Fanatu ki te fakasologa

Fanatu ki te fakasologa o mataupu

 MATAUPU E SEFULUFITU

Te Tauliaga ke ‵Talo

Te Tauliaga ke ‵Talo

“Te Atua ne faite ne ia te lagi mo te lalolagi” e manako ke lagona ne ia ‵tou ‵talo.—Salamo 115:15

1, 2. Kaia e mafaufau ei koe me i ‵talo se meaalofa tāua, kae kaia e ‵tau ei o iloa ne tatou a mea e akoako mai i te Tusi Tapu e uiga ki ei?

E FOLIKI ‵ki te lalolagi māfai e fakatusa ki te iunivesi. Kafai e kilo mai a Ieova ki te lalolagi, e fai a tino katoa i atufenua katoa e pelā me se tamā motigā vai mai se paketi. (Salamo 115:15; Isaia 40:15) Faitalia te fo‵liki o tatou māfai e fakatusa ki te iunivesi, e fai mai te Salamo 145:18, 19: “A Ieova e pili ki a latou kolā e ka‵laga ki a ia, ki a latou kolā e ka‵laga atu ki a ia i te munatonu. E fakama‵lie ne ia a manakoga o latou kolā e ma‵taku ki a ia; e lagona ne ia te lotou ‵tagi mō se fesoasoani, kae e faka‵sao ne ia latou.” Ko oko eiloa te gali o te tauliaga ko maua ne tatou! E manako a Ieova, te Mafuaga malosi katoatoa, ke fakapilipili mai a ia ki a tatou, kae e manako a ia ke fakalogologo ki ‵tou ‵talo. Ao, a te ‵talo se tauliaga, se meaalofa tāua telā ne tuku mai ne Ieova ki a tatou.

2 Kae e fakalogo mai fua a Ieova ki a tatou māfai e fai‵pati atu tatou ki a ia i te auala telā e talia ne ia. E fai pefea ne tatou te mea tenā? Ke onoono aka tatou me ne a pati a te Tusi Tapu e uiga ki te faiga o ‵talo.

KAIA E ‵TAU EI O ‵TALO KI A IEOVA?

3. Kaia e ‵tau ei o ‵talo koe ki a Ieova?

3 E manako a Ieova ko koe ke ‵talo, io me faipati atu ki a ia. E iloa pefea ne tatou te mea tenā? Fakamolemole faitau te Filipi 4:6, 7Mafaufau ki te ‵kamiga alofa tenā. E fiafia malosi a te Pule o te iunivesi ki a koe kae e manako a ia ke taku atu ne koe ki a ia ou lagonaga e pelā foki mo ou fakalavelave.

4. E fakamalosi aka pefea ne te ‵talo i taimi katoa ki a Ieova a tou va fakataugasoa mo ia?

 4 E fesoasoani mai a ‵talo ke maua ne tatou se va fakataugasoa ‵pili mo Ieova. Kafai e sau‵tala faeloa a taugasoa i taimi katoa kae fakaasi atu olotou mafaufauga, fakalavelave mo lagonaga, ka gasolo aka faeloa o malosi te lotou va fakataugasoa. E penā foki eiloa mo te ‵talo ki a Ieova. E auala i te Tusi Tapu, ne fakaasi mai ne ia ki a koe ana mafaufauga mo lagonaga, kae e fai atu ne ia ki a koe a mea ka fai ne ia i aso mai mua. E mafai foki o fakaasi atu ne koe ou lagonaga ‵loto ki a ia mai te faipati atu faeloa ki a ia i taimi katoa. Kafai e fai ne koe te mea tenei, ka gasolo aka eiloa o malosi atu tou va fakataugasoa mo Ieova.—Iakopo 4:8.

NE A ‵TOU MEA E ‵TAU O FAI KE LAGONA NE TE ATUA ‵TOU ‵TALO?

5. E iloa pefea ne tatou me e se fakalogologo a Ieova ki ‵talo katoa?

5 E mata, e fakalogologo a Ieova ki ‵talo katoa? Ikai. I taimi o te pelofeta ko Isaia, ne fai atu a Ieova ki tino Isalaelu: “Faitalia me ofo mai ne koutou a ‵talo e uke, e se  fakalogologo au ki ei; otou lima ko ‵fonu eiloa i toto.” (Isaia 1:15) Tela la, kafai e se fakaeteete tatou, e mafai o fai ne tatou ne mea kolā e fai ei ke ‵mao ‵tou fesokotakiga mo Ieova, kae fai ei ke se fia saga mai a ia ki ‵tou ‵talo.

6. Kaia e tāua ‵ki ei te fakatuanaki? E fakaasi atu pefea ne koe me e isi sou fakatuanaki?

6 Kafai e ma‵nako tatou ke fakalogologo mai a Ieova ki ‵tou ‵talo, e ‵tau o fakatuanaki tatou ki a ia. (Maleko 11:24) E fakamatala mai te apositolo ko Paulo: “E aunoa mo te fakatuanaki e se mafai o fakafiafia faka‵lei atu se tino ki te Atua, me ko so se tino e fanatu ki te Atua e ‵tau mo ia o talitonu me e ola a ia kae tuku atu ne ia te taui ki a latou kolā e ‵sala malosi ki a ia.” (Epelu 11:6) Kae e se lava fua i te fai atu me ko fakatuanaki tatou. E ‵tau o fakamaoni atu ne tatou te ‵tou fakatuanaki mai te faka‵logo ki a Ieova i aso katoa.—Faitau te Iakopo 2:26.

7. (a) Kaia e ‵tau ei o loto maulalo kae āva tatou māfai e ‵talo ki a Ieova? (e) E fakaasi atu pefea ne tatou i ‵tou ‵talo me e loto fakamaoni tatou?

7 E ‵tau mo tatou o loto maulalo kae āva māfai ko ‵talo atu ki a Ieova. Kaia? Kafai e fai‵pati atu tatou ki se tupu io me se pelesitene, ka fai‵pati eiloa tatou i se auala āva. A Ieova ko te Atua Malosi Katoatoa, tela la, e mata, e se ‵tau foki o sili atu te āva mo te loto maulalo e fakaasi atu ne tatou māfai ko ‵talo ki a ia? (Kenese 17:1; Salamo 138:6) E ‵tau foki o loto fakamaoni tatou kae ‵talo atu ki a Ieova mai ‵tou loto, kae e se ko te fakafokifoki faeloa o pati.—Mataio 6:7, 8.

8. Kafai e ‵talo tatou mō se mea, ne a nisi mea e ‵tau o fai ne tatou?

8 A te ‵toe mea, kafai e ‵talo tatou e uiga ki se mea, e ‵tau o fai ne tatou te ‵toe mea e mafai o fai ke fakataunu te mea ne ‵talo tatou ki ei. E pelā me se fakaakoakoga, kafai e ‵talo tatou ki a Ieova e uiga ki ‵tou manakoga i aso takitasi, e se ‵tau o paie tatou io me fakamoe‵moe ke tuku mai ne Ieova ‵tou manakoga konā, kae tela la, e mafai ei o ga‵lue tatou ke  maua a mea konā. E ‵tau o ga‵lue malosi tatou kae talia so se galuega telā e manakogina ke fai ne tatou. (Mataio 6:11; 2 Tesalonia 3:10) Io me kafai e ‵talo tatou ki a Ieova ke fesoasoani mai ke fakagata te faiga o se mea masei, e ‵tau o ‵kalo kea‵tea tatou mai tulaga kolā e mafai o tofotofogina ei tatou. (Kolose 3:5) Ke iloilo nei ne tatou a nisi fesili masani e uiga ki ‵talo.

FESILI MASANI E UIGA KI ‵TALO

9. Ko oi e ‵tau o ‵talo tatou ki ei? Se a te mea e akoako mai i te Ioane 14:6 e uiga ki ‵talo?

9 Ko oi e ‵tau o ‵talo tatou ki ei? Ne akoako ne Iesu ana soko ke ‵talo ki “te motou Tamana telā i te lagi.” (Mataio 6:9) Ne fai mai foki a ia: “Au ko te auala mo te munatonu mo te ola. E seai se tino e fanatu ki te Tamana māfai e se auala mai i a au.” (Ioane 14:6) Tela la, e ‵tau fua mo tatou o ‵talo ki a Ieova e auala i a Iesu. Se a te uiga o te ‵talo e auala i a Iesu? Ko te mea ke talia ne Ieova ‵tou ‵talo, e ‵tau o fakaasi atu ne tatou te āva ki te galuega tāua ne tuku atu ne Ieova ki a Iesu. E pelā mo te mea ko oti ne tauloto ne tatou, ne vau a Iesu ki te lalolagi ke faka‵sao tatou mai te agasala mo te mate. (Ioane 3:16; Loma 5:12) Ne fakasopo foki ne Ieova a Iesu ke fai mo Faitaulaga Sili mo se Famasino.—Ioane 5:22; Epelu 6:20.

A koe e mafai o ‵talo i so se taimi

10. E mata, e isi se auala fakapito e ‵tau o ‵tu ei tatou māfai e ‵talo? Fakamatala mai.

10 E mata, e isi se auala fakapito e ‵tau o ‵tu ei tatou māfai e ‵talo? Ikai, ne seki fai mai a Ieova ko tatou ke totuli, saga‵saga, io me ‵tu i te taimi e ‵talo ei. E akoako mai te Tusi Tapu me e mafai o fai‵pati tatou ki a Ieova i so se auala āva. (1 Nofoaiga Tupu 17:16; Neemia 8:6; Tanielu 6:10; Maleko 11:25) A te ‵toe mea tāua ki a Ieova, e se ko te auala e ‵tu io me saga‵saga ei tatou, kae ke ‵talo atu tatou mo se kilokiloga tonu. E mafai o ‵talo tatou i se leo maluga io me ‵talo lēmū  i so se koga e ‵nofo tatou i ei i so se taimi i te ao io me ko te po. Kafai e ‵talo tatou ki a Ieova, e mafai o tali‵tonu tatou me ka lagona ne ia ‵tou ‵talo faitalia me seai se isi tino e lagona ne ia.—Neemia 2:1-6.

11. Ne a nisi mea e mafai o fai atu ne tatou i ‵tou ‵talo ki a Ieova?

11 Ne a mea e mafai o ‵talo tatou ki ei? E mafai o ‵talo tatou mō so se mea telā e talia ne Ieova. Muna a te Tusi Tapu: “So se mea e fakatagi atu tatou ki ei e ‵tusa mo tena loto, e lagona eiloa ne ia tatou.” (1 Ioane 5:14) E mata, e mafai o ‵talo tatou ki mea totino a tatou? Ao. A te ‵talo ki a Ieova e ‵tau o ‵pau mo te faipati atu ki sou taugasoa pili. E mafai o fai atu ne tatou ki a Ieova so se mea i ‵tou mafaufau mo ‵tou loto. (Salamo 62:8) E mafai o ‵talo tatou ke tuku mai ne ia tena agaga tapu malosi ke fesoasoani mai ki a tatou ke fai te mea tonu. (Luka 11:13) E mafai foki o fakamolemole atu tatou ki a Ieova ke tuku mai te poto ke fai a fakaikuga ‵lei, kae e mafai o ‵talo tatou ke maua te malosi ke fakafesagai atu ki fakalavelave. (Iakopo 1:5) E ‵tau o fakamolemole atu tatou ki a Ieova ke fakamagalo ‵tou agasala. (Efeso 1:3, 7) E ‵tau foki o ‵talo tatou mō nisi tino, e aofia i ei ‵tou kāiga mo ‵tou taina mo tuagane i te fakapotopotoga.—Galuega 12:5; Kolose 4:12.

12. Ne a toe mea tāua e ‵tau o fakatāua ne tatou i ‵tou ‵talo?

12 Ne a toe mea tāua e ‵tau o fakatāua ne tatou i ‵tou ‵talo? Ko Ieova mo tena loto. E ‵tau o fakafetai atu tatou ki a ia mai ‵tou loto mō mea katoa ne fai ne ia mō tatou. (1 Nofoaiga Tupu 29:10-13) E iloa ne tatou te mea tenei me i te taimi ne nofo ei a Iesu i te lalolagi, ne akoako ne ia ana soko ke iloa ne latou o ‵talo. (Faitau te Mataio 6:9-13.) Ne fai atu a ia me e ‵tau mo ana soko o ‵talo muamua ke faka‵malu te igoa o te Atua. Oti aka, fai atu ei a Iesu me e ‵tau o ‵talo tatou ke na oko mai te Malo o te Atua kae ke fai te loto o Ieova i te lalolagi kātoa. Mai tua o te faiatuga ke ‵talo mō  mea tāua konā ne fai atu ei a Iesu ke ‵talo tatou mō ‵tou manakoga totino. Kafai e fakamuamua ne tatou a Ieova mo te faiga o tena loto i ‵tou ‵talo, ko fakaasi atu ei ne tatou a te ‵toe mea telā e tāua ki a tatou.

13. E ‵tau o pefea te leva o ‵tou ‵talo?

13 E ‵tau o pefea te leva o ‵tou ‵talo? E se fakaasi mai te mea tenā i te Tusi Tapu. E mafai o toe‵toe io me ‵loa ‵tou ‵talo. E pelā me se fakaakoakoga, e mafai o fai ne tatou se ‵talo toetoe mai mua o ‵kai, io me se ‵talo loa māfai ko avatu  ne tatou te fakafetai ki a Ieova io me fai atu ki a ia ‵tou fakalavelave. (1 Samuelu 1:12, 15) E se ma‵nako tatou ke fakaloa‵loa ‵tou ‵talo ke ofo i ei a nisi tino, e pelā mo te mea ne fai ne nisi tino i aso o Iesu. (Luka 20:46, 47) A Ieova e se fiafia ki vaegā ‵talo penā. A te mea telā e tāua ki a Ieova ko tatou ke ‵talo atu mai ‵tou loto.

14. E ‵tau o ‵talo fakafia atu tatou, kae se a te mea e akoako mai ne te mea tenei e uiga ki a Ieova?

14 E tau o ‵talo fakafia tatou? E ‵kami ne Ieova tatou ke fai‵pati atu faeloa ki a ia. E fai mai te Tusi Tapu me e ‵tau mo tatou o “‵talo faeloa,” “tumau faeloa i te ‵talo,” kae “‵talo i taimi katoa.” (Mataio 26:41; Loma 12:12; 1 Tesalonia 5:17) E toka faeloa a Ieova o fakalogologo ki a tatou. E mafai o fakafetai atu tatou ki a ia i aso katoa mō tena alofa mo tena kaimalie. E mafai foki o fakamolemole tatou ki a ia mō  tena takitakiga, malosi mo tena fakamafanafanaga. Kafai e fakatāua tonu ne tatou te tauliaga ko maua ne tatou ke ‵talo ki a Ieova, ka fakaaoga ne tatou so se avanoaga ke fai‵pati ki a ia.

15. Kaia e ‵tau ei o fai atu tatou “amene” i te fakaotiga o se ‵talo?

15 Kaia e ‵tau o fai atu tatou “amene” i te fakaotiga o se ‵talo? A te pati “amene” e fakauiga ki te “e tonu” io me “ke fai eiloa penā.” A te faiga penā se auala ke fakaasi atu ei me e tonu eiloa te mea ne fai atu ne tatou i ‵tou ‵talo, ko tena uiga e fakamaoni tatou ki ‵tou pati. (Salamo 41:13) E akoako mai te Tusi Tapu me se mea ‵lei ke fai atu “amene,” i se leo malalo io me i se leo maluga, i te fakaotiga o se ‵talo i mua o tino e tokouke ke fakaasi atu ei me lotoma‵lie tatou ki mea kolā ne taku atu i te ‵talo.—1 Nofoaiga Tupu 16:36; 1 Kolinito 14:16.

TE AUALA E TALI MAI NE TE ATUA ‵TOU ‵TALO

16. E mata, e tali mai eiloa ne Ieova ‵tou ‵talo? Fakamatala mai.

16 E mata, e tali mai eiloa ne Ieova ‵tou ‵talo? Ao. E taku ne te Tusi Tapu a ia ko te “Tino e lagona ne ia a ‵talo.” (Salamo 65:2) E lagona kae tali ne Ieova a ‵talo fakamaoni a te fia miliona o tino, kae fai ne ia penā i auala kese‵kese e uke.

17. E fakaaoga pefea ne Ieova ana agelu mo ana tavini i te lalolagi ke tali aka ‵tou ‵talo?

17 E tali mai ne Ieova ‵tou ‵talo e auala i ana agelu mo ana tavini i te lalolagi. (Epelu 1:13, 14) E uke a tala o tino kolā ne ‵talo mō se fesoasoani ke malamalama latou i te Tusi Tapu, kae mai tua malie ifo kae āsi atu se Molimau a Ieova ki a ia. E fakaasi mai i te Tusi Tapu me e aofia a agelu i te folafolaatuga o te “tala ‵lei” ki te lalolagi kātoa. (Faitau te Fakaasiga 14:6.) E tokouke foki a tino i a tatou ne ‵talo ki a Ieova e uiga ki se fakalavelave io me se manakoga kae ne maua ne latou  te feoasoani tenā mai se taina io me se tuagane Kelisiano.—Faataoto 12:25; Iakopo 2:16.

E mafai o tali mai ne Ieova ‵tou ‵talo e auala i te fesoasoani e maua mai nisi Kelisiano

18. E fakaaoga pefea ne Ieova tena agaga tapu mo te Tusi Tapu ke tali aka ‵tou ‵talo?

18 E fakaaoga ne Ieova tena agaga tapu ke tali aka ‵tou ‵talo. Kafai e ‵talo tatou mō se fesoasoani ke fakafesagai atu ki se fakalavelave, e mafai o fakaaoga ne ia tena agaga tapu ke tuku mai ki a tatou te takitakiga mo te malosi. (2 Kolinito 4:7) E tali mai foki ne Ieova ‵tou ‵talo e auala i te Tusi Tapu, kae e fesoasoani mai a ia ki a tatou ke fai a fakaikuga ‵lei. Kafai e fai‵tau tatou ki te Tusi Tapu, e mafai o maua ne tatou a tusi siki kolā ka aoga ki a tatou. E mafai foki o fakamalosi ne Ieova se tino telā e fai tena tali i se fakatasiga ke fai ne ia se tali telā e fetaui ‵lei mo ‵tou tulaga, io me se toeaina i te fakapotopotoga ke fakaasi mai ki a tatou se manatu mai te Tusi Tapu.—Kalatia 6:1.

19. Kaia e foliga mai me e se tali mai a Ieova ki ‵tou ‵talo?

19 I nisi taimi, kāti ka ma‵natu aka tatou, ‘Kaia e seki tali mai ei a Ieova ki aku ‵talo?’ Ke masaua, e iloa ne ia te taimi tonu mo te auala ke tali ne ia ‵tou ‵talo. E iloa ne ia a mea e ma‵nako tatou ki ei. Kāti e manakogina ke ‵talo faeloa tatou mō se taimi tai leva ke fakaasi atu ei me e tonu eiloa te mea telā e ma‵nako tatou ki ei kae ke fakaasi atu foki me e fakatuanaki ‵tonu eiloa tatou ki a ia. (Luka 11:5-10) I nisi taimi, e tali ne Ieova ‵tou ‵talo i se auala e seki fakamoe‵moe tatou ki ei. Kāti ne ‵talo atu tatou e uiga ki se fakalavelave tai faigata, kae i lō te fakaseai ne ia te fakalavelave, e tuku mai ne ia te malosi ke kufaki i ei.—Faitau te Filipi 4:13.

20. Kaia e ‵tau ei o ‵talo tatou ki a Ieova i taimi katoa?

20 Mafaga o tauliaga gali ke ‵talo atu tatou ki a Ieova! E mafai eiloa o tali‵tonu tatou me ka fakalogologo mai a ia ki a tatou. (Salamo 145:18) Kae ko te uke o taimi e ‵talo atu ei tatou ki a Ieova mai ‵tou loto, ko te malosi foki o ‵tou va fakataugasoa mo ia.