Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Tala ‵Lei Mai te Atua!

 MATAUPU 8

Kaia ne Talia ei ne te Atua a Mea Ma‵sei mo Logo‵maega?

Kaia ne Talia ei ne te Atua a Mea Ma‵sei mo Logo‵maega?

1. Ne kamata pefea a mea ma‵sei?

Ne talia ne te Atua a pulega a tino mō se taimi leva ke fakaasi mai i ei me e se mafai ne latou o faka‵lei a fakalavelave o tino

Ne kamata a mea ma‵sei i te lalolagi i te taimi ne fai atu ei ne Satani a te loi muamua. A Satani se agelu ‵lei katoatoa muamua, kae ko ia “ne seki tumau i te munatonu.” (Ioane 8:44) Ne ati aka ne ia se manakoga mō te tapuakiga telā e ‵tau fua o avatu ki te Atua. Ne fakaloiloi ne Satani a te fafine muamua, ko Eva, kae ne fakamalosi ne ia tou fafine ke fakalogo atu ki a ia i lō te Atua. Ne kau atu foki Atamu ki a Eva i te sē faka‵logo ki te Atua. Ne iku atu te fakaikuga a Atamu ki logo‵maega mo te mate.​—Faitau te Kenese 3:1-6, 19.

I te taimi ne fakamalosi atu ei a Satani ke se fakalogo a Eva ki te Atua, ne kamata ne ia se ‵tekeatuga ki te pulega sili a te Atua, io me ko tena tulaga e pelā me ko te Tino Tafasili i te Maluga. Ne ‵kau atu a te tokoukega o tino ki a Satani i te ‵teke atu ki te Atua e pelā me ko te lotou Pule. Tela la, ne fai ei a Satani mo fai “te pule o te lalolagi.”​—Faitau te Ioane 14:30; 1 Ioane 5:19.

2. E mata, e isi se mea masei i mea ne faite ne te Atua?

A galuega katoa a te Atua e ‵lei katoatoa. Ne mafai eiloa o faka‵logo katoatoa ki te Atua a tino mo agelu kolā ne faite ne ia. (Teutelonome 32:4, 5) Ne faite ne te Atua a tatou mo te saolotoga ke filifili ki te faiga o mea ‵lei mo te faiga o mea ma‵sei. E tuku mai ne te saolotoga tenā se auala ke fakaasi atu ei te ‵tou a‵lofa ki te Atua.​—Faitau te Iakopo 1:13-15; 1 Ioane 5:3.

3. Kaia ne talia ei ne te Atua a logo‵maega ke oko mai eiloa ki aso nei?

Ne talia ne Ieova ke ‵teke atu ki tena pulega sili mō se vaitaimi leva. Kaia? Ke fakaasi atu ei me e aunoa mo te Atua, e seai eiloa se taumafaiga ke pule atu e aoga ki tino. (Failauga 7:29; 8:9) Mai tua o te 6,000 tausaga o tala mua o tino, e lavea ‵lei atu eiloa a te fakamaoniga. Ne seki mafai ne tino  pule o fakagata a taua, amioga solitulafono, faifaiga sē fakamaoni, io me ko masaki.​—Faitau te Ielemia 10:23; Loma 9:17.

E ‵kese mai i pulega a tino, e aoga eiloa a te pulega a te Atua ki tino kolā e talia ne latou. (Isaia 48:17, 18) Ko pili o fakagata ne Ieova a pulega katoa a tino. Ko tino fua kolā e filifili aka ke pule latou ne te Atua ka ‵nofo i te lalolagi.​—Isaia 11:9.—Faitau te Tanielu 2:44.

4. Se a te mea e mafai ne tatou o fai ona ko te kufaki o te Atua?

Ne fai mai a Satani me e seai se tino e tavini atu ki a Ieova ona ko te alofa tonu. E mata, e mafai ne koe o fakamaoni atu a te ‵se o te loi tenā? E mafai! Ona ko te kufaki o te Atua, e mafai ei ne tatou katoa o fakaasi atu me e fia‵fia tatou ki te pulega a te Atua io me ko pulega a tino. E fakaasi atu ne tatou ‵tou filifiliga i te auala e ola ei tatou.​—Faitau te Iopu 1:8-12; Faataoto 27:11.

5. E mafai pefea o filifili ne tatou a te Atua e pelā me ko te ‵tou Pule?

E fakaasi mai i ‵tou filifiliga me e ma‵nako tatou ke fai te Atua mo fai ‵tou Pule io me ikai

E mafai o filifili ne tatou a te Atua e pelā me ko ‵tou Pule mai i te ‵sala mo te fakagalue aka foki o te tapuakiga tonu telā e fakavae ki te Muna a te Atua, ko te Tusi Tapu. (Ioane 4:23) E mafai o ‵teke atu tatou ki a Satani e pelā me ko te ‵tou pule mai i te ‵kalo keatea mai i mea fakapolitiki mo taua, e pelā mo Iesu.​—Faitau te Ioane 17:14.

E fakaaoga ne Satani tena ‵mana ke fakamalosi aka ne ia a amioga ma‵sei kae fakalogo‵mae. Kafai e ‵teke atu tatou ki faifaiga penā, e mafai o fakatauemu io me e ‵teke mai a nisi taugasoa mo kāiga ki a tatou. (1 Petelu 4:3, 4) Tela la, e ‵tau eiloa o fai ne tatou se filifiliga. E mata, ka ‵kau atu tatou ki tino kolā e a‵lofa ki te Atua? E mata, ka faka‵logo tatou ki ana tulafono ‵poto kae a‵lofa? Kafai e fai tatou penā, e fakamaoni atu eiloa ne tatou me ne pati loi a Satani i ana pati me kafai ko uke a fakalavelave, e seai eiloa se tino e fai ne ia a mea kolā e fai mai ne te Atua.​—Faitau te 1 Kolinito 6:9, 10; 15:33.

E fakamaoni aka eiloa a te alofa o te Atua ki tino me ka fakagata ne ia a mea ma‵sei mo logo‵maega. A latou kolā e fakaasi atu me e tali‵tonu latou ki te mea tenei ka mafai o ola i te lalolagi ki te se-gata-mai.​—Faitau te Ioane 3:16.