Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Ko Pule Mai te Malo o te Atua!

 MATAUPU E 5

Ko Sulu Atu ne te Tupu a te Mainaga ki te Malo

Ko Sulu Atu ne te Tupu a te Mainaga ki te Malo

MANATU TĀUA O TE MATAUPU

Ko malamalama a tino o te Atua i muna‵tonu tāua e uiga ki te Malo, ana tino pule mo tino e pule ki ei, mo mea e manakogina i te alofa fakamaoni

1, 2. Se a te auala ne fai ei a Iesu mo fai te ‵toe takitaki poto?

MAFAUFAU la me e takitaki atu koe ne se takitaki masani ‵lei i se fa‵kai fakaofoofogia kae gali. E fou a te fa‵kai ki a koe mo tino kolā e olo fakatasi atu koutou, kae ko fakalogologo faka‵lei eiloa koe ki pati katoa a te takitaki masani ‵lei tenā. I nisi taimi, e fesili atu koutou mo nisi tualisi mo te fia‵fia e uiga ki nisi koga i te fa‵kai kolā e seki lavea ne koutou. Kae kafai ko fesili atu koe ki te takitaki masani ‵lei tenā, e taofi aka ne ia ana fakamatalaga ke oko ki te taimi tonu, māfai ko kamata o lavea atu a te koga tenā. Fakamuli loa, e momea aka tou ofo i tena poto, me e fai atu ne ia a mea kolā e ‵tau o iloa ne koe i te taimi tonu.

2 E ‵nofo atu a Kelisiano ‵tonu i se vaegā tulaga tai ‵pau penā mo tualisi. E tauloto eiloa tatou mo te loto finafinau e uiga ki te ‵toe fa‵kai tafasili i te gali, “telā e isi ne ana fakavae ‵tonu”​—te Malo o te Atua. (Epe. 11:10) I te taimi ne nofo mai ei a Iesu i te lalolagi, ne takitaki atu eiloa ne ia ana soko, i te taumafaiga ke maua ne latou se mainaga ‵loto e uiga ki te Malo tenā. E mata, ne tali ne ia olotou fesili katoa kae fai atu a mea katoa e uiga ki te Malo i te taimi eiloa e tasi? Ikai. Ne fai mai a ia: “E uke a mea koi fia fai atu ne au ki a koutou, kae e se mafai o malamalama koutou i ei i te taimi nei.” (Ioane 16:12) E pelā me ko te ‵toe takitaki poto, ne seki fakafi‵ta lele eiloa ne Iesu ana soko ki se mainaga telā ne seki toka latou ki ei.

3, 4. (a) Ne tumau pefea a Iesu i te akoako atu o tino fakamaoni e uiga ki te Malo o te Atua? (e) Se a te mea ka mafau‵fau tatou ki ei i te mataupu tenei?

3 Ne fai atu ne Iesu a pati i te Ioane 16:12 i te ‵toe po o tena olaga i te lalolagi. Mai tua o tena mate, ne mafai pefea o tumau a ia i te akoako atu o tino fakamaoni e uiga ki te Malo o te Atua? Ne fakatalitonu atu a ia ki ana apositolo fakamaoni e toko 11: “Ko te agaga o te munatonu, ka takitaki ne ia koutou ki mea ‵tonu katoa.” * (Ioane 16:13) E mafai o mafau‵fau tatou ki te agaga tapu e pelā me se takitaki loto pulea. A te agaga ko te auala telā e fakaaoga ne Iesu ke akoako atu ana tino i so se mea e ‵tau o iloa ne latou e uiga ki te Malo o te Atua​—i te taimi tonu telā e ‵tau o malamalama latou i ei.

4 Ke mafau‵fau nei tatou ki te auala ne takitaki ei ne te agaga tapu o Ieova a soko o Iesu ki se mainaga lasi e uiga ki te Malo tenā. Muamua la, ka mafau‵fau tatou ki te ‵tou malamalama e  uiga ki te taimi ne kamata ei o pule mai te Malo o te Atua. Ka oti, ko iloilo ei ne tatou a uiga mo fakamoemoega o tino pule mo tino ka pule atu ki ei. Fakamuli loa, ka onoono tatou ki te auala ne maua ei ne soko o Keliso se malamalama manino ki mea e aofia i te alofa fakamaoni ki te Malo.

Te Malamalama i se Tausaga Tāua ‵Ki

5, 6. (a) Se a te kilokiloga ‵se ne maua ne soko o Iesu e uiga ki te taimi ne fakatu aka ei te Malo mo te ‵katiga o saito? (e) Kaia ne seki fakamalosi aka ei ne vaegā kilokiloga ‵se penā a te fakalotolotolua me e takitaki ne Iesu ana tino io me ikai?

5 E pelā mo te mea ne lavea atu i te Mataupu e 2 o te tusi tenei, ne fakamāumāu ne Tino A‵koga i te Tusi Tapu a te fia o tausaga ke fakasino atu ki te tausaga ko te 1914 me ko te ‵toe tausaga tāua i te fakataunuga o valoaga i te Tusi Tapu. Kae i te taimi tenā, ne tali‵tonu latou me ne kamata o fakatasi mai a Keliso i te 1874, kae ne kamata o pule mai a ia i te lagi i te 1878, kae ne oti faka‵lei eiloa te fakatuakaga o te Malo i a Oketopa 1914. Ne mafau‵fau latou me ka fai te ‵katiga o saito i te va o te 1874 mo te 1914 kae ka fakaoti ki te fakamaopoopoga o te kau fakaekegina ki te lagi. E mata, ne fai ne manatu ‵se penei ke fakalotolotolua latou me e mata e takitaki ne Iesu a tino fakamaoni konā e auala i te agaga tapu?

6 Ikai, e se penā loa! Ke toe mafaufau ki te tala faka‵tusa i te kamataga. E mata, e fakaseaoga a te fakatalitonugina o te takitaki masani ‵lei tenā ne manatu fakalotolotolua mo fesili loto finafinau a tualisi? E se tāitāi eiloa! E penā foki loa, e taumafai a tino o te Atua i nisi taimi ke fakagalue aka a fakamatalaga likiliki e uiga ki te fuafuaga a Ieova a koi tuai o oko ki te taimi, ke takitaki atu ei latou ne te agaga tapu ki vaegā muna‵tonu penā. Ne loto fia‵fia a tino fakamaoni ke fakatonutonugina latou, kae ne ‵fuli eiloa olotou kilokiloga mo te loto maulalo.​—Iako. 4:6.

7. Ne a mainaga faka-te-agaga ne manuia ei a tino o te Atua?

7 I tausaga mai tua ifo o te 1919, ne fakamanuiagina a tino o te Atua ki mainaga faka-te-agaga e uke ‵ki. (Faitau te Salamo 97:11.) I te 1925, ne sae mai ei se mataupu fakaofoofogia telā e fakaulutala penei “Te Fanaumaiga o se Atufenua.” Ne tuku mai i ei a fakamaoniga ‵tonu mai te Tusi Tapu me ne fanau mai te Malo faka-Mesia i te 1914, telā ne fakataunu mai i ei se ata fakavaloaga o te fafine faka-te-lagi a te Atua e fanau, e pelā mo te mea ne fakamau i te Fakaasiga mataupu e 12. * Ne toe fakaasi mai i te mataupu me i fakasauaga mo fakalavelave kolā ne oko atu ki tino o Ieova i tausaga o taua konā ne fakailoga manino me ko oti ne ‵pei ifo a Satani mai te lagi i te taimi tenā, “kae ko oko eiloa i te kaitaua me e iloa ne ia i tena taimi ko toetoe.”​—Faka. 12:12.

8, 9. (a) Ne iloa aka pefea te tāua o te Malo o te Atua? (e) Ne a fesili ka mafau ‵fau tatou ki ei?

8 E pefea te tāua o te Malo? I te 1928, ne kamata o faka‵mafa mai ne The Watch Tower me ne tāua atu a te Malo i lō te fakaolataga totino e auala i te togiola. A te ‵tonuga loa, ka faka‵malu aka te igoa o Ieova, fakamaluga aka tena pulega, kae fakataunu ana uafuaga katoa mō tino e auala i te Malo faka-Mesia.

Ko oi ka pule fakatasi mo Keliso i te Malo tenā? Ko oi ka  pule atu ki ei a te Malo tenā? Kae se a te galuega e ‵tau o fai ne soko o Keliso?

E Fakasino Tonu Atu Eiloa te Galuega ko te ‵Katiga o Saito ki te Kau Fakaekegina

10. Se a te mea ko leva ne malamalama i ei a tino o te Atua e uiga ki te toko 144,000?

10 I te fia sefulu o tausaga mai mua o te 1914, ne iloa ne Kelisiano ‵tonu me ka pule fakatasi a soko fakamaoni e toko 144,000 o Keliso mo ia i te lagi. * Ne lavea ne Tino A‵koga i te Tusi Tapu me i te aofaki tenā se aofaki tonu kae ne kamata o filifili aka i te senitenali muamua T.A.

11. Ne gasolo aka pefea te malamalama o sui o te avaga fafine a Keliso e uiga ki te lotou galuega i te lalolagi?

11 Ne a la mea e ‵tau o fai ne sui konā o te avaga a Keliso i te taimi koi ‵nofo mai ei latou i te lalolagi? Ne iloa ne latou me ne faka‵mafa mai ne Iesu a te galuega talai kae ne ‵soko ne ia mo te taimi o te ‵katiga o saito. (Mata. 9:37; Ioa. 4:35) E pelā mo te mea ne lavea atu i te Mataupu e 2, ne mafau‵fau latou mō se taimi leva me e ‵tau o 40 tausaga te leva, kae ka fakaoti ki te fakamaopoopoga o te kau fakaekegina ki te lagi. Kae ona ko te mea ne tumau eiloa te galuega mai tua o te 40 tausaga, ne manakogina se malamalama tai manino atu. Nei la ko iloa ne tatou me ne kamata te ‵katiga o saito i te 1914. Ko te vaitaimi foki tenā ke ‵vae aka ei a saito mai mouku, ko Kelisiano fakaekegina fakamaoni mai Kelisiano ‵loi. Ko oko atu ei ki te taimi ke ‵saga tonu atu ki te fakamaopoopoga o te aofaki koi ‵toe o te potukau faka-te-lagi tenā!

A te tausaga ko te 1914 ko te kamataga o te ‵katiga o saito (Ke onoono ki te palakalafa e 11)

12, 13. Ne fakataunu pefea a tala fakatusa a Iesu e uiga ki tamafine e toko sefulu mo taleni i aso fakaoti?

12 Mai te 1919 o vau ki mua, ne tumau eiloa a Keliso i te takitakiga o te tavini tenā ke fakatāua ne ia te galuega talai. I te tukuatuga ne ia ki ana soko a fakailoga takitasi o aso fakaoti, ne fakaasi atu ne Iesu ki ana soko fakaekegina a te auala ke fakatoka ei te lotou galuega talai. (Mata. 28:19, 20) E pefea la? I tena tala fakatusa ki tamāfine e toko sefulu, ne fakaasi atu ne ia me e ‵tau o tumau a te kau fakaekegina i te matapula‵pula, mataala i te feitu faka-te-agaga, māfai e fia fakataunu ne latou te lotou fakamoemoega ke ‵kau atu ki te ‵kaiga lasi o te fakaipoipoga i te lagi, i te taimi ko ‵kau fakatasi ei a Keliso mo tena ‘tamāfine fakaipoipo’ o tino e toko 144,000. (Faka. 21:2) I tena tala fakatusa e  uiga ki taleni, ne akoako atu a Iesu me ka loto fia‵fia ana soko fakaekegina ke fakataunu te galuega talai telā ne tuku atu ne ia ke fai ne latou.​—Mata. 25:1-30.

13 Ko oti eiloa ne fakamaoni mai ne te kau fakaekegina a te lotou matapula‵pula mo te loto fia‵fia i te senitenali tenei ko teka atu. Ko fakataunu mai eiloa i ei se fakailoga tāua o aso fakaoti! Kae e mata, e fakasino atu fua a te galuega ko te ‵katigā saito lasi ki te fakamaopoopoga o pule lagolago e toko 144,000 a Keliso?

Ko Fakamaopoopo ne te Malo Ana Tino i te Lalolagi!

14, 15. Ne a potukau kese‵kese e fa kolā ne fakamatala mai i The Finished Mystery?

14 Ko leva eiloa ne fia iloa ne tāgata mo fāfine fakamaoni a te “vaitino tokouke” (“potukau lasi,” King James Version) telā ne taku mai i te Fakaasiga 7:9-14. E sē se mea fakapoi me mai mua o te taimi tonu o Keliso ke fakaasi mai me ko oi te potukau lasi tenei, a te ukega o manatu kolā ne fai atu e uiga ki te mataupu ne tai ‵seke malie mo muna‵tonu faigofie kae manino kolā ko iloa kae fakatāua malosi ne tatou i aso nei.

15 I te 1917, ne faka‵mafa mai i te tusi ko The Finished Mystery me e “lua a vaegā fakaolataga i te lagi, kae e lua foki a vaegā fakaolataga i te lalolagi.” Ko oi e aofia i potukau e fa o tino mo fakamoemoega kese‵kese konei mō te fakaolataga? Muamua la, e toko 144,000 kolā ka pule fakatasi mo Keliso. A te lua, e isi se potukau lasi o tino. I aso konā, ne fai pelā te manatu me e isi ne Kelisiano kolā koi ‵nofo atu i lotu o Fenua Kelisiano. Ne maua ne latou se fakatuanaki kae e se lava ke puke ‵mau ki te fakamaoni. Tela la, ka tuku atu se tulaga tai malalo ki a latou i te lagi. Kae i te lalolagi, ne mafaufau pelā me i te tolu o potukau, “tino tāua i aso mua”​—e pelā mo tino fakamaoni ko Apelaamo, Mose, mo nisi tino​—ka maua ne latou se tulaga maluga i lō te fa o potukau, ko te lalolagi o tino.

16. Ne a mainaga faka-te-agaga kolā ne lavea atu i te 1923 mo te 1932?

16 E takitaki atu pefea ne te agaga tapu a soko o Keliso ki te malamalama faigofie kae manino telā e fakatāua malosi ne tatou i aso nei? Ne tupu malielie eiloa, e auala i te malapulapu malie mai o mainaga faka-te-agaga. Kāti ko te kamataga o te 1923, ne fakasino atu The Watch Tower ki se potukau telā e seai se manakoga ke olo atu ki te lagi kae ka ‵nofo i te lalolagi mai lalo i te pulega a Keliso. I te 1932, ne fakamatala mai i The Watchtower a Ionatapa (Jehohandab), telā ne kau atu ki te Tupu fakaekegina a te Atua i Isalaelu, ke ‵lago atu ki a ia i te taua atu ki tapuakiga ‵se. (2 Tupu 10:15-17) Ne fai mai te mataupu me e isi se potukau o tino i aso nei e fai pelā mo Ionatapa, me e toe fai mai i ei: “Ko te potukau eiloa tenei ka takitaki atu ne te Muna a Ieova i loto i fakalavelave o Amaketo” ke ‵nofo i te lalolagi nei.

17. (a) I te 1935, se a te mainaga faka-te-agaga manino telā ne sulu tonu mai i ei? (e) Ne pokotia pefea a Kelisiano fakamaoni i te malamalama fou e uiga ki te vaitino tokouke? (Ke onoono ki te pokisi “ Se Matugā Fakatapūga Sili.”)

17 I te 1935, ne oko mai ei se mainaga lasi tafasili i te gali. I te fono telā ne fai i Washington,  D.C., ne ‵kilo atu ei ki te potukau lasi e pelā me ko te potukau i te lalolagi, e ‵pau eiloa mo mamoe i te tala fakatusa a Iesu e uiga ki mamoe mo kouti. (Mata. 25:33-40) Ka aofia te potukau tokouke i “nisi mamoe,” kolā ne fai mai penei a Iesu: “E aumai foki ne au a latou konei.” (Ioa. 10:16)  I te taimi ne fai mai penei a te failauga ko J. F. Rutherford: “Fakamolemole atu ki tino katoa kolā e maua ne latou te fakamoemoega ke ola ki te se-gata-mai i te lalolagi, ke ‵tu ki luga?” e silia atu i te āfa o te kautaina ne ‵tu ki luga! “Kiloke!” ne fai mai a ia. “Te vaitino tokouke!” Ne otia malosi eiloa a loto o tino e tokouke i te taimi ko fatoa iloa aka ei ne latou te lotou fakamoemoega mō aso mai mua.

18. Ne ‵saga fakapito atu pefea a soko o Keliso ki olotou taumafaiga i te galuega talai, kae ne a mea ne iku mai i ei?

18 Talu mai eiloa te taimi tenā, ne takitaki atu ne Keliso ana tino ke ‵saga tonu atu ki olotou taumafaiga ke fakamaopoopo mai a sui o te vaitino tokouke kolā ka ‵sao atu, ola kae tokagamalie, mai te fakalavelave lasi. Muamua la, ne foliga mai me i te fakamaopoopoga o latou konei e sē se galuega gali. Ne toe fai mai a te Taina ko Rutherford: “E foliga mai me ka se tokouke malosi a ‘te vaitino tokouke.’” E tonu, ko iloa nei ne tatou a te lasi o te fakamanuiaga a Ieova ki te ‵katiga o saito talu mai te taimi tenā o vau ki mua! Mai lalo i te takitakiga a Iesu, mo te agaga tapu, ko oti eiloa ne fai a te kau fakaekegina mo olotou taugasoa ko “nisi mamoe” e pelā mo te mea ne ‵valo mai ne Iesu​—“lafu mamoe e tasi” telā e tavini atu mai lalo i te “tausi mamoe e tokotasi.”

Ne seki mafai o iloa ne te Taina ko Rutherford a te lasi o te vaitino tokouke (Mai te feitu fakamaui ki te feitu fakaatamai: Nathan H. Knorr, Joseph F. Rutherford, mo Hayden C. Covington)

19. E mafai pefea o fai ‵tou tusaga i te fakamaopoopoga o nisi mamoe a Keliso?

19 A te tokoukega o tino fakamaoni ka ola i te lalolagi palataiso ki te se-gata-mai, telā ka pule atu ki ei a Keliso mo ana pule lagolago e toko 144,000. E a, e sē se mea ‵lei ke mafaufau ki te auala ne takitaki ei ne Keliso a tino o te Atua ki se fakamoemoega faka-te-Tusi Tapu telā e manino kae faigofie mō aso mai mua? Ko oko eiloa i te taulia o tatou ke fakaasi atu te fakamoemoega tenā ki tino kolā e fetaui mo tatou i te galuega talai! Ke na ga‵lue malosi tatou e ‵tusa mo ‵tou fakanofonofoga ko te mea ke gasolo aka faeloa o tokouke a te vaitino tokouke, kolā e momea aka faeloa te lotou paka‵laga o tavae atu ki te igoa o Ieova.​—Faitau te Luka 10:2.

Ne seki mafai o iloa ne te Taina ko Rutherford a te lasi o te vaitino tokouke

Mea e Aofia i te Alofa Fakamaoni ki te Malo

20. Ne a mea e aofia i te fakapotopotoga a Satani, kae ne pokotia pefea a te alofa fakamaoni o Kelisiano i ei?

20 I te taimi e tumau ei a tino o te Atua i te tauloto e uiga ki te Malo, ne ‵tau foki o malamalama katoatoa latou i te uiga o te alofa fakamaoni ki te pulega faka-te-lagi. Ona ko te mea tenei, i te 1922, ne fakasino atu a The Watch Tower me e lua a fakapotopotoga kolā e ga‵lue nei, ko te fakapotopotoga a Ieova mo te fakapotopotoga a Satani, telā e aofia i ei a pisinisi, lotu, mo fakapotopotoga fakapolitiki. A tino kolā e a‵lofa fakamaoni ki te Malo o te Atua mai lalo i a Keliso e se ‵tau o gutugutulua i te lotou a‵lofa fakamaoni ki te ‵kau atu i se auala ‵se ki so se vaega o te fakapotopotoga a Satani. (2 Koli. 6:17) Se a te mea e fakauiga ki ei te mea tenā?

21. (a) Ne fakailoa atu pefea ne te tavini fakamaoni ki tino o te Atua ke fakaeteete i pisinisi ‵lasi? (e) I te 1963, se a te mea ne fakaasi mai ne The Watchtower e uiga ki “Papelonia te Sili”?

21 Ko oti eiloa ne fakaasi faka‵sau mai faeloa ne mea‵kai faka-te-agaga mai te tavini fakamaoni a te ma‵sei o pisinisi ‵lasi kae ne fakailoa atu foki ki tino o te Atua ke mo a ma tosina atu latou ki tena uiga lauiloa ko te fia maumea. (Mata. 6:24) E penā foki loa te fakaasi faka‵sau atu faeloa ne ‵tou tusi a te vaega fakalotu o te fakapotopotoga a Satani. I te 1963, ne fakaasi faka‵lei mai ne The  Watchtower me e sui ne “Papelonia te Sili” a Fenua Kelisiano mo te emupaea o lotu ‵se i te lalolagi kātoa. Tela la, e pelā mo mea ka lavea faka‵lei atu i te Mataupu e 10, ko oti eiloa ne fesoasoani atu ki tino o te Atua i fenua mo tuu katoa ke “‵tele keatea mai i a ia,” mai te ‵fuluga faka‵ma o latou mai faifaiga a lotu ‵se katoa.​—Faka. 18:2, 4.

22. I te Taua Muamua a te Lalolagi, se a te malamalama ne maua ne tino o te Atua e tokouke e uiga ki te fakamalosiga i te Loma 13:1?

22 Kae e a mea fakapolitiki i te fakapotopotoga a Satani? E mata, e mafai eiloa o ‵kau atu a Kelisiano ‵tonu ki taua mo kinauga a atufenua? I te Taua Muamua a te Lalolagi, ne malamalama a Tino A‵koga i te Tusi Tapu me e se ‵tau eiloa o aofia a soko o Keliso i te tamatega o nisi tino. (Mata. 26:52) Kae ne mafau‵fau a tino e tokouke me e fakauiga loa a te fakamalosiga telā e maua i te Loma 13:1 ki te faka‵logo ki “pulega ma‵luga” me e ‵tau o ‵kau atu latou ki te kautau, ‵pei ki togiga o te sotia, kae ke tauave foki a meatau; kae kafai ko fai atu ke tamate te fili, e ‵tau fua o fana atu latou ki te ea.

23, 24. Se a te ‵tou malamalama i te Loma 13:1 i te vaitaimi o te Taua i te Lua a te Lalolagi, kae se a te fakamatalaga tai tonu atu ne takitaki atu ki ei a soko o Keliso?

23 E pelā eiloa mo te taimi ne kamata ei te Taua i te Lua a te Lalolagi i te 1939, ne fakaaoga ne The Watchtower se mataupu ‵loto e uiga ki te sē kau ki se feitu. Ne fakaasi faka‵lei mai i te mataupu me e se ‵tau lele eiloa o ‵kau atu a soko o Keliso ki taua mo kinauga a atufenua i te lalolagi a Satani. Ko oko eiloa te fetaui ‵lei o te fakatakitakiga tenā! Ne puipui ei a soko o Keliso i se auala matagā mai te pisipisia i toto telā koi masaua eiloa ne atufenua e uiga ki te taua tenā. Kae i te kamataga o te 1929, ne fakamatala mai foki i ‵tou tusi me i pule ma‵luga i te Loma 13:1 e se ko pule  o te lalolagi, kae ko Ieova mo Iesu. Koi manakogina eiloa se fakamatalaga tai tonu atu.

24 Ne takitaki atu ne te agaga tapu a soko o Keliso ki se fakamatalaga penā i te 1962, i te taimi ne ‵lomi mai ei a mataupu tāua e uiga ki te Loma 13:1-7 i lōmiga o The Watchtower i a Novema 15 mo Tesema 1. Fakamuli loa, ne malamalama a tino o te Atua i te akoakoga fakavae e uiga ki te fakalogo ‵tau telā ne fakaasi mai ne Iesu i ana pati takutakua konei: “Ke toe ‵togi atu a mea a Kaisala ki a Kaisala a ko mea a te Atua ki te Atua.” (Luka 20:25) Nei la, ko malamalama a Kelisiano ‵tonu me i pulega ma‵luga ko tino pule i te lalolagi tenei kae e ‵tau mo Kelisiano o faka‵logo ki a latou. Kae e se ‵tau o katoatoa te fakalogo tenā. Kafai e fakatonu mai a pulega ma‵luga ke se faka‵logo tatou ki a Ieova te Atua, ko tali atu ei tatou e pelā mo apositolo mua: “E ‵tau mo matou o faka‵logo ki te Atua e pelā me ko te pule i lō tāgata.” (Galu. 5:29) I te Mataupu e 13 mo te 14 o te tusi tenei, ka tauloto tatou ki mea e uke atu e uiga ki te auala ne fakagalue aka ei ne tino o te Atua a te akoakoga fakavae tenā e uiga ki te sē ‵kau ki se feitu.

Ko oko eiloa i te taulia o tatou ke fakaasi atu te fakamoemoega o te ola se-gata-mai i te Tusi Tapu!

25. Kaia e fakatāua ei ne koe a te takitakiga a te agaga tapu i te faiga ke malamalama i te Malo o te Atua?

25 Mafaufau ki mea katoa ko oti ne akoako atu ne soko o Keliso e uiga ki te Malo i te senitenali tenei ko teka. Ko oti ne iloa ne tatou a te taimi ne fakatu aka ei te Malo o te Atua i te lagi mo te tāua foki. Ko maina faka‵lei tatou i fakamoemoega e lua kolā ne tuku mai ki tino fakamaoni, te fakamoemoega ke ola i te lagi mo te lalolagi. Kae ko iloa foki ne tatou o fakaasi atu te ‵tou a‵lofa fakamaoni ki te Malo o te Atua i te taimi e fakaasi atu ei a te fakalogo ‵tau ki pulega ma‵luga. Fesili ifo ki a koe eiloa, ‘E mata, e iloa ne au a muna‵tonu tāua konā moi ne seki takitaki ne Iesu Keliso tena tavini fakamaoni i te lalolagi ke malamalama i ei kae akoako atu ne latou?’ Ko tafaga la te gali o te fakamanuiaga ke takitaki tatou ne Keliso mo te agaga tapu!

^ pala. 3 E ‵tusa mo te tusi e tasi, a te pati Eleni mō te “takitaki” i te fuaiupu tenā e fakauiga ki te “ke fakaasi atu te auala.”

^ pala. 7 Mai mua atu i ei, ne mafaufau pelā me i te fakaasiga ne fakasino atu ki se taua i te va o kau Loma fapaupau mo te lotu Katolika Loma.

^ pala. 10 I a Iuni 1880, ne fai mai te Zion’s Watch Tower me i te toko 144,000 ko tino Iutaia kolā ne ‵fuli i te 1914. Kae fakamuli ifo i te 1880, ne ‵lomi mai ei se mainaga telā ne fetaui ‵lei atu ki te mainaga telā ko oti ne puke ‵mau faeloa tatou ki ei talu mai te taimi tenā.