Twɛn na susuw wei ho hwɛ!

Susuw Rachel suahu yi ho. Ná Rachel bɔ mmɔden pa ara wɔ sukuu. Nanso bere a oduu gyinapɛn a ɛto so nson wɔ sukuu no, nneɛma sesae. Ɔka sɛ: “Me kyerɛkyerɛfo bi yɛɛ nea obetumi biara sɛ ɔbɛma madi nkogu wɔ ne sɔhwɛ mu.” Bɔne bɛn na Rachel yɛe? Ɔkyerɛkyerɛfo no maa Rachel ne ne maame nyinaa huu no pefee sɛ n’ani nnye wɔn som ho.

Sɛnea abo a wɔde atoto nsu bi mu boa ma wutwa nsu no, saa ara na akyerɛkyerɛfo boa wo ma wote nneɛma pii ase. Nanso ɛsɛ sɛ wobɔ wo ho mmɔden; wo ara na ɛsɛ sɛ wonantew twa nsu no

Dɛn na esii? Rachel toa so sɛ: “Bere biara a ɛbɛda adi sɛ ɔtan hunu nti na ɔma midii nkogu wɔ sɔhwɛ bi mu no, ɛyɛ a me ne me maame kɔ ne nkyɛn ne no kɔka ho asɛm. Awiei koraa no, ogyaee me haw.

Sɛ wuhyia ɔhaw a ɛte saa a, nya akokoduru na ka ho asɛm kyerɛ w’awofo. Akyinnye biara nni ho sɛ, wɔn ani begye ho sɛ wɔne wo kyerɛkyerɛfo no bɛka ho asɛm na ebia wɔama wo sukuu mu mpanyimfo no mpo aso ate na wɔahwɛ sɛnea wobedi ɔhaw no ho dwuma.

Ɛwom, ɛnyɛ ɔhaw biara a wubehyia na wubenya ano aduru sɛnea wopɛ. Tebea no bi wɔ hɔ a, gye sɛ wumia w’ani gyina mu. (Romafo 12:17,18) Tanya ka sɛ: “Ná m’akyerɛkyerɛfo no mu baako mfa sukuufo a ɔkyerɛ wɔn ade no nyɛ hwee. Ná ɔtaa yeyaw yɛn sɛ yennim nyansa. Mfiase no, na ɔma misu, nanso misuae sɛ meremfa m’adwene nkɔ atɛnnidi no so. Mede m’adwene sii nea na meresua wɔ sukuu no so yiye. Nea efii mu bae ne sɛ ɔkyerɛkyerɛfo no anhaw me bio. Nnipa kakraa bi a na wɔbɔ mmɔden pa ara no, na meka ho. Mfe mmienu akyi no, woyii ɔkyerɛkyerɛfo no adi.

Nea yɛreka akosi: Sɛ wo kyerɛkyerɛfo asɛm yɛ den a, hu sɛnea wo ne no bedi. Eyi bɛma woanya su bi a ɛho hia pa ara, na sɛ daakye ɛkɔba sɛ wuhyia adwumam panyin bi a n’asɛm yɛ den a, woahu sɛnea wobɛyɛ w’ade. (1 Petro 2:18) Afei nso, sɛ wuhyia akyerɛkyerɛfo a wɔnteetee sukuufo a, w’ani bɛsɔ wɔn kɛse.