Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

E Mafai Eiloa o Fiafia Tou Kāiga

 VAEGA I TE 4

Ke Fakaaoga Faka‵lei a Tupe

Ke Fakaaoga Faka‵lei a Tupe

“Salasala ki manatu fakatonutonu ‵lei kae manuia koutou.”—Faataoto 20:18

E ma‵nako tatou katoa ki tupe ke tausi ‵tou kāiga mo mea e ma‵nako tatou ki ei. (Faataoto 30:8) A te ‵tonuga loa, ‘a te tupe e mafai o fai ne ia te olaga ke tokagamalie.’ (Failauga 7:12) E pelā me se tauavaga, e mafai o faigata ke sau‵tala e uiga ki tupe, kae ke mo a ma talia ne koe a tupe ke fakalavelave atu ki te lū avaga. (Efeso 4:32) E ‵tau o maua te loto talitonu o te tauavaga, te suā tino ki te suā tino, kae ga‵lue fakatasi ki te fakaikuga o mea ka fakamāumāu ki ei a tupe.

 1 KE PALENI FAKA‵LEI

FAKAMATALAGA MAI TE TUSI TAPU: “Ko oi te tino i a koutou e manako o fakatu se taoa kae e se nofo muamua ki lalo o galue tena ‵togi, ke iloa aka me e lava ana tupe ke fakaoti tena galuega?” (Luka 14:28) Se mea tāua ke palani fakatasi ne koulua a te fakaaogaga o lū tupe. (Amosa 3:3) Fakaiku aka a mea e manakogina ke ‵togi mo te aofaki e mafai o fakamāumāu ne koulua. (Faataoto 31:16) E se fakauiga loa me kafai e isi ne lū tupe mo ‵togi se mea, e ‵tau eiloa o fakaaoga ne koulua. Taumafai ke mo a ma ‵nofo kaitalafu koulua. Ke fakaaoga fua a tupe kolā e maua ne koulua.—Faataoto 21:5; 22:7.

MEA E MAFAI NE KOE O FAI:

  • Kafai e isi ne lū tupe ‵toe i te fakaotiga o te masina, ke fakaiku fakatasi aka ne koulua me ne a lū mea ka fai ki ei

  • Kafai ko tō siliga lū tupe ne fakamāumāu, ke fai ne fakatokaga mautinoa ke fakamu‵tana ifo lū tupe fakamāumāu. E pelā mo te kuka ne koulua lū meakai i lō te olo atu o ‵kai i fale‵kai

 2 KE FAKALOGOLOGO FAKA‵LEI KI MANATU KAE KE PALENI ‵LEI

FAKAMATALAGA MAI TE TUSI TAPU: “Me e tausi ne matou a mea katoa mo te fakamaoni, e se gata fua i mua o Ieova, kae e pelā foki i mua o tino katoa.” (2 Kolinito 8:21) Ke fakaasi ‵tonu atu ki tau avaga a te uke o au tupe e maua kae fakamāumāu.

Ke faipati atu faeloa ki tau avaga māfai ko fai a fakaikuga ‵lasi e uiga ki lū tupe. (Faataoto 13:10) A te faiga o fesokotakiga e uiga ki tupe ka fesoasoani atu ke fakatumau te filemu i te lū avaga. Ke ‵kilo atu ki lū tupe e pelā me ne tupe a te kāiga, kae e se i a se tino e tokotasi.—1 Timoteo 5:8.

MEA E MAFAI NE KOE O FAI:

  • Ke fakaiku aka ne koulua se aofaki telā e mafai o fakamāumāu ne koulua e aunoa mo te fanoi atu ki te suā tino

  • Sa faka‵tali ke isi se fakalavelave kae fatoa fai‵pati koulua e uiga ki tupe