Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

 MATAUPU E 19

Galuega Fakatū‵tu Kolā e Fakaaloalo Atu ki a Ieova

Galuega Fakatū‵tu Kolā e Fakaaloalo Atu ki a Ieova

MANATU TĀUA O TE MATAUPU

E fai a galuega fakatū‵tu i te lalolagi kātoa mō manakoga o te Malo

1, 2. (a) Se a te mea ko leva ne fai sāle ne tavini a Ieova? (e) Se a te mea e fakatāua malosi ne Ieova?

KO LEVA ne fai sāle ne tavini a‵lofa fakamaoni a Ieova a galuega fakatū‵tu kolā e tavae atu ei ki tena igoa. E pelā mo te kau Isalaelu, ne ‵kau atu mo te loto finafinau ki te faitega o te faleie tapu kae tuku atu foki mo te kaimalie a mea fai fale ke fakaaoga ki ei.​—Eso. 35:30-35; 36:1, 4-7.

2 E se kilo a Ieova ki mea fai fale mō galuega fakatū‵tu e pelā me ko toe mea tāua kolā e avatu ei a te fakaaloalo ki a ia, io me ko toe mea tāua eiloa ki a ia. (Mata. 23:16, 17) A te mea telā e fakatāua ne Ieova, ko te meaalofa telā e fakaaloalo ei ki a ia i lō nisi mea, ko te tapuakiga telā e tuku atu ne ana tavini, e aofia i ei te lotou loto fia‵fia mo te loto finafinau i te faiga o te galuega. (Eso. 35:21; Male. 12:41-44; 1 Timo. 6:17-19) E tāua ‵ki eiloa te manatu tonu tenā. Kaia? Me e se tumau faeloa te fakaaoga ne tatou a fale konā. E pelā mo te sē toe fakaaoga ne tatou a te faleie tapu mo te faletapu. E mafai o ‵galo atu a fale konā, kae e se mafai o puli i a Ieova a te kaimalie mo te ga‵lue malosi o ana tavini a‵lofa fakamaoni kolā ne ‵lago atu ki te galuega.​—Faitau te 1 Kolinito 15:58; Epelu 6:10.

3. Se a te mea ka mafau‵fau ki ei i te mataupu tenei?

3 Ne ga‵lue malosi foki a tavini a Ieova i aso nei i te faitega o koga tapuaki. Kae ko mea kolā ko oti ne fai mai lalo i te takitakiga a te ‵tou Tupu ko Iesu Keliso e fakaofoofogia eiloa! E manino ‵lei me ne fakamanuia ne Ieova ‵tou taumafaiga. (Sala. 127:1) I te mataupu tenei, ka toe onoono tatou ki nai galuega ko oti ne fai mo te auala ne fakaaloalo atu ei ki a Ieova. Ka onoono foki tatou ki pati a nisi tino kolā ne aofia i te faiga o te galuega.

Te Faitega o Kingdom Hall

4. (a) Kaia e ma‵nako ei tatou ki koga tapuaki e uke atu? (e) Kaia ko tuku fakatasi ei a nisi ofisa lagolago? (Ke onoono ki te pokisi “ Te Faitega o Ofisa Lagolago​—Ke Fakafetaui Aka ki Manakoga Kese‵kese.”)

4 E pelā mo te mea ne fakamatala mai i te Mataupu e 16, e manako a Ieova ke maopoopo tatou mō tapuakiga. (Epe. 10:25) E se fakamalosi fua ne ‵tou fakatasiga a te ‵tou fakatuanaki kae e fakamalosi aka foki te ‵tou loto finafinau mō te galuega talai. I te fakaotiotiga o aso fakaoti konei, ne tumau eiloa a Ieova i te faiga ke vave te galuega tenā. Ne iku atu i ei ki te ua‵lolo  atu o te fia selau afe o tino ki tena fakapotopotoga i tausaga takitasi. (Isa. 60:22) Ona ko te gasolo aka o te aofaki o tino o te Malo, ko momea aka foki te manakoga mō fale ‵lomi tusi mo tusi faka-te-Tusi Tapu. E ma‵nako foki tatou ke tai uke atu ‵tou koga tapuaki.

5. Kaia e fetaui ‵lei ei te igoa ko te Kingdom Hall? (Ke onoono foki ki te pokisi “ Te Lotu o te Mainaga Fou.”)

5 I te tala fakasolopito o tino o Ieova i aso nei, ne kamata o lavea ne Tino A‵koga i te Tusi Tapu me e ‵tau eiloa o faite ne koga mo fai olotou fakatasiga. E foliga mai me i te koga muamua mō tapuakiga ne faite i West Virginia, U.S.A., i te 1890. I tausaga talu mai te 1930, ne faite io me ne faka‵fou ne tino o Ieova a hall e uke, kae ne seki maua eiloa se igoa tu ‵kese mō koga fai fakatasiga konā. Kae i te 1935, ne āsi atu a te Taina ko Rutherford ki Hawaii, telā ne faite ei se hall i tafa o te ofisa lagolago fou. I te taimi ne fesili atu ei a ia me se a te igoa e ‵tau o tuku atu ki te fale tenei, ne tali atu a te Taina ko Rutherford: “E a, e ‵lei ke fakaigoa ne tatou ki te ‘Kingdom Hall,’ me tenā eiloa te mea e fai ne tatou, ko te talaiatuga o te tala ‵lei o te Malo?” (Mata.  24:14) E seki leva kae ne fakaaoga a te igoa ‵lei tenā ki te hall kae penā foki loa mo te ukega o koga fai fakatasiga, kolā ne fakaaoga ne fakapotopotoga a Molimau a Ieova i te lalolagi kātoa.

6, 7. Se a te mea ne fai ei ke vave te faitega o Kingdom Hall?

6 I tausaga talu mai te 1970, ne gasolo fakavave aka eiloa ki luga a te manakogina o Kingdom Hall. I te ‵saga atu ki ei, ne fakatoka ne taina i te Iunaite Sitete se auala magoi ke faite fua i nai aso a Kingdom Hall ‵gali kae aoga. I te 1983, e nofo loa ki te 200 o vaegā Kingdom Hall penā ne faite i te Iunaite Sitete mo Kanata. Ke fai te galuega, ne kamata o faka‵tu ne taina a komiti fakatū‵tu o fenua. Ne galue ‵lei eiloa te auala tenei, telā ne talia faka‵lei ne te Potukau Pule i te 1986 a te fakatokaga tenā, kae i te 1987, ne faka‵tu aka ei a Komiti Fakatū‵tu i Atufenua (RBC) e 60 i te Iunaite Sitete. * I te 1992, ne fakatu aka foki a te RBC i Atinitina, Ausetalia, Falani, Siamani, Tiapani, Mekisiko, Afelika ki Saute, mo Sepania. Ke fakataunu faka‵lei te lotou galuega, e ‵tau eiloa o ‵lago atu tatou ki taina ga‵lue malosi i te faitega o Kingdom Hall mo Fale Fai Fono, me e fai eiloa te lotou galuega mo fai se vaega o te taviniga tapu.

7 Ne faka‵tu fakavave aka a Kingdom Hall ke tuku atu ei se molimau gali ki tino o te fa‵kai telā e faite i ei. E pelā mo te ulutala ne fakaaoga i se nusipepa i Sepania, “E Fakamasiki ne te Fakatuanaki a Mauga.” I te taimi ne fai mai ei ana fakamatalaga e uiga ki te faitega o se vaegā Kingdom Hall penā i te fa‵kai o Martos, ne fai mai te pepa penei: “Ne mafai pefea o tupu se mea penā i te lalolagi tenei e ‵fonu i uiga kaima‵nako, ne faima‵laga atu a volenitia mai koga kese‵kese [o Sepania] mo te  loto fia‵fia ki Martos, ko te mea ke faite se fale telā ne tulaga muamua i mea katoa i te vave, te ‵lei katoatoa, mo te fakatoka faka‵lei?” Ne tali mai ne te mataupu a te fesili i pati ne fai mai ne se Molimau volenitia: “A te pogai tāua e fakavae eiloa ki te manatu me e akoako tatou ne Ieova.”

Galuega Fakatū‵tu i Fenua Ma‵tiva

8. I te 1999, se a te polokalame fou ne talia ne te Potukau Pule, kae kaia?

8 I te fakaotiotiga o te 20 senitenali, ne ua‵lolo atu a tino ki te fakapotopotoga a Ieova i fenua ma‵tiva kolā e ‵nofo atu i ei ‵tou taina. Ne fai ne fakapotopotoga a mea e mafai ne latou o fai ke faite a koga mō fakatasiga. Kae i nisi fenua, ne ‵tau o kufaki latou i fakatauemuga mo te fakailoga tino ona ko te mea e se na lō ko ‵gali māfai e faka‵pau ki nisi koga tapuaki. Kae e kamata mai i te 1999, ne talia ne te Potukau Pule se polokalame ke fakavave aka ei te faitega o Kingdom Hall i fenua ma‵tiva. Ne mafai o “fakapaleni” aka te tulaga tenā mai tupe kolā ne maua mai i fenua mau‵mea. (Faitau te 2 Kolinito 8:13-15.) Kae ne volenitia atu a taina mo tuagane mai nisi fenua ke fesoasoani atu ki te faiga o te galuega.

9. Se a te galuega ne foliga faigatai mai, kae ne a mea ko oti ne fakataunu?

9 I te taimi muamua, ne foliga mai me ne faigata eiloa te galuega. Ne fakaasi mai ne se lipoti i te 2001 me e silia atu i te 18,300 o Kingdom Hall ne manakogina i fenua ma‵tiva e 88. Mai i te fesoasoani o te agaga o te Atua mo te ‵tou Tupu ko Iesu Keliso, ne mafai eiloa o fai a mea katoa. (Mata. 19:26) Kāti e nofo ki te 15 tausaga, mai te 1999 ki te 2013, ko oti ne faite  a Kingdom Hall e 26,849 mai te polokalame tenei. * Ne tumau eiloa a Ieova i te fakamanuia mai ki te galuega talai, me i te 2013, ne manakogina eiloa a a Kingdom Hall e 6,500 tupu ke fai i fenua konā, kae nei la, e silia atu i selau koi manakogina i tausaga takitasi.

A te faitega o Kingdom Hall i fenua ma‵tiva e tuku mai i ei a mea faiga‵ta ‵tu ‵kese

10-12. Ne fakaaloalo atu pefea a te faitega o Kingdom Hall ki te igoa o Ieova?

10 Ne fakaaloalo atu pefea a te faitega o Kingdom Hall ‵fou konā ki te igoa o Ieova? Ne fai mai se lipoti mai te ofisa lagolago i Zimbabwe: “I loto i se masina i te faitega o se Kingdom Hall fou, ne masani eiloa o tapolo a te aofaki o tino ne ‵kau atu ki fakatasiga.” I fenua e uke, e foliga mai me ne fakatalave te ‵kau mai o tino ke oko eiloa ki te taimi ne faite ei se fale ‵lei mō tapuakiga. I te taimi eiloa ne oti ei te faitega o se Kingdom Hall, e seki leva kae ‵fonu, telā ne manakogina foki ke faite a te suā hall. Kae e se ko foliga fua o te hall ne fai ei a tino ke olo atu ki a Ieova. A te alofa faka-Kelisiano tonu telā ne fakaasi atu ne tino kolā ne faite ne latou a hall konā, ne pokotia foki i ei a te kilokiloga a tino e uiga ki Tena fakapotopotoga. Mafaufau ki nai fakaakoakoga konei.

11 Indonesia. I te taimi ne iloa aka ei ne se tagata telā ne onoono sāle atu me i tino kolā e faite se Kingdom Hall ne volenitia katoa, ne fai mai tou tagata: “Ko oko eiloa i te fakaofoofogia o koutou! Ko oti eiloa ne lavea ne au a te auala e ga‵lue ei koutou katoa mo te loto kātoa i te fiafia, faitalia me e seai ne otou ‵togi. E mafaufau au me e seai eiloa se isi fakapotopotoga fakalotu e ‵pau mo koutou!”

12 Ukraine. Ne fakaiku aka ne se fafine telā ne fanatu faeloa i aso katoa, i tafa o se Kingdom Hall telā ne faite, me i tino ga‵lue ne Molimau a Ieova kae ko te fale ko te Kingdom Hall. Ne fai mai tou fafine: “Ne lagona sāle ne au a mea e uiga ki Molimau a Ieova mai i toku taina telā se Molimau. I te onoono atu ki te lotou galuega fakatūtū, ne fakaiku aka ei ne au me e manako foki au ke aofia i te kāiga faka-te-agaga tenei. Tenei eiloa te koga ne lavea ei ne au a te fakaasiga o te alofa.” Ne talia ne te fafine tenei ke fai sena akoga faka-te-Tusi Tapu kae ne papatiso i te 2010.

13, 14. (a) Ne a mea ko oti ne tauloto ne tatou mai i lagonaga o se tauavaga i te otiga ne onoono sāle ki te faitega o se Kingdom Hall? (e) E mafai pefea o fesoasoani atu koe ki te otou koga tapuaki ke fakamautinoa aka me e avatu i ei a te fakaaloalo ki te igoa o Ieova?

13 Atinitina. Ne olo atu se tauavaga ki te taina telā ne tausi ne ia te galuega fakatūtū o se Kingdom Hall. Ne fai atu te avaga tagata, “Ne onoono faka‵lei eiloa māua ki te faiga o te otou galuega, kae . . . ne fakaiku aka me fia tauloto māua e uiga ki te Atua i te fale tenei.” Ne fesili atu ei penei, “Ne a mea e ‵tau o fai ke mafai ei o ‵kau mai māua ki fakatasiga i konei?” Ne talia ne te tauavaga ke fai se akoga faka-te-Tusi Tapu, māfai fua e aofia i ei a te kāiga kātoa. Ne talia mo te fia‵fia ne taina a te manakoga tenei.

14 Kāti ne seki maua ne koe te tauliaga tenei ke fesoasoani atu i te faitega o se Kingdom Hall telā e kau atu koe ki ei, kae koi uke eiloa a mea e mafai o fai ne koe, ke fesoasoani atu ki te  koga fai tapuakiga a te otou fakapotopotoga, ke fakaaloalo atu ki te igoa o Ieova. E mafai ne koe o ‵kami atu mo te loto finafinau au akoga faka-te-Tusi Tapu, toe asiga, mo nisi tino ke ‵kau mai ki fakatasiga i te Kingdom Hall. E maua foki ne koe a te avanoaga ke fesoasoani atu i te ‵fuluga mo te tausiga o te otou koga fai tapuakiga. Mai te faiga o fakatokatokaga ‵lei, e mafai ei o fesoasoani atu koe ki te tausiga o te Kingdom Hall telā e kau atu koe ki ei io me ko te faitega o koga tapuaki i nisi vaega o te lalolagi. (Faitau te 1 Kolinito 16:2.) E tuku atu foki ne galuega konei a tavaega ki te igoa o Ieova.

“Ka ‵Kau Fakatasi Mai” a Tino Ga‵lue mo te Loto Fiafia

15-17. (a) Ko oi e fai ne latou te lasiga o galuega fakatū‵tu? (e) Ne a mea ko oti ne tauloto ne koe mai i pati a tauavaga kolā ne ga‵lue i galuega fakatū‵tu?

15 A te ukega o galuega kolā e fai i te faitega o Kingdom Hall, Fale Fai Fono, mo ofisa lagolago e fai ne taina mo tuagane i fakapotopotoga. E masani sāle o fesoasoani atu ki a latou a taina mo tuagane mai i nisi fenua kolā e isi ne olotou atamai i te fakatū‵tu. Ko oti eiloa ne fakatoka ne nisi volenitia olotou olaga ko te mea ke mafai o olo atu latou ki fenua o fesoasoani i se galuega mō nai vaiaso. Ne fakaavanoa ne nisi a latou eiloa ke tavini atu mō tausaga e uke, kae olo atu mai te galuega fakatūtū e tasi ki te suā galuega.

Timo mo Lina Lappalainen (Ke onoono ki te palakalafa e 16)

16 E tuku mai ne galuega fakatū‵tu a tulaga faiga‵ta kae tuku mai i ei a taui fakafia‵fia. E pelā mo Timo mo Lina, ne faima‵laga atu lāua ki fenua i Asia, Eulopa, mo Amelika ki Saute ke ga‵lue i galuega fakatū‵tu o Kingdom Hall, Fale Fai Fono, mo ofisa lagolago. E fai mai a Timo, “Ne fulifuli faeloa taku galuega i takilua tausaga mō tausaga e 30 ko ‵teka atu.” E fai mai a Lina telā ko oti ne avaga mo Timo mō tausaga e 25, “Ko oti eiloa ne tavini fakatasi atu māua mo Timo i fenua kese‵kese e sefulu. E manakogina eiloa a te malosi mo taimi e uke ke fakamasani ki  mea‵kai fou, tau-o-aso ‵fou, ‵gana fou, mo se koga fou ke talai atu i ei kae fai foki ne taugasoa ‵fou.” * E mata, ne aoga eiloa a taumafaiga konā? “A mea faiga‵ta,” ko muna a Lina, “ne iku atu ki ma toe fakamanuiaga sili eiloa. Ne lagona eiloa ne māua a te alofa mo te uiga talimālō faka-Kelisiano kae lagona foki a te alofa atafai o Ieova ki a māua. Ko oti foki ne lavea ne māua a te fakataunuga o te folafolaga a Iesu ki ana soko, telā ne fakamau i te Maleko 10:​29, 30. Ko oti eiloa ne maua fakaselau taimi ne māua a taina, tuagane, mo mātua faka-te-agaga.” E fai mai a Timo, “E maua ei a te lotomalie sili ke fakaaoga ‵tou atamai mō toe mea tāua, kae ‵kau atu ki te fakalauefaatuga o mea a te Tupu.”

17 A Darren mo Sala, kolā ne fesoasoani atu ki galuega fakatū‵tu i Afelika, Asia, mo Amelika ki te Kogaloto, Eulopa, Amelika ki Saute, mo te Pasefika ki Saute, ne mafau‵fau me ne maua ne lāua a mea e uke atu i lō mea ne tuku atu ne lāua. Faitalia a tulaga faiga‵ta ne fe‵paki mo lāua, ne fai mai a Darren: “Se tauliaga eiloa ke ga‵lue fakatasi mo taina mai koga kese‵kese o te lalolagi. Ne lavea ne au me i te alofa ne fakaasi atu ne māua ki a Ieova e pelā me se filo telā e ‵tui fakatamilo i te lalolagi kae fai ei ke ‵kau fakatasi a tatou katoa.” E fai mai a Sala: “Ne uke ‵ki eiloa aku mea ne tauloto mai i tuu kese‵kese a taina mo tuagane! A te lavea atu o te lotou fa‵ki i tulaga faiga‵ta ko te mea ke tavini atu latou ki a Ieova, e fakamalosi mai ke tumau eiloa au i te tuku atu o te ‵toe mea ‵lei.”

18. Ko fakataunu nei pefea a te valoaga telā ne fakamau i te Salamo 110:1-3?

18 Ne ‵valo mai ne te tupu ko Tavita me faitalia a tulaga faiga‵ta e fe‵paki mo tino o te Malo o te Atua, ka “‵kau fakatasi mai” latou mo te loto fia‵fia ke tavini atu mō manakoga o te Malo. (Faitau te Salamo 110:1-3.) E ‵lago atu eiloa ki te Malo a tino katoa kolā e ‵kau atu ki te fakataunuga o pati fakavaloaga konā. (1 Koli. 3:9) A te uke o ofisa lagolago, te fia selau o Fale Fai Fono, mo te fia sefulu afe o Kingdom Hall i te lalolagi kātoa e tuku mai i ei a fakamaoniga mautinoa, me i te Malo o te Atua se pulega tonu kae ko pule mai nei. Ko oko eiloa i te ‵tou taulia ke tavini atu ki te Tupu ko Iesu Keliso, i se galuega telā e avatu ei a te fakaaloalo e ‵tau o maua ne Ieova!

^ pala. 6 I te 2013, e silia atu i te toko 230,000 o volenitia ne talia ke ga‵lue fakatasi mo RBC e 132 i te Iunaite Sitete. I te fenua tenā, e ga‵lue fakatasi a komiti konā i te tausaga i te faitega o Kingdom Hall e nofo ki te 75 kae ne fesoasoani atu foki i te faka‵fouga io me ko te faitega o koga ma‵sei o hall kāti e 900.

^ pala. 9 E se aofia i te aofaki tenei a nai Kingdom Hall kolā ne faite i nisi fenua kolā e se aofia i te polokalame tenei.

^ pala. 16 E fakamāumāu ne taina kolā ga‵lue i galuega fakatū‵tu a te lasiga o olotou taimi ke fesoasoani atu ki galuega fakatū‵tu, kae e ‵lago atu foki latou ki fakapotopotoga i te galuega talai i te fakaotiga o te vaiaso io me ko fakaafiafi.