Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

1 Ahene 3:1-28

3  Na Solomon ne Egypt hene Farao dii ayeware,+ na ɔkɔwaree Farao babea+ de no baa Dawid Kurow+ mu kosii sɛ owiee ɔno ara ne fie+ ne Yehowa fie+ ne Yerusalem ho fasu+ no nyinaa.  Sorɔnsorɔmmea ara na ɔman no bɔɔ afɔre,+ efisɛ ebesi saa bere no, na wonsii ofie mmaa Yehowa din.+  Na Solomon kɔɔ so dɔɔ+ Yehowa, na ɔnantew ne papa Dawid ahyɛde mu.+ Sorɔnsorɔmmea+ ara na ɔbɔɔ afɔre ne ɔhyew afɔre daa.  Ɛnna ɔhene kɔɔ Gibeon+ kɔbɔɔ afɔre wɔ hɔ efisɛ ɛhɔ ne sorɔnsorɔmmea kɛse no.+ Solomon de mmoa apem na ɛbɔɔ ɔhyew afɔre wɔ afɔremuka no so.+  Yehowa yii ne ho adi kyerɛɛ Solomon dae+ mu anadwo wɔ Gibeon,+ na Onyankopɔn ka kyerɛɛ no sɛ: “Bisa me nea menyɛ mma wo.”+  Ɛnna Solomon kae sɛ: “Wo na woyɛɛ me papa, w’akoa Dawid adɔe kɛse,+ sɛnea ɔde nokwaredi ne trenee+ ne koma a edi mũ nantew w’anim no, na wodaa adɔe kɛse yi adi kyerɛɛ no daa; woama wanya ɔba ma wabɛtena n’ahengua so ɛnnɛ da yi.+  Na afei Yehowa me Nyankopɔn, wo na woasi w’akoa hene de no asi me papa Dawid ananmu, nanso me de, meyɛ abofra koraa.+ Minnim sɛnea mefi adi na maba mu.+  Na w’akoa wɔ wo man a woapaw+ wɔn no mu, ɔman a wɔdɔɔso na wɔn dodow nti, wontumi nkan wɔn na wontumi mmu wɔn ano.+  Na ma w’akoa ahobrɛase koma a ɔde bebu wo man atɛn,+ de ahu papa ne bɔne mu;+ hena na obetumi abu wo man a wɔn so di yɛ den+ yi atɛn?”+ 10  Na asɛm no sɔɔ Yehowa ani sɛ Solomon abisa eyi.+ 11  Na Onyankopɔn ka kyerɛɛ no sɛ: “Sɛ́ woabisa eyi, na woammisa nna dodow ne ahonyade+ amfa, anaa w’atamfo kra, na woabisa nhumu a wode bebu atɛn+ nti, 12  hwɛ! mɛyɛ nea woaka no.+ Hwɛ! mɛma wo nyansa ne ntease koma+ a obiara a odii w’anim annya bi da, na w’akyi nso, obiara rensɔre a ɔbɛyɛ sɛ wo.+ 13  Na nea woammisa, ahonyade+ ne anuonyam nso, mede bɛma wo;+ mɛma wo nea ɔhene biara a odii w’anim bae nnyaa bi da, wo nna nyinaa.+ 14  Na sɛ wonantew m’akwan so di m’ahyɛde+ ne me mmara nsɛm so sɛnea wo papa Dawid nantewee+ no a, me nso mɛma wo nna aware.”+ 15  Bere a Solomon ani so tetew+ no no, ohui sɛ ɛyɛ ɔdae. Ɛnna ɔbaa Yerusalem begyinaa Yehowa apam adaka+ no anim, na ɔbɔɔ ɔhyew afɔre ne asomdwoe afɔre,+ na ɔtow pon+ maa ne nkoa nyinaa.+ 16  Akyiri yi, mmea nguaman+ baanu bi baa ɔhene nkyɛn begyinaa n’anim.+ 17  Na ɔbea biako kae sɛ: “Me wura, mepa wo kyɛw,+ me ne ɔbea yi te ofie biako mu, na mewoe ne nkyɛn wɔ fie hɔ. 18  Mewoe akyi nnansa, ɔbea yi nso woe. Yɛn nyinaa wɔ faako, na ɔhɔho biara nka yɛn ho wɔ ofie hɔ. Yɛn baanu pɛ na yɛwɔ ofie hɔ. 19  Akyiri yi, ɔbea yi daa ne ba so anadwo ma owui. 20  Bere a w’afenaa ada a me ba no da me nkyɛn no, ɔsɔree anadwo dasum bɛfaa me ba no me nkyɛn de no kɔtoo ne nkyɛn, na ɔde ne ba a wawu no bɛtoo me nkyɛn. 21  Mesɔree anɔpa sɛ merema me ba no nufu,+ mehwɛe no, na wawu. Bere a mehwɛɛ no yiye anɔpa no, mihui sɛ ɔnyɛ me ba a mewoe no.” 22  Ɛnna ɔbea biako no kae sɛ: “Woboa, me ba na ɔte ase no, wo ba ne nea wawu no!” Saa bere no nyinaa nea na ɔbea biako no ka ara ne sɛ: “Woboa, wo ba ne nea wawu no, me ba na ɔte ase no.” Na wɔkasakasae wɔ ɔhene anim.+ 23  Ɛnna ɔhene kae sɛ: “Oyi se, ‘Me ba na ɔte ase yi, wo ba ne nea wawu no!’ na oyi nso se, ‘Woboa, wo ba ne nea wawu no, me ba na ɔte ase no!’” 24  Afei ɔhene kae sɛ:+ “Momfa nkrante mmrɛ me.” Ɛnna wɔde nkrante baa ɔhene anim. 25  Na ɔhene kae sɛ: “Mompae abofra a ɔte ase no mu abien, na momfa ɔfã mma mmea no biako, na momfa ɔfã a aka nso mma ɔfoforo no.” 26  Esiane sɛ ɔbea a ne ba ne abofra a ɔte ase no yam hyehyee no+ ne ba no ho+ nti, ɛhɔ ara na ɔka kyerɛɛ ɔhene sɛ: “Me wura, mepa wo kyɛw!+ Momfa abofra a ɔte ase no mma no. Munnkum no.” Ɔbea biako no de, saa bere no nyinaa nea na ɔreka ara ne sɛ: “Ɛbɛbɔ me ne wo nyinaa. Mompae ne mu!”+ 27  Ɛnna ɔhene kae sɛ: “Momfa abofra a ɔte ase no mma no. Munnkum no. Ne maame ne no.” 28  Israel nyinaa tee atɛn a ɔhene abu+ no, na wosuroo ɔhene+ efisɛ wohui sɛ Onyankopɔn nyansa+ wɔ ne mu a ɔde bu atɛn.

Ase Hɔ Nsɛm