Fanatu ki te fakasologa

Fanatu ki te fakasologa o mataupu

Se a te Loto o te Atua mō Tatou?

Se a te Loto o te Atua mō Tatou?

KAFAI e faitau koe ki te nusipepa, onoono ki te televise, io me fakalogologo ki te letio, e lavea kae lagona ne koe a tala ki amioga ma‵sei, taua, mo amioga takafiatoa. Kāti e logo‵mae nei koe ona ko se masaki io me ko te mate atu o se tino pele telā e alofa malosi koe ki ei.

Fesili ifo ki a koe:

  • E mata, tenei te mea e manako te Atua ke tupu ki a au mo toku kāiga?

  • Tefea te koga ka maua ne au i ei te fesoasoani ke fa‵ki i oku fakalavelave?

  • E mata, e mafai eiloa o maua te filemu tonu?

E manino ‵lei a tali e tuku mai i te Tusi Tapu ki fesili konā.

 E AKOAKO MAI TE TUSI TAPU ME KA FAI NE TE ATUA A MEA FAKAOFOOFOGIA I TE LALOLAGI.

  • A tino ka se toe logo‵mae, olo aka o ma‵tua, io me ‵mate.—Fakaasiga 21:4

  • “A tino ‵pili ka eva e pelā mo te tia.”—Isaia 35:6

  • “A mata o tino ‵kivi ka ‵kite.”—Isaia 35:5

  • A tino ‵mate ka toe fakaola mai.—Ioane 5:28, 29

  • Ka se toe ai se tino e masaki.—Isaia 33:24

  • Ka maua ne tino katoa i te lalolagi a meakai e uke mo ‵kai.—Salamo 72:16

 KA MAUA A MEA AOGA MAI I AKOAKOGA I TE TUSI TAPU

Ka faigofie eiloa ke fakaiku aka i tou mafaufau me i mea kolā ne faitau koe ki ei i itulau kamata o te tusi tenei ne mea sē mautinoa. Kae ko oti ne tauto mai te Atua me ka fai ne ia a fakama‵fuliga konā i te lalolagi nei i se taimi pili mai, kae e fakamatala mai i te Tusi Tapu te auala ka fai ei ne ia te mea tenā.

E uke foki a nisi mea e fakaasi mai i te Tusi Tapu. E fakamatala mai i ei a mea e ‵tau o iloa ne tatou ko te mea ke maua ne tatou te fiafia tonu i te olaga nei. Ke mānava malie, kae mafaufau ki mea kolā e manavase koe ki ei. Kāti e aofia i ei a tupe io me ko tou kāiga, masaki, io me ko te mate o se tino pele. E mafai o fesoasoani atu te Tusi Tapu ke fakafesagai koe ki fakalavelave konei, kae ko tali e maua ne koe ki fesili konei ka fakamafanafana atu eiloa ki a koe:

 A tou faitau ki te tusi tenei e fakaasi mai ei me e manako koe ke iloa ne koe a mea kolā e akoako mai i te Tusi Tapu. Ka fesoasoani atu eiloa te tusi tenei ki a koe. E isi ne fesili i palakalafa kolā ka fesoasoani atu ke malamalama faka‵lei koe i te Tusi Tapu. Ne fia‵fia te fia miliona o tino ki sautalaga faka-te-Tusi Tapu ne fai ne latou mo Molimau a Ieova. E fakamoe‵moe matou ke fai foki koe penā. Ke fakamanuia eiloa koe ne te Atua i te taimi e iloilo ei ne koe a mea kolā e akoako mai ne te Tusi Tapu ki a koe!