Fanatu ki te fakasologa

Fanatu ki te fakasologa o mataupu

 VAEGA I TE 5

Ke Tausi te Filemu mo Ou Kāiga

Ke Tausi te Filemu mo Ou Kāiga

“Ke fakapei ki luga i a koutou a te alofa atafai, . . . te loto maulalo, te agamalu mo te kufaki.”—Kolose 3:12

E māfua mai i te avaga a kāiga ‵fou. Faitalia me ka alofa faeloa kae āva koe ki ou mātua, ko fai eiloa nei tau avaga mo fai te ‵toe tino tāua ki a koe i te lalolagi. E mafai o faigata ke talia ne ou kāiga a te mea tenei. Kae e mafai o fesoasoani mai a akoakoga fakavae i te Tusi Tapu ke paleni ‵lei au mea e fai, ko te mea ke fakatumau te filemu mo ou kāiga, i te taimi e galue malosi ei koe o ati aka a fesokotakiga i tou kāiga fou.

 1 KE TUMAU I SE KILOKILOGA ‵LEI KI OU KĀIGA

FAKAMATALAGA MAI TE TUSI TAPU: “Āva ki tou tamana mo tou mātua.” (Efeso 6:2) Faitalia tou matua, e ‵tau faeloa o fakaaloalo kae āva koe ki ou mātua. E ‵tau o talia ne koe te manatu me e ‵tau foki o saga atu tau avaga, e pelā me se tama, ki ana mātua. “E se loto masei te alofa,” tela la, ke mo a ma manavase koe ki te fesokotakiga o tau avaga mo ana kāiga.—1 Kolinito 13:4; Kalatia 5:26.

MEA E MAFAI NE KOE O FAI:

  • ‵Kalo keatea mai i fakamatalaga fakalasi‵lasi, e pelā mo te “E fakaseaoga faeloa ne koe oku kāiga” io me “E se fiafia lele eiloa tou mātua ki aku mea e fai”

  • Taumafai ke maua ne koe te kilokiloga a tau avaga

 2 FAI TE MEA E ‵TAU O FAI MĀFAI KO MANAKOGINA

FAKAMATALAGA MAI TE TUSI TAPU: “E tiakina ei ne te tagata tena tamana mo tena matua kae nofo fakatasi mo te fafine, telā ko tasi ei lāua.” (Kenese 2:24) Kafai ko avaga koe, koi mafau‵fau eiloa ou mātua me i a koe ko te lā tiute, kae kāti e ma‵nako ke aofia lāua i mea e uke atu i tou olaga avaga i lō te mea e ‵tau o fai ne lāua.

E pule koulua mo tau avaga i tapula kolā ka fai ne koulua kae ke fakaasi atu mo te alofa ki a lāua. E mafai eiloa o faipati ‵tonu atu koe e aunoa mo te fakamaualuga. (Faataoto 15:1) A te loto maulalo, agamalu, mo te fa‵ki ka fesoasoani atu ke ati aka se fesokotakiga alofa mo ou kāiga kae tumau i te “fakatau fa‵ki koutou i otou mea ‵se i te alofa.”—Efeso 4:2.

MEA E MAFAI NE KOE O FAI:

  • Kafai e manavase koe ki te aofia o tou kāiga i tou olaga, ke sau‵tala ki ei mo tau avaga māfai ko tai filemu a mea katoa

  • Fakaiku aka fakatasi ne koulua te auala ke fakafesagai atu ei koulua ki mea konei