Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Te Tala ‵Lei Mai te Atua!

 MATAUPU 10

E Mafai Pefea o Iloa ne Koe te Lotu Tonu?

E Mafai Pefea o Iloa ne Koe te Lotu Tonu?

1. E mata, e tasi fua te lotu tonu?

“Ke fakaeteete koutou i pelofeta ‵loi.”​—MATAIO 7:15.

Ne akoako atu ne Iesu ana soko ki se lotu fua e tasi, ko te lotu tonu. E fai pelā me se auala e takitaki atu ei ki te ola se-gata-mai. Ne fai mai a Iesu: “E mu‵tana fua a tino e maua ne latou” te auala tenā. (Mataio 7:14) E talia fua ne te Atua a te lotu telā e fakavae ki tena Muna tonu, ko te Tusi Tapu. E ‵kau fakatasi a tino tapuaki ‵tonu katoa i te fakatuanaki e tasi.​—Faitau te Ioane 4:23, 24; 14:6; Efeso 4:4, 5.

2. Ne a pati a Iesu e uiga ki Kelisiano ‵loi?

“E fai mai latou i mua o tino katoa me e iloa ne latou te Atua, kae e fakafiti ne latou a ia e auala i olotou galuega.”​—TITO 1:16.

Ne fakailoa mai ne Iesu me ka fakamasei ne pelofeta ‵loi a te Lotu Kelisiano. E foliga mai latou e pelā me ne tino tapuaki ‵tonu. E fai mai latou me i olotou lotu ko te Lotu Kelisiano. Kae e mafai o iloa tonu ne koe me ko latou ne vaegā tino pefea. E pefea la? Ko te lotu tonu fua e maua i ei a Kelisiano ‵tonu kolā e lavea atu i olotou uiga mo faifaiga ‵lei.​—Faitau te Mataio 7:13-23.

3. E mafai pefea o iloa ne koe a tino tapuaki ‵tonu?

Mafaufau ki fakailoga e lima konei:

  • E āva a tino tapuaki ‵tonu ki te Tusi Tapu e pelā me ko te Muna a te Atua. E taumafai latou ke ola e ‵tusa mo akoakoga fakavae i ei. Tela la, a te lotu tonu e ‵kese mai i lotu kolā e fakavae ki manatu o tino. (Mataio 15:7-9) E ola eiloa a tino tapuaki ‵tonu e ‵tusa mo mea e talai atu ne latou.​—Faitau te Ioane 17:17; 2 Timoteo 3:16, 17.

  •   E fakaaloalo a soko ‵tonu o Iesu ki te igoa o te Atua, ko Ieova. Ne fakaaloalo ne Iesu te igoa o te Atua mai i te fakailoaatuga ne ia. Ne fesoasoani atu a ia ke iloa ne tino a te Atua kae akoako foki latou ke ‵talo atu ke tapu te igoa o te Atua. (Mataio 6:9) I te koga e nofo koe i ei, se a te lotu telā e fakailoa atu ne ia te igoa o te Atua?​—Faitau te Ioane 17:26; Loma 10:13, 14.

  • E talai atu ne Kelisiano ‵tonu a te Malo o te Atua. Ne uga mai ne te Atua a Iesu ke talai atu te tala ‵lei o te Malo. A te Malo o te Atua ko te fakamoemoega fua e tasi mō tino. Ne tumau eiloa te faipati atu o Iesu e uiga ki ei ke oko ki te aso ka mate ei a ia. (Luka 4:43; 8:1; 23:42, 43) Ne fai atu a ia me ka talai atu ne ana soko a te Malo. Kafai e fanatu se tino o faipati atu ki a koe e uiga ki te Malo o te Atua, se a te lotu e kau a ia ki ei?​—Faitau te Mataio 24:14.

  • E se fai a soko o Iesu mo fai ne vaega o te lalolagi masei tenei. E mafai o iloa ne koe latou i te auala e se ‵kau atu ei latou ki faifaiga fakapolitiki io me ko kinauga a te lalolagi. (Ioane 17:16; 18:36) E se fakaakoako atu foki latou ki faifaiga mo kilokiloga fakalogo‵mae a te lalolagi.​—Faitau te Iakopo 4:4.

  • E maua eiloa ne Kelisiano ‵tonu a te alofa tu ‵kese i va o latou. Mai i te Muna a te Atua, e fakamasani latou ke fakaasi atu te āva ki itukāiga o tino katoa. E tiga eiloa ne ‵lago malosi atu a lotu ‵se ki taua a atufenua, e ita fitifiti a tino tapuaki ‵tonu ma ‵lago atu ki ei. (Mika 4:1-3) I lō te fai penā, e fakaaoga eiloa mo te alofa sē fakapito ne Kelisiano ‵tonu olotou taimi mo kope ke fesoasoani kae fakamalosi atu ki nisi tino.​—Faitau te Ioane 13:34, 35; 1 Ioane 4:20.

4. E mata, e mafai o iloa ne koe te lotu tonu?

Ko oi te lotu e fakavae ana akoakoga katoa ki te Muna a te Atua, e fakaaloalo ki te igoa o te Atua, kae folafola atu te Malo o te Atua e pelā me ko te fakamoemoega fua e tasi mō tino? Se a te potukau e fakaasi atu ne latou a te alofa kae ‵teke atu ki taua? Se a tau faka‵tau?​—Faitau te 1 Ioane 3:10-12.