Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

 VAEGA I TE 6

E ‵Fuli ne te Pepe a te Olaga o te Tauavaga

E ‵Fuli ne te Pepe a te Olaga o te Tauavaga

“A tamaliki ne meaalofa mai te Aliki [ko Ieova].”—Salamo 127:3

A te fanau mai o se pepe e mafai o fai mo fai se mea fakafiafia kae faigata foki ki se tauavaga. E pelā me se mātua fou, e mafai o ofo koe me i te ukega o ou taimi mo te malosi ka fakaaoga ki te tausiga o tau pepe. E mafai eiloa o pokotia te lū fesokotakiga fakatauavaga ona ko te sē lava o te moe mo te fulifuli foki o lagonaga. E ‵tau eiloa o fai ne koulua mo tau avaga a fakamafulifuliga ke tausi atu ki te pepe kae ke fakatumau foki te lū va fakatauavaga. E mafai pefea o fesoasoani atu a fakatakitakiga i te Tusi Tapu i te auala e fakafesagai atu ei koe ki tulaga faiga‵ta konei?

 1 KE MALAMALAMA I TE AUALA E ‵FULI EI NE SE PEPE TOU OLAGA

FAKAMATALAGA MAI TE TUSI TAPU: “A te alofa e kufaki kae kaimalie.” A te alofa foki “e se salasala ki mea mō tena ‵lei eiloa, e se kaitaua vave.” (1 Kolinito 13:4, 5) E pelā me se mātua fou, se mea masani ke saga tonu atu koe ki tau pepe. Kae e mafai o mafaufau tau avaga me i a koe ko se fia saga atu ki a ia, tela la, ke mo a ma puli i a koe me e manako foki tau avaga tagata ke saga atu koe ki a ia. Mai te kufaki mo te kaimalie, e mafai o fesoasoani atu koe me e manakogina foki ne koe a ia, kae ke aofia foki a ia i te tausiga o te lū tama.

“A koutou e tāgata, ke tumau koutou i te ‵nofo fakatasi penā mo otou avaga i te loto malamalama.” (1 Petelu 3:7) Ke malamalama me ka fakamāumāu ne tau avaga a te lasiga o tena malosi ki te lū pepe. E isi ne ana tiute ‵fou kae e mafai o fi‵ta, gafuia, io me loto mafatia tou fafine. I nisi taimi, kāti e mafai o ita tou fafine ki a koe, kae taumafai ke se kaitaua, me “e sili atu te tino loto kufaki i lō te tino takutakua.” (Faataoto 16:32) Ke fakaasi atu te loto malamalama, kae ke fesoasoani atu māfai e manako ki se fesoasoani.—Faataoto 14:29.

MEA E MAFAI NE KOE O FAI:

  • Tamana: Fesoasoani atu ki tau avaga i te tausiga o te pepe, ke oko foki loa ki po. Sa tō fakamāumāu a taimi e uke ki nisi mea ko te mea ke uke atu ou taimi e fakamāumāu mo tau avaga mo te lū pepe

  • Mātua: Kafai e fia fesoasoani atu tau avaga i te tausiga o te pepe, ke talia tena fesoasoani. Kafai e se ‵lei katoatoa te faiga ne ia, sa fakamasei atu kae ke fakaasi atu mo te atafai a te auala ke fai ei

 2 FAKAMALOSI AKA TE LŪ FESOKOTAKIGA FAKATAUAVAGA

FAKAMATALAGA MAI TE TUSI TAPU: “Ko tasi ei lāua.” (Kenese 2:24) E tiga eiloa ko isi se tino fou ki te lū kaiga, masaua me i a koulua mo tau avaga “ko tasi.” Ke fai so se mea ke fakatumau ei te malosi o te lū fesokotakiga.

A‵vaga fāfine, ke loto fiafia ki te fesoasoani o tau avaga. A fakaasiga o tou loto fakafetai “e mafai o fakasao ne ia te tino.” (Faataoto 12:18) A‵vaga tāgata, ke fai atu ki tau avaga a te lasi o tou alofa mo te fakatāua ne koe a ia. Ke tavae atu ki te auala e tausi ei ne ia a te kāiga.—Faataoto 31:10, 28.

“Ke se ‵sala atu a tino taki tokotasi ki tena ‵lei eiloa, kae mō te ‵lei o te suā tino.” (1 Kolinito 10:24) Ke fai faeloa te ‵toe mea ‵lei mō tau avaga. E pelā me se tauavaga, ke fakaaoga faeloa a taimi ke sau‵tala, ke fakatau fakamālō, kae fakalogologo atu te suā tino ki te suā tino. Ke mo a ma fakaasi atu a uiga kaimanako māfai ko oko atu ki faifaiga fakatauavaga. Mafaufau ki manakoga o tau avaga. E fai mai te Tusi Tapu: “Ke mo a ma se amanaia te suā tino ki te suā tino, seiloga ko lotoma‵lie koulua ke se fai penā.” (1 Kolinito 7:3-5) Tela la, ke sau‵tala mo te fakamaoni ki te mataupu tenei i a koulua eiloa. A tou kufaki mo te malamalama ka fakamalosi aka ei te lū fesokotakiga.

MEA E MAFAI NE KOE O FAI:

  • Sa puli ke na fakaaoga a taimi mō koulua eiloa

  • Ke fai fakatasi a tamā mea kolā e lagona ei ne tau avaga me e alofagina a ia, e pelā mo te tusi atu o se tamā tusi io me e avatu se tamā meaalofa

 3 KE FAKAAKOAKO TAU TAMA

FAKAMATALAGA MAI TE TUSI TAPU: “Me e iloa ne koe a tusitusiga tapu mai tau folikiga, kolā e fai ei ke poto koe e uiga ki te fakaolataga.” (2 Timoteo 3:15) Ke fakatoka faka‵lei a mea ka akoako ne koe tau tama ki ei. E maua ne ia se atamai fakaofoofogia ke tauloto, kae koi tuai foki eiloa o fanau mai. I te taimi koi nofo ei i te manava, e mafai o iloa ne tau pepe a tou leo kae saga vave atu ki ou lagonaga. Ke faitau ki ei i te taimi koi pepe ei. E tiga eiloa e se malamalama a ia i mea e faitau atu ne koe, e mafai o fesoasoani atu ke fiafia ki te faitau māfai ko matua a ia.

E se tō foliki tau pepe ke fakalogo i te taimi e faipati ei koe e uiga ki te Atua. Ka fakalogologo eiloa a ia i te taimi e ‵talo atu ei koe ki a Ieova. (Teutelonome 11:19) Kafai foki loa e ta‵fao fakatasi koulua, faipati atu ki a ia e uiga ki mea ne faite ne te Atua. (Salamo 78:3, 4) I te taimi ko gasolo aka o matua, ka iloa ne ia tou alofa ki a Ieova kae ka akoako foki ei a ia ke alofa ki a Ia.

MEA E MAFAI NE KOE O FAI:

  • Ke ‵talo fakapito atu mō te poto ke akoako tau pepe

  • Ke fakafokifoki atu a pati mo manatu tāua ki tau pepe ko te mea ke kamata o tauloto kae koi foliki