Fanatu ki te fakasologa

Fanatu ki te fakasologa o mataupu

 MATAUPU E SEFULU

Te Mea Tonu e Uiga ki Agelu mo Temoni

Te Mea Tonu e Uiga ki Agelu mo Temoni

1. Kaia e ‵tau ei o tauloto tatou e uiga ki agelu?

E MANAKO a Ieova ke iloa ne tatou tena kāiga. A agelu ne vaega o te kāiga o te Atua. E taku latou i te Tusi Tapu me ko ‘tama a te Atua.’ (Iopu 38:7) Ne a mea e fai ne agelu? Ne fesoasoani atu pefea latou ki tino i aso mua? E mata, e mafai o fesoasoani mai latou ki a tatou i aso nei?—Onoono ki te Fakamatalaga Fakaopoopo i te 8.

2. Ne o‵mai mai fea a agelu? E tokofia agelu ne faite?

2 E ‵tau o iloa ne tatou me ne o‵mai mai fea a agelu. E fai mai te Kolose 1:16 ki a tatou me mai tua o te faitega ne Ieova a Iesu, “ne faite a nisi mea katoa i te lagi mo te lalolagi.” E aofia i mea konā a agelu. E tokofia a agelu ne faite? E fai mai te Tusi Tapu me e lau i te fia selau miliona o agelu.—Salamo 103:20; Fakaasiga 5:11.

3. Se a te mea e fakaasi mai i te Iopu 38:4-7 e uiga ki agelu?

3 E akoako mai foki te Tusi Tapu ki a tatou me ne faite ne Ieova a agelu mai mua o faite ne ia te lalolagi. Ne a olotou lagonaga i te laveaga ne latou te lalolagi? E fai mai te tusi ko Iopu me ne fia‵fia malosi latou. A latou se kāiga kolā e tapuaki fakatasi atu ki a Ieova.—Iopu 38:4-7.

AGELU E FESOASOANI KI TINO O TE ATUA

4. E iloa pefea ne tatou me e fia‵fia a agelu ki tino?

4 E fia‵fia faeloa a agelu ki tino mo te fuafuaga a Ieova mō te lalolagi mo tino. (Faataoto 8:30, 31; 1 Petelu 1:11, 12) Kāti ne fanoa‵noa malosi latou i te taimi ne ‵teke atu ei a  Atamu mo Eva. Kae kāti ko sili atu nei te lotou fanoa‵noa ke ‵kilo atu ki te tokoukega o tino ko se faka‵logo ki a Ieova. Kae kafai e salamō se tino kae foki ki te Atua, e fia‵fia eiloa te kau agelu. (Luka 15:10) E fia‵fia malosi a agelu ki tino kolā e tavini atu ki te Atua. E fakaaoga ne Ieova a agelu ke fesoasoani kae puipui ne latou ana tavini i te lalolagi nei. (Epelu 1:7, 14) Ke onoono nei tatou ki nai fakaakoakoga.

“A toku Atua ne uga mai ne ia tena agelu ke ‵pono a gutu o leona.”​—Tanielu 6:22

5. Ne fesoasoani atu pefea a agelu ki tavini a te Atua i aso mua?

 5 Ne uga mai ne Ieova a agelu e tokolua ke faka‵sao a Lota mo tena kāiga i te fakaseaiga o fakai ko Sotoma mo Komolo. (Kenese 19:15, 16) E fia selau tausaga mai tua ifo, ne ‵pei te pelofeta ko Tanielu ki te lua leona, kae e seai se mea ne tupu ki a ia, me i te “Atua ne uga mai ne ia tena agelu ke ‵pono a gutu o leona.” (Tanielu 6:22) Fakamuli ifo, i te taimi ne ‵pei ei a te apositolo ko Petelu ki te falepuipui, ne uga mai ne Ieova se agelu ke fakasaoloto a ia. (Galuega 12:6-11) Ne fesoasoani atu foki a agelu ki a Iesu i te taimi ne nofo ei i te lalolagi. E pelā me se fakaakoakoga, mai tua o tena papatisoga, “ne tavini atu a agelu ki a Iesu.” (Maleko 1:13) Mai mua malie loa o tamate a Iesu, ne “fakamalosi atu a ia” ne se agelu.—Luka 22:43.

6. (a) E iloa pefea ne tatou me e fesoasoani atu a agelu ki tino o te Atua i aso nei? (e) Ne a fesili ka tali aka nei ne tatou?

6 I aso nei, ko se faka‵sae mai sāle a agelu ki tino. Kae koi fakaaoga eiloa ne te Atua a agelu ke fesoasoani atu ki ana tavini. E fai mai te Tusi Tapu: “A te agelu a Ieova e nofo i tafa o latou kolā e ma‵taku ki a Ia, kae faka‵sao ne ia latou.” (Salamo 34:7) Kaia e ma‵nako ei tatou ki se puipuiga? Me isi ne fili ma‵losi o tatou kolā e ma‵nako o fakalogo‵mae tatou. Ko oi latou? E o‵mai latou mai fea? E fakalogo‵mae pefea ne latou a tatou? Ke tali aka a fesili konā, ke onoono tatou ki mea ne ‵tupu mai tua malie o te faitega o Atamu mo Eva.

‵TOU FILI KOLĀ E SE LAVEA KI MATA

7. Ne a mea ko oti ne fai ne tino ona ko togafiti a Satani?

7 Ne tauloto tatou i te Mataupu e 3 me ne ‵teke atu se agelu ki te Atua kae manako ke pule atu a ia ki nisi tino. E taku ne te Tusi Tapu a ia ko Satani te Tiapolo. (Fakaasiga 12:9) Ne manako foki Satani ke ‵teke atu a nisi tino ki te Atua. Ne mafai o fakatogafiti ne ia a Eva, kae talu mai te taimi tenā ko oti ne fakatogafiti ne ia a te tokoukega o tino.  Kae ko nisi tino e pelā mo Apelu, Enoka mo Noa ne tumau i te fakamaoni ki a Ieova.—Epelu 11:4, 5, 7.

8. (a) Kaia ne fai ei a nisi agelu pelā me ne temoni? (e) Ne a mea ne fai ne temoni ke ‵sao latou i te Lolo?

8 I aso o Noa, ne ‵teke atu a nisi agelu kae tiaki te lotou koga ‵nofo i te lagi ke ola e pelā me ne tino i te lalolagi. Kaia? E fai mai te Tusi Tapu me ne ma‵nako latou ke fai ne olotou avaga. (Faitau te Kenese 6:2.) Kae e se ‵tau mo agelu o fai ne latou te mea tenei. (Iuta 6) E pelā mo agelu ma‵sei konā, ne faivalevale kae amio fakasaua te tokoukega o tino i te taimi tenā. Tenā ne fakaiku aka ei ne Ieova ke fakaseai atu a tino ma‵sei mai te faiga ke poko te lolo i te lalolagi kātoa. Kae ne faka‵sao ne ia ana tavini fakamaoni. (Kenese 7:17, 23) Ne ‵foki a agelu ma‵sei ki te lagi ko te mea ke ‵sao latou. Ne taku ne te Tusi Tapu a agelu ma‵sei konā ko temoni. Ne filifili latou ke ‵kau atu ki te ‵tekeatuga a Satani, kae ne fai ei te Tiapolo mo fai te lotou pule.—Mataio 9:34.

9. (a) Ne a mea ne ‵tupu ki temoni i te ‵fokiatuga ki te lagi? (e) Ne a nisi mea ka tauloto ne tatou?

9 Ona ko latou ne tino ‵teke, ne seki talia ne Ieova latou ki loto i tena kāiga. (2 Petelu 2:4) Ko se mafai nei o toe ‵fuli a temoni ke liu tino, kae koi tumau latou i te “takitaki ‵se . . . te lalolagi nofoaki kātoa.” (Fakaasiga 12:9; 1 Ioane 5:19) Ke tauloto nei tatou ki auala e fakatogafiti, io me takitaki ‵se ei ne latou a tino e tokouke.—Faitau te 2 Kolinito 2:11.

TOGAFITI A TEMONI E FAI KI TINO

10. E fakatogafiti pefea ne temoni a tino?

10 E uke auala e fakatogafiti ei ne temoni a tino. Kafai e fesokotaki atu a tino ki temoni, e mafai o fesokotaki ‵tonu atu latou ki ei io me e auala i se isi tino, pelā mo tino faivailakau io me ko tino fakamatala mea ‵tupu. A te fesokotaki atu ki temoni e taku me ne faifaiga fakatemoni io me ne faifaiga faivailakau. Kae e fakatonu mai te Tusi Tapu ki a  tatou ke faka‵mao kea‵tea mai so se mea telā e isi sena sokoga ki temoni. (Kalatia 5:19-21) Kaia? E pelā eiloa me se tino afuli manu telā e fakaaoga ne ia a matasele ke ‵poa ki ei a manu, e fakaaoga ne temoni a togafiti ke malei kae ke pule atu ki tino.—Onoono ki te Fakamatalaga Fakaopoopo i te 26.

11. Se a te fakataulaitu, kae kaia e ‵tau ei o ‵kalo kea‵tea tatou mai i ei?

11 A te togafiti e tasi a latou ko mea fakataulaitu. A te mea tenā ko te fakaaogaga o malosi fai fakaa‵tea ke iloa aka a mea ka ‵tupu i aso mai mua io me ko mea kolā e seki iloa atu. E mafai o fakaaoga ne se tino a te mea tenei mai te iloiloga o fetū, salasalaga ki fakailoga, ‵tala te lamī, milimili io me ko te faitauga o lima o tino. E mafau‵fau a tino e tokouke me e ‵lei a faifaiga konei, kae ko mea konā e se ‵lei. E fakama‵taku ‵ki. E pelā me se fakaakoakoga, e fai mai te Tusi Tapu me e ga‵lue tasi a temoni mo tino fakamatala mea ‵tupu. I te Galuega 16:16-18, e fai‵tau tatou e uiga ki “se temoni telā e ‵valo ne ia a mea ka ‵tupu” kae ne fesoasoani atu ki se tamaliki fafine ke fai “ana valoaga.” I te otiga ne uga kea‵tea ne te apositolo ko Paulo te temoni, ne galo atu foki ei te malosi o te tamaliki fafine ke ‵valo ne ia a mea ka ‵tupu.

12. (a) Kaia e fakamataku ei te taumafai o fesokotaki atu ki tino ‵mate? (e) Kaia e se ma‵nako ei a tavini a te Atua ke aofia latou i faifaiga fakatemoni?

12 E fakaaoga ne temoni se suā togafiti ke malei ei a tino. E taumafai latou o fai ke tali‵tonu tatou me e mafai o fai‵pati tatou ki tino ‵mate kae ko tino kolā ko oti ne ‵mate koi ola eiloa i se isi koga kae mafai o fesokotaki mai io me fakalogo‵mae mai ki a tatou. E pelā me se fakaakoakoga, kāti e fanatu se tino telā ko oti ne mate sena taugasoa io me se kāiga ki se tino faivailakau, telā e fai mai me e mafai ne ia o faipati ki tino ‵mate. E mafai o fai atu ne te tino faivailakau  ki te tino tenā se mea gali e uiga ki tena taugasoa io me ko tena kāiga telā ko oti ne mate io me faipati mai i te leo o te tino telā ko mate. (1 Samuelu 28:3-19) E uke a faifaiga o mate, e pelā mo ‵kaiga e fai mō te tino mate, fakamanatuga o te tausaga ne mate ei se tino, ofoatuga o taulaga ki tino ‵mate, io me ko nisi faifaiga aka, e fakavae mai te talitonuga me koi ola a tino ‵mate i se isi koga. Kafai e ita a Kelisiano ma aofia i faifaiga masani konei, e se fia‵fia a kāiga io me ko tino o te fenua ki a latou, e taku fakamasei ne latou, io me ita ma fesoasoani atu ki a latou. Kae e iloa ne Kelisiano me e seai se isi koga e ola i ei a tino ‵mate. E se mafai o fesokotaki atu ki a latou, kae e se mafai o fai ne latou se mea ki a tatou. (Salamo 115:17) Ke fakaeteete malosi koe. Ke mo a eiloa ma fesokotaki atu ki tino ‵mate io me ko temoni kae ke mo a eiloa ma aofia i faifaiga fakatemoni.—Faitau te Teutelonome 18:10, 11; Isaia 8:19.

13. Ne a mea ne mafai o fai ne tino kolā ne ola muamua mo te ma‵taku ki temoni?

13 E se ma‵nako fua a temoni ke fakatogafiti ne latou a tino kae ke fakamatakutaku atu foki ki a latou. I aso nei, e iloa ne Satani mo ana temoni me i te lotou “taimi ko toetoe” kae ko pili fua o tapale kea‵tea ne te Atua latou mai te lalolagi, tela la, ko sili atu nei te lotou fakasaua mo te lotou kaitāua i lō aso mua. (Fakaasiga 12:12, 17) Kae e lau i afe a tino kolā ne ola muamua mo te ma‵taku ki temoni ko se fai nei penā. Ne fakasaoloto pefea latou mai te lotou ‵nofo ma‵taku ki temoni?

‵TEKE ATU KAE KE SAOLOTO MAI TEMONI

14. E pelā mo Kelisiano i te senitenali muamua, e mafai pefea o saoloto tatou mai temoni?

14 E fakaasi mai i te Tusi Tapu a te auala ke ‵teke atu ki temoni mo te auala ke saoloto mai i a latou. E pelā me se fakaakoakoga, e isi ne tino i te fakai o Efeso ne fesokotaki  muamua ki temoni kae koi tuai o tauloto latou ki te munatonu. Ne saoloto pefea latou mai i ei? E fai mai te Tusi Tapu: “E tokouke a tino faivailakau ne ‵luku fakatasi olotou tusi kae ‵sunu ne latou i mua o tino katoa.” (Galuega 19:19) Ona ko te lotou ma‵nako ke fai pelā me ne Kelisiano, ne fakamasei ne latou olotou tusi katoa e uiga ki faifaiga faivailakau. E mafai foki o fai se mea penā i aso nei. A tino katoa kolā e ma‵nako ke tavini atu ki a Ieova e ‵tau o fakaseai ne latou a mea kolā e isi se lotou sokoga ki temoni. E aofia i ei ko tusi, mekesini, fakamatalaga ki te gasue‵suega o fetū, ata vitiō, pese, tafaoga ke oko ki ata ‵lasi kolā e fakafoliga mai me e ‵lei kae ‵gali a faifaiga faivailakau, temoni, io me ko ma‵losi fai fakaa‵tea. E aofia foki i ei a mea kolā e pei ne tino ke puipui ei latou mai mea ma‵sei.—1 Kolinito 10:21.

15. Ne a nisi mea e ‵tau o fai ne tatou ke ‵teke atu a Satani mo ana temoni?

15 I se fia tausaga mai tua o te fakamaseiga ne tino i Efeso olotou tusi faivailakau, ne tusi mai te apositolo ko Paulo me koi tumau eiloa latou i te “taua” atu ki “agaga ma‵sei.” (Efeso 6:12) Ao, e ui eiloa ko oti ne ‵sunu ne latou olotou tusi, koi taumafai eiloa a temoni o fakalogo‵mae latou. Tela la, ne a nisi mea e ‵tau o fai ne latou? Muna a Paulo ki a latou: “Puke ki te talita lasi o te fakatuanaki, telā ka mafai o tamate [io me, fakagata] ne koutou ki ei a matasana ‵ka a te tino masei.” (Efeso 6:16) E pelā eiloa mo te talita telā e puipui ei se sotia i te taua, e mafai ne ‵tou fakatuanaki o puipui tatou. Kafai e tali‵tonu katoatoa tatou me mafai ne Ieova o puipui tatou, ka mafai foki ne tatou o ‵teke a Satani mo ana temoni.—Mataio 17:20.

16. E fakamalosi aka pefea ne tatou te ‵tou fakatuanaki ki a Ieova?

16 E fakamalosi aka pefea ne tatou te ‵tou fakatuanaki ki a Ieova? E ‵tau o fai‵tau tatou ki te Tusi Tapu i aso katoa kae taumafai o fakalagolago faeloa ki a ia ke puipui tatou. Kafai  e malosi te ‵tou loto talitonu ki a Ieova, ka se mafai eiloa ne Satani mo ana temoni o fai se mea ki a tatou.—1 Ioane 5:5.

17. Se a te suā mea ka puipui ei tatou mai temoni?

17 Ne a nisi mea ne ‵tau o fai ne Kelisiano i Efeso? Ne ‵nofo latou i se fakai e ‵fonu i faifaiga fakatemoni. Tela la, ne fai atu a Paulo ki a latou: “Ke ‵talo faeloa koutou i taimi katoa.” (Efeso 6:18) Ne ‵tau o fakamolemole atu latou ki a Ieova ke puipui mai latou i taimi katoa. Kae pefea tatou? E ola foki tatou i se lalolagi telā e ‵fonu i faifaiga fakatemoni. Tela la, e ‵tau o fakamolemole atu tatou ki a Ieova ke puipui mai tatou, kae e ‵tau o fakaaoga ne tatou tena igoa i te taimi e ‵talo ei. (Faitau te Faataoto 18:10.) Kafai e tumau tatou i te fakamolemole atu ki a Ieova ke faka‵sao tatou mai i a Satani, ka tali mai ne Ieova ‵tou ‵talo.—Salamo 145:19; Mataio 6:13.

18, 19. (a) E mafai pefea o manumalo tatou i ‵tou taua atu ki a Satani mo ana temoni? (e) Se a te fesili ka tali aka i te suā mataupu?

18 Kafai e fakamasei ne tatou so se mea i ‵tou olaga telā e isi sena sokoga ki temoni kae fakalagolago ki a Ieova ke puipui tatou, e mafai eiloa o ‵teke atu tatou ki a Satani mo ana temoni. E se ‵tau o ma‵taku tatou i a latou. (Faitau te Iakopo 4:7, 8.) E malosi fakafia atu a Ieova i lō temoni. Ne fakasala ne ia latou i aso o Noa, kae i aso mai mua nei ka fakaseai ne ia latou. (Iuta 6) Ke masaua, me e se ko tatou fua e taua atu. E fakaaoga ne Ieova ana agelu ke puipui tatou. (2 Tupu 6:15-17) E mafai o loto tali‵tonu tatou me fakatasi mo te fesoasoani o Ieova, e mafai o manumalo tatou i ‵tou taua atu ki a Satani mo ana temoni.—1 Petelu 5:6, 7; 2 Petelu 2:9.

19 Kae kafai e māfua mai i a Satani mo ana temoni a logo‵maega e uke, kaia la ne seki fakaseai atu ei ne te Atua a latou? Ka tali aka a te fesili tenei i te suā mataupu.