfo biara nni hɔ, na bɔne biara nso nni hɔ.+  Mepɛ sɛ misi ofie ma Yehowa me Nyankopɔn din+ sɛnea Yehowa hyɛɛ me papa Dawid bɔ yi sɛ, ‘Wo ba a mede no bɛtena w’ahengua so asi w’ananmu no, ɔno na obesi ofie ama me din.’+  Enti afei hyɛ ma wontwa nkyeneduru wɔ Lebanon+ mma me; me nkoa bɛba abɛka wo nkoa ho, na wo nkoa akatua nyinaa, mede bɛma wo sɛnea wobɛkyerɛ biara, efisɛ wunim sɛ yenni obiara wɔ yɛn mu a onim nnuatwa te sɛ Sidonfo.”+  Bere a Hiram+ tee Solomon nsɛm no ara pɛ, odii ahurusi kɛse, na ɔkae sɛ: “Nhyira+ nka Yehowa nnɛ sɛ wama Dawid ɔba nyansafo+ a ɔredi ɔman kɛse yi so!”+  Ɛnna Hiram soma kɔka kyerɛɛ Solomon sɛ: “Nea wobɛka kyerɛɛ me no, mate, na kyeneduru ne ɔpopaw+ nnua ho asɛm no nso, mɛyɛ w’apɛde ama wo.  Me nkoa na wɔde befi Lebanon+ aba mpoano, na me nso makyekyere agu po so de akɔ baabi a wobɛkyerɛ sɛ memfa nkɔ;+ ɛhɔ na mɛma wɔasansan na woabɛfa. Wo nso yɛ m’apɛde ma me na ma me fiefo aduan.”+ 10  Enti Hiram maa Solomon kyeneduru ne ɔpopaw nnua dodow biara a ɔpɛ. 11  Solomon nso maa Hiram awi kor+ mpem aduonu ne ngo pa*+ kor aduonu sɛ ɔmfa nhwɛ ne fiefo. Saa na Solomon de maa Hiram afe biara.+ 12  Na Yehowa de, ɔmaa Solomon nyansa sɛnea ɔhyɛɛ no bɔ no,+ na asomdwoe tenaa Hiram ne Solomon ntam, na wɔn baanu yɛɛ apam. 13  Ná Ɔhene Solomon de apaafo fi Israel nyinaa kɔ; apaafo+ no dodow yɛ mmarima mpem aduasa. 14  Ɔsram biara ɔde wɔn mu mpem du kɔ Lebanon. Sɛ wokodi ɔsram biako wɔ Lebanon a, na wɔabedi asram abien wɔ wɔn afie;+ Adoniram+ na na ɔda apaafo+ no ano. 15  Solomon nyaa+ nnipa mpem aduɔson a wɔsoasoa nneɛma,+ ne nnipa mpem aduɔwɔtwe a wɔpae abo+ wɔ mmepɔw so,+ 16  ɛsono Solomon akunini+ a wɔhwɛ adwuma no so no; wɔn nso yɛ mpanyimfo mpem abiɛsa ahasa a wɔhwɛ adwumayɛfo so.+ 17  Ɛnna ɔhene hyɛe sɛ wɔmpae abo akɛse a ne bo yɛ den,+ na wɔmfa abo a wɔapae+ no nto ofie no fapem.+ 18  Enti Solomon adansifo ne Hiram adansifo ne Gebalfo+ paee abo no, na wosiesiee nnua ne abo a wɔde besi ofie no.

Ase Hɔ Nsɛm

Ɛyɛ ngo pa a ne bo yɛ den a wɔde ngodua aba a wosiw wɔ ɔwaduru mu na ɛyɛ; ɛtɔ da bi a wɔde wɔn nan na etiatia aba no so.