Nea Bible ka

Honhom kronkron yɛ Onyankopɔn tumi a ɛreyɛ adwuma. (Mika 3:8; Luka 1:​35) Onyankopɔn soma ne honhom a, nea ɛkyerɛ ne sɛ, ɔma ne tumi kɔ baabi a ɔpɛ ma ɛkɔyɛ n’apɛde.​—Dwom 104:30; 139:7.

Hebri asɛmfua ruʹach ne Hela asɛmfua pneuʹma na wɔtaa kyerɛ ase “honhom” wɔ Bible mu. Mpɛn pii no, wɔde saa nsɛmfua no gyina hɔ ma Onyankopɔn tumi a ɛreyɛ adwuma, anaa honhom kronkron. (Genesis 1:2) Nanso, Bible san de saa nsɛmfua no gyina hɔ ma nneɛma foforo. Ebi ne:

Nea yɛabobɔ din yi nyinaa, wohwɛ a wubehu sɛ yɛmfa yɛn ani nhu, nanso etumi yɛ biribi ma yehu sɛ ɛwɔ hɔ. Saa ara na Onyankopɔn honhom te. Nhoma bi de Onyankopɔn honhom toto mframa ho. Ɛkyerɛ mu sɛ, mframa wɔ hɔ yi, yɛmfa yɛn ani nhu nanso ɛwɔ tumi kɛse, na saa ara na Onyankopɔn honhom te.​—An Expository Dictionary of New Testament Words, W. E. Vine na ɔyɛe.

Bible san frɛ honhom kronkron sɛ Onyankopɔn “nsa” anaa ne “nsateaa.” (Dwom 8:3; 19:1; Luka 11:20; fa toto Mateo 12:28 ho.) Sɛnea odwumfo bi de ne nsa ne ne nsateaa yɛ adwuma no, saa ara na Onyankopɔn de ne honhom ayɛ nneɛma pii. Ebi ne:

Honhom kronkron nyɛ onipa te sɛ Onyankopɔn

Bible frɛ honhom kronkron sɛ Onyankopɔn “nsa,” Onyankopɔn “nsateaa,” anaa Onyankopɔn “ahome.” Enti ɛma yehu sɛ honhom kronkron nyɛ onipa te sɛ Onyankopɔn. (Exodus 15:​8, 10) Odwumfo nsa nko ara rentumi nyɛ hwee gye sɛ adwene ne ne nipadua no kyerɛ no kwan. Saa ara na Onyankopɔn honhom kronkron te; sɛ Onyankopɔn ankyerɛ nea ɛnyɛ a, ɛno ara rentumi nyɛ hwee. (Luka 11:13) Bible san de Onyankopɔn honhom toto nsu ho, na ɛtɔ mmere bi a, etumi de asɛmfua honhom kronkron di dwuma sɛnea ɛde gyidi ne nimdeɛ di dwuma no. Saa ntotoho yi ma yehu sɛ honhom kronkron nyɛ onipa te sɛ Onyankopɔn.​—Yesaia 44:3; Asomafo Nnwuma 6:5; 2 Korintofo 6:6.

Bible ma yehu Yehowa Nyankopɔn ne ne Ba Yesu Kristo din. Nanso, ɛnka da sɛ honhom kronkron wɔ din. (Yesaia 42:8; Luka 1:​31) Kristoni Stefano a ne gyidi nti wokum no no nyaa anisoadehu bi a ɛfa ɔsoro ho. Nnipa mmienu na ohuu wɔn, na ɛnyɛ mmiɛnsa. Bible ka sɛ: “Esiane sɛ honhom kronkron ayɛ no mã nti, ɔhwɛɛ soro dinn huu Onyankopɔn anuonyam ne Yesu sɛ ogyina Onyankopɔn nsa nifa.” (Asomafo Nnwuma 7:​55) Honhom kronkron a ɛyɛɛ Stefano mã no kyerɛ sɛ na Onyankopɔn tumi reyɛ adwuma wɔ ne so, na ɛno na ɛma onyaa anisoadehu no.

Honhom kronkron ho adwene a ɛnyɛ nokware

Atosɛm: “Sunsum Kronkron” anaa honhom kronkron no yɛ onipa, na ɛyɛ Baasakoro no fã sɛnea King James Version Bible no ka wɔ 1 Yohane 5:​7, 8 no.

Nokwasɛm: King James Version Bible no ka nsɛm bi wɔ 1 Yohane 5:​7, 8 sɛ: “Baasa na edi adanse wɔ ɔsoro: Agya no, Asɛm no ne Honhom kronkron no, na baasa yi yɛ biako; na baasa na edi adanse wɔ asase so.” Nanso, nhwehwɛmufo abehu sɛ saa nsɛm no, ɛnyɛ ɔsomafo Yohane na ɔkyerɛwee; enti ɛnka Bible ho. Ɔbenfo Bruce M. Metzger kyerɛwee sɛ: “Biribiara kyerɛ sɛ saa nsɛm no yɛ atoro, na ɛnsɛ sɛ wɔde ka Apam Foforo no ho da biara da.”​—A Textual Commentary on the Greek New Testament.

Atosɛm: Esiane sɛ Bible tumi ka honhom kronkron ho asɛm sɛ gyama ɛyɛ nipa nti, ebinom ka sɛ ɛyɛ nipa te sɛ Onyankopɔn.

Nokwasɛm: Ɛtɔ da a Kyerɛwnsɛm no ka honhom kronkron ho asɛm te sɛ onipa. Nhwɛso bi ni. Yesu kaa honhom kronkron ho asɛm sɛ ɛyɛ “ɔboafo” (ɔwerɛkyekyefo) a obedi adanse, ɔbɛkyerɛ kwan, ɔbɛkasa, ɔbɛpae mu aka asɛm, ɔbɛhyɛ anuonyam, na wagye biribi. Nanso ɛno nkyerɛ sɛ ɛyɛ onipa. Ɛnyɛ honhom kronkron nko ara na Bible ka ho asɛm te sɛ onipa; ɛka nyansa, owu, ne bɔne nso ho asɛm te sɛ nnipa. (Mmebusɛm 1:​20; Romafo 5:​17, 21) Ɛho nhwɛso bi ne sɛ, Bible ka sɛ nyansa wɔ “nnwuma” na ɛwɔ “mma.” Ɛsan ka sɛ bɔne tumi daadaa nnipa, etumi kum nnipa, na etumi ma obi yɛ anibere.​—Mateo 11:19; Luka 7:​35; Romafo 7:​8, 11.

Atosɛm: Esiane sɛ yɛbɔ nkurɔfo asu wɔ honhom kronkron din mu nti, ɛkyerɛ sɛ honhom kronkron yɛ onipa.

Nokwasɛm: Sɛ Bible ka “din” a, ɛtɔ da a, na ɛreka tumi ho asɛm. (Deuteronomium 18:​5, 19-​22; Ester 8:​10) Enti sɛ Bible ka sɛ wɔabɔ obi asu wɔ “honhom kronkron din mu” a, ɛkyerɛ sɛ saa nipa no gye honhom kronkron tumi tom, na ogye tom sɛ Onyankopɔn de honhom kronkron di dwuma ma n’apɛde ba mu.​—Mateo 28:19.

Atosɛm: Ná Yesu asomafo no ne tete asuafo foforo gye di sɛ honhom kronkron yɛ obi.

Nokwasɛm: Bible nka saa asɛm no wɔ baabiara, na wokɔ abakɔsɛm mu nso a, worenhu biribiara saa. Nhoma bi ka sɛ: “Nhyiam bi a wɔyɛe wɔ Constantinople wɔ afe 381 Y.B. no ase . . . na wɔkae sɛ Honhom Kronkron yɛ Onyame bi a ɔwɔ hɔ.” (Encyclopædia Britannica) Wɔyɛɛ saa nhyiam no wɔ ɔsomafo a otwa to no wu akyi bɛboro mfe 250.