Kɔ emu nsɛm afã hɔ

Kɔ nsɛm a ɛdi hɔ a ɛde wo bɛkɔ mmeaemmeae

Kɔ emu nsɛm afã hɔ

Yehowa Adansefo

Twi

Intanɛt So Bible | KYERƐW KRONKRON—WIASE FOFORO NKYERƐASE

Ɔsɛnkafo 3:1-22

3  Biribiara wɔ ne bere a wɔahyɛ+ ato hɔ, na ade biara wɔ ne bere ɔsoro ase:  awo wɔ ne bere,+ na owu nso wɔ ne bere;+ ogu wɔ ne bere, na nea wɔagu no tutu nso wɔ ne bere;+  okum wɔ ne bere,+ na ayaresa nso wɔ ne bere;+ bere a wɔde bubu wɔ hɔ, na bere a wɔde si nso wɔ hɔ;+  osũ wɔ ne bere,+ na ɔserew nso wɔ ne bere;+ benabɔ wɔ ne bere,+ na ahuruhuruw nso wɔ ne bere;+  bere a wɔtow abo gu wɔ hɔ,+ na bere a wɔboaboa abo ano nso wɔ hɔ;+ atuuyɛ wɔ ne bere,+ na atuuyɛ kwati nso wɔ ne bere;+  adehwehwɛ wɔ ne bere,+ na adehwere nso wɔ ne bere; bere a wɔde kora ade so wɔ hɔ, na bere a wɔtow ade kyene nso wɔ hɔ;+  ade mu sunsuan wɔ ne bere,+ na adepam nso wɔ ne bere;+ kommyɛ wɔ ne bere,+ na ɔkasa nso wɔ ne bere;+  ɔdɔ wɔ ne bere, na ɔtan nso wɔ ne bere;+ ɔko wɔ ne bere,+ na asomdwoe nso wɔ ne bere.+  Sɛ obi brɛ ne ho yɛ adwuma a, mfaso bɛn na onya?+ 10  Mahu adwuma a Onyankopɔn de ama adesamma sɛ wɔnyɛ no.+ 11  Wayɛ ade nyinaa fɛfɛɛfɛ wɔ ne bere mu.+ Ɔde bere a enni awiei ahyɛ wɔn komam,+ sɛnea ɛbɛyɛ a adesamma renhu nneɛma a nokware Nyankopɔn ayɛ no mu fi mfiase kosi awiei.+ 12  Mahu sɛ adepa biara nni hɔ mma nnipa sɛ wobegye wɔn ani na wɔayɛ adepa wɔn asetena mu;+ 13  ne sɛ onipa biara bedidi na wanom na wahu adepa, ne brɛ nyinaa mu.+ Onyankopɔn akyɛde ne no.+ 14  Mahu sɛ ade biara a Onyankopɔn yɛ no, ɛno na ɛbɛtena hɔ daa.+ Wɔrentumi mfa biribiara nka ho, na wɔrentumi nyi biribiara mfi mu;+ nokware Nyankopɔn no na wayɛ+ na ama nnipa asuro no.+ 15  Nea aba biara no, ɛwɔ hɔ dedaw, na nea ɛbɛba biara nso aba dedaw;+ nokware Nyankopɔn+ no hwehwɛ nea wɔtaa no no yiyedi.+ 16  Na masan ahu owia ase sɛ wodi amumɔyɛsɛm wɔ baabi a wobu atɛn ne baabi a ɛsɛ sɛ wodi asɛntrenee.+ 17  Maka wɔ me komam+ sɛ: “Nokware Nyankopɔn no bebu treneefo ne abɔnefo nyinaa atɛn,+ na ade biara ne adwuma biara wɔ ne bere.”+ 18  Me de, mekaa adesamma ho asɛm me komam sɛ nokware Nyankopɔn bɛsɔ wɔn ahwɛ, na ama wɔahu sɛ wɔn nso wɔyɛ mmoa.+ 19  Adesamma awiei wɔ hɔ, ɛnna mmoa nso awiei wɔ hɔ, na wɔn nyinaa awiei yɛ biako.+ Sɛnea oyi wu te no, saa na oyi nso wu te;+ na wɔn nyinaa wɔ honhom+ biako, ma enti onipa nkyɛn aboa, na ade nyinaa yɛ ahuhude. 20  Wɔn nyinaa kɔ faako.+ Wɔn nyinaa fi dɔte mu,+ na wɔn nyinaa san kɔ dɔte mu.+ 21  Hena na onim sɛ ebia nnipa mma honhom foro kɔ soro, na aboa honhom sian kɔ asase ase?+ 22  Mahu sɛ adepa biara nni hɔ sɛ onipa begye n’ani n’adwuma ho,+ efisɛ ɛno ne ne kyɛfa; anyɛ saa a, hena na ɔde no bɛba abɛhwɛ nea ɛresi wɔ n’akyi?+

Ase Hɔ Nsɛm