Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Tala ‵Lei Mai te Atua!

 MATAUPU 2

Ko oi te Atua?

Ko oi te Atua?

1. Kaia e ‵tau ei o tapuaki atu tatou ki te Atua?

A te Atua tonu ko te Mafuaga o mea katoa. E seai sena kamataga kae e seai foki eiloa sena gataga. (Salamo 90:2) A ia ko te Pogai o te tala ‵lei telā e maua i te Tusi Tapu. (1 Timoteo 1:11) Ona ko te mea ne tuku mai ne te Atua a te ola ki a tatou, e ‵tau fua o tapuaki atu tatou ki a ia.​—Faitau te Fakaasiga 4:11.

2. A te Atua se vaegā tino pefea?

E seai eiloa se tino kai lavea ne ia te Atua me i a ia se agaga, ko tena uiga, me e maua ne ia se vaegā olaga telā e sili fakafia atu i tino kolā e ‵nofo i te lalolagi. (Ioane 1:18; 4:24) E tiga eiloa te feitu tenā, e mafai o iloa ne tatou a uiga o te Atua mai i mea ne faite ne ia. E pelā mo fuagalakau mo pulalakau kese‵kese e fakailoa mai i ei ki a tatou tena alofa mo te poto. A te lasi o te lagi mo te lalolagi e fakaasi mai i ei ki a tatou a tena ‵mana.​—Faitau te Loma 1:20.

E mafai foki o tauloto tatou ki uiga e uke atu o te Atua mai i te faitau ki te Tusi Tapu. E pelā mo te mea tenei, e fakaasi mai i ei ki a tatou a mea kolā e fiafia te Atua ki ei mo mea kolā e se fiafia a ia ki ei, ana faifaiga ki tino, mo te auala e saga atu ei a ia ki tulaga kese‵kese.​—Faitau te Salamo 103:7-10.

3. E mata, e isi se igoa o te Atua?

Ne fai mai a Iesu: “Te motou Tamana telā i te lagi, ke tapu tou igoa.” (Mataio 6:9) E tiga eiloa e uke a tofi o te Atua, e tasi fua tena igoa. I ‵gana takitasi, e faka‵leo aka eiloa i auala kese‵kese. I te ‵gana Tuvalu, e masani sāle o faka‵leo ki a “Ieova.” Kae e faka‵leo aka ne nisi tino ki a “Iāuē.”​—Faitau te Esoto 3:14, fakamatalaga mai lalo, Tusitapu Tauloto.

Ko oti ne ave keatea a te igoa o te Atua mai i Tusi Tapu e uke kae ne sui ki tofi e pelā mo te Aliki io me ko te Atua. Kae i te taimi ne tusi ei a te Tusi Tapu, ne aofia i ei a te igoa o te Atua,  kāti toeitiiti kae kātoa te faka-7,000 taimi. Ne fakailoa atu ne Iesu a te igoa o te Atua i te taimi ne akoako ei ne ia a tino e uiga ki te Atua.​—Faitau te Ioane 17:26.

4. E mata, e atafai mai te Atua ki a tatou?

E pelā mo te tamana alofa tenei, e gasuesue eiloa a te Atua i se auala telā ka tumau tena aoga ki a tatou

E mata, a te salalau atu o logo‵maega e fakauiga i ei me i a Ieova se Atua telā e se atafai mai ki a tatou? E fai mai a nisi tino me e fai ne ia ke logo‵mae tatou ke tofotofo aka ei tatou, kae ko te mea tenei e sē se mea tonu.​—Faitau te Iakopo 1:13.

Ne tuku atu ne te Atua ki te tagata a te saolotoga ke fai a filifiliga, telā e fakaasi atu i ei ne ia tena fakaaloalo ki te tagata. E a, e se fakatāua ne tatou a te ‵tou saolotoga ke filifili aka ke tavini atu tatou ki te Atua? (Iosua 24:15) Kae e filifili aka ne tino e tokouke ke fai a mea ma‵sei, tela la, e gasolo aka eiloa o uke atu a logo‵maega. E fanoanoa eiloa a Ieova māfai e onoono atu ki faifaiga sē fakamaoni.​—Faitau te Kenese 6:5, 6.

A Ieova se Atua telā e atafai mai ki a tatou. E manako a ia ke ola fia‵fia tatou. E se leva nei kae ka fakagata ne ia a logo‵maega mo latou foki kolā e māfua mai i ei a logo‵maega. I te taimi nei, e isi se pogai ‵lei e talia ei ne ia ke oko mai a logo‵maega mō se taimi toetoe. I te Mataupu e 8, ka iloa ei ne tatou a te pogai tenā.​—Faitau te 2 Petelu 2:9; 3:7, 13.

5. E mafai pefea o fakapili‵pili atu tatou ki te Atua?

E ‵kami tatou ne Ieova ke fakapili‵pili atu ki a ia mai i te fai‵pati atu e auala i ‵talo. E fiafia eiloa a ia ki a tatou taki tokotasi. (Salamo 65:2; 145:18) A Ia e loto fakamagalo. E iloa ne ia a taumafaiga a tatou ke fakafiafia atu ki a ia, kae ke oko foki eiloa māfai ko fakata‵mala tatou i nisi taimi. Tela la, faitalia ‵tou tulaga sē ‵lei katoatoa, e mafai eiloa o maua ne tatou se fesokotakiga pili mo te Atua.​—Faitau te Salamo 103:12-14; Iakopo 4:8.

Ona ko te mea ne tuku mai ne Ieova a te ola ki a tatou, e ‵tau o sili atu te ‵tou a‵lofa ki a ia i lō se isi tino aka. (Maleko 12:30) I te taimi e fakaasi atu ei tou alofa ki te Atua mai i te tauloto ki mea e uke atu e uiga ki a ia mo te faiga o mea e manako a ia ki ei, ka momea aka ei tou fakapilipili atu ki a ia.​—Faitau te 1 Timoteo 2:4; 1 Ioane 5:3.