1. Kaia ne fakatoka faka‵lei ei ne te Atua a te fenua mua o Isalaelu?

Ne fakatoka ne te Atua a tama‵liki a te tagata mua ko Apelaamo ki se atufenua kae tuku atu ki a latou se fakasologa o tulafono. Ne fakaigoa ne ia a te atufenua ki “Isalaelu” kae ne fakavae ki ei te tapuakiga tonu mo tena muna. (Salamo 147:19, 20) Tela la, a tino mai atufenua katoa e mafai o maua ne latou a mea aoga mai i Isalaelu.​—Faitau te Kenese 22:18.

Ne filifili ne te Atua a te kau Isalaelu ke fai mo ana molimau. A olotou tala fakasolopito mua e tuku mai i ei se fakaasiga ki te auala ne maua ei ne tino a mea aoga mai i te faka‵logo ki tulafono a te Atua. (Teutelonome 4:6) Tela la, e auala i te kau Isalaelu, ne mafai ei o iloa ne nisi tino a te Atua tonu.—Faitau te Isaia 43:10, 12.

2. Kaia e fakatoka faka‵lei ei a Kelisiano ‵tonu?

E seki leva, kae ne galo atu i te kau Isalaelu a te taliaga a te Atua, kae ne sui ne Ieova te atufenua tenā ki se fakapotopotoga Kelisiano. (Mataio 21:43; 23:37, 38) Nei la, ko sui ne Kelisiano ‵tonu a te kau Isalaelu i te tavini atu e pelā me ne molimau a Ieova.​—Faitau te Galuega 15:14, 17.

Ne fakatoka ne Iesu ana soko ke talai kae fai a soko i fenua katoa. (Mataio 10:7, 11; 24:14; 28:19, 20) E fakaoti eiloa te galuega tenei i te gataga o te olaga masei tenei. I konā loa, ka ‵kau fakatasi a te fia miliona o tino mai fenua katoa i te tapuakiga tonu mō te taimi muamua eiloa i tala fakasolopito. (Fakaasiga 7:9, 10) E fakatoka a Kelisiano ‵tonu ke fakatau fakamalosi kae fakatau fesoasoani te suā tino ki te suā tino. E ‵pau eiloa a te polokalame o akoakoga faka-te-Tusi Tapu e maua ne latou i olotou fakatasiga i te lalolagi kātoa.​—Faitau te Epelu 10:24, 25.

 3. Ne kamata pefea a te fakapotopotoga a Molimau a Ieova i aso nei?

I tausaga talu mai te 1870, ne kamata o maua ne se tamā potukau o tino a‵koga i te Tusi Tapu a muna‵tonu i te Tusi Tapu kolā ko leva ne ‵galo. Ne iloa ne latou me ne fakatoka ne Iesu a te fakapotopotoga Kelisiano ke talai atu, tela la, ne kamata o fai ne latou a te galuega talai o te Malo i te lalolagi kātoa. I te 1931, ne fakaaoga ne latou a te igoa ko Molimau a Ieova.​—Faitau te Galuega 1:8; 2:1, 4; 5:42.

4. E fakatoka pefea a Molimau a Ieova?

I te senitenali muamua, ne maua ne te fakapotopotoga Kelisiano i fenua e uke a mea aoga mai i se potukau pule telā e talia ne latou a Iesu e pelā me ko te Ulu o te fakapotopotoga. (Galuega 16:4, 5) E penā foki loa i aso nei, e maua ne Molimau a Ieova i te lalolagi kātoa a mea aoga mai i se Potukau Pule o toeaina ata‵mai. E tausi ne latou a ofisa lagolago o Molimau a Ieova kolā e ‵fuli, ‵lomi, kae tufatufa atu ne latou a tusi faka-te-Tusi Tapu i ‵gana e sili atu i te 600. Tela la, e mafai o tuku mai ne te Potukau Pule a fakamalosiga mo takitakiga mai te Tusi Tapu ki fakapotopotoga e 100,000 tupu i te lalolagi kātoa. I fakapotopotoga takitasi, e tavini atu eiloa a tāgata kolā e fetaui ‵lei e pelā me ne toeaina io me ne ovasia. E tausi atu mo te a‵lofa a tāgata konei ki te lafu mamoe a te Atua.​—Faitau te 1 Petelu 5:2, 3.

E fakatoka a Molimau a Ieova ke talai atu ne latou te tala ‵lei kae fai foki a soko. E pelā mo te kau apositolo, e talai atu tatou mai fale ki fale. (Galuega 20:20) E ofo atu foki tatou ke suke‵suke mo tino a‵lofa fakamaoni ki te munatonu. Kae e se fai fua a Molimau a Ieova mo fai se fakapotopotoga. E aofia eiloa tatou i te kāiga o se Tamana alofa. E fai tatou mo taina mo tuagane kolā e fakatau atafai te suā tino ki te suā tino. (2 Tesalonia 1:3) Ona ko te mea ne fakatoka a tino o Ieova ke fakafiafia atu ki te Atua kae fesoasoani atu ki nisi tino, e fai eiloa latou mo toe kāiga fiafia i te lalolagi.​—Faitau te Salamo 33:12; Galuega 20:35.