Ansa na wubetumi abua saa asɛm no, ehia sɛ wuhu wo ho yiye. Sɛ nhwɛso no, susuw nea edidi so yi ho hwɛ:

Abusuabɔ

Wo ne w’awofo ne wo nuanom ntam te sɛn? Wo ne wɔn rekasa a, ɛyɛ a wo bo taa fuw? Ɛtɔ da na wobisa wo asɛm a, ɛyɛ a wokekaw mu gu wɔn so, na woka nsɛm a ɛyɛ yaw kyerɛ wɔn anaa? Sɛ yebisa w’abusuafo a, dɛn na wɔbɛka afa wo ho? Sɛnea wo ne w’awofo ne wo nuanom te no, saa ara na woware nso a wo ne wo kunu anaa wo yere bɛtena.​​—Efesofo 4:31.

Wo Suban

Ɛyɛ a w’ani gye wo ho anaa daa na woayɛ mosõõ? Wote asɛm ase, anaa daa nea wopɛ sɛ woyɛ nkutoo na woyɛ? Wutumi gyina nhyɛso ano? Wowɔ abotare? Seesei a wonwaree yi, sɛ wobɔ mmɔden nya su ahorow a ɛne Onyankopɔn honhom aba no a, ɛbɛboa wo ama woayɛ okunu anaa ɔyere pa daakye.​​—Galatifo 5:22, 23.

Sikasɛm

Woyɛ obi a wutumi hwɛ sika so yiye? Wotaa firifiri ade? Sɛ wunya adwuma a, wutumi hwɛ so yɛ? Sɛ wuntumi a, adɛn ntia? Ɛyɛ adwuma no anaasɛ efi adwumawura no? Wohwɛ a, ɛyɛ wo suban bi na ehia sɛ woyɛ ho adwuma anaa? Sɛ wuntumi ntoto wo nko ara wo sikasɛm a, wobɛyɛ dɛn atoto abusua mũ no nyinaa de?​​—1 Timoteo 5:8.

Wo ne Onyankopɔn abusuabɔ

Sɛ woyɛ Yehowa Danseni a, dɛn na woreyɛ na ama wo ne Onyankopɔn ntam ayɛ papa? Ɛyɛ a wɔhyɛ wo ansa na woakenkan Onyankopɔn Asɛm anaa ɛyɛ a wufi wo pɛ mu na ɛyɛ? Asɛnka ne asafo nhyiam nso ɛ, ɛyɛ a wɔhyɛ wo ansa na woakɔ? Obi a wobɛware no no bɛpɛ sɛ onya obi a ɔmfa ne som nni agorɔ na ɔne no abɔ bra.​—Ɔsɛnkafo 4:9, 10.

Sɛ wobɔ mmɔden hu sɛnea wote yiye a, ɛbɛboa wo ama woanya obi a ɔbɛboa wo ama woanya nkɔso wɔ asetena mu; ɛremma wonkɔfa obi a ɔbɛtwe wo asan wɔ abrabɔ mu.