Ebia wobɛka sɛ: “Sɛ me ne no da a, sɛ ɛnyɛ hwee? Ade yi, sɛ́ obiara yɛ bi?”

Twɛn na susuw wei ho hwɛ!

Nokwasɛm: Ɛnyɛ obiara na ɔde ne ho hyɛ ɔbarima ne ɔbea nna mu.

Ɛwom, ebia woakenkan nhwehwɛmu a nkurɔfo ayɛ ahu sɛ wɔn a wɔde wɔn ho hyɛ ɔbarima ne ɔbea nna mu no dɔɔso. Yɛmfa Amerika nyɛ nhwɛso. Nhwehwɛmu kyerɛ sɛ, ɛntɔ sɛ ɛhɔ mmofra nwie ntoaso sukuu no, sɛ wuyi wɔn mu mmiɛnsa biara gyina hɔ a, mmienu ne obi ada pɛn. Nanso, nea saa asɛm no san kyerɛ ne sɛ, mmofra mmiɛnsa no mu baako ne obiara nnae da. Wɔn a wɔne obiara nnae da no, sɛ woka wɔn bom a, wɔdɔɔso pa ara.

Wɔn a wɔde wɔn ho ahyɛ ɔbarima ne ɔbea nna mu nso ɛ? Nhwehwɛmufo kyerɛ sɛ mmabun a wɔte saa no mu pii hyia ɔhaw a edidi so yi mu bi:

Ahoyeraw. Mmabun a wɔnwaree nanso wɔne obi ada no pii ka sɛ wɔanu wɔn ho sɛ wɔyɛɛ saa.

Sɛ wonwaree na wo ne obi da a, ɛte sɛ nea wode mfoni fɛfɛ bi ato fam retiatia so

Wonnye wɔn ho nni. Sɛ wɔda wie a, wɔn mu biara adwenem yɛ no nãã bisa ne ho sɛ, ‘Gyama ɛnyɛ me nko ara na ɔne me ada?’

Abasamtu. Nea mmabaa pii pɛ ne obi a ɔbɛhwɛ wɔn yiye, ɛnyɛ obi a ɔde wɔn bɛyɛ nea ɔpɛ, na owie a wayi wɔn baako ahyɛ wɔ nsa. Mmerante dodow no ara nso, sɛ wɔne ababaa bi da wie a, wɔn ani nnye ne ho bio.

Nea yɛreka akosi: Wosom bo pa ara, enti nsɛe wo ho. Onyankopɔn mmara ka sɛ ɔbarima ne ɔbea a wɔaware nkutoo na ɛsɛ sɛ wɔda. Sɛ wutie saa asɛm no a, ɛbɛkyerɛ sɛ wudi wo ho ni. Daakye sɛ woware a, wubetumi ne wo hokafo ada. Saa bere no de, dadwen biara mmɛda wo so, worenka sɛ mihui a anka, na worensuro akyiri asɛm biara. Mmom, w’ani begye pa ara.​—Mmebusɛm 7:22, 23; 1 Korintofo 7:3.