Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tali ki Fesili e 10 a Talavou

 MATAUPU E 4

E Faka‵tonu Aka Pefea ne Au Aku Mea ‵Se?

E Faka‵tonu Aka Pefea ne Au Aku Mea ‵Se?

TE POGAI E TĀUA EI

Me i te taku ‵tonu atu o mea ‵se ka fai ei koe mo fai se tino telā ka saga tonu atu ki ou tiute kae fakatalitonugina foki.

NE A AU MEA KA FAI?

Mafaufau ki te tulaga tenei: I te taimi e ta‵fao ei mo ana taugasoa, ne pei atu ne Timu a te pōlo kae mafā ei te famalama i te fale o te tuakoi.

Moi fai koe ko Timu, ne a au mea ka fai?

TU KAE MAFAUFAU!

E TOLU A MEA E MAFAI O FAI NE KOE:

  1. A. Tele.

  2. E. ‵Losi atu ki te suā tino.

  3. I. Fai atu ki te tuakoi a te mea ne tupu, kae fai atu ke ‵togi ne koe a fakamaseiga ki ei.

E mafai o tofotofogina koe ke filifili aka te Auala A. Kae e isi faeloa ne pogai ‵lei ke taku ‵tonu atu au mea ‵se—faitalia me ko te mafāga o te famalama io me se isi mea aka.

 POGAI E TOLU KE TAKU ‵TONU ATU AU MEA ‵SE

  1. Ko te mea tonu eiloa e ‵tau o fai.

    E fai mai te Tusi Tapu: “E ma‵nako eiloa matou ke fakamaoni matou i mea katoa kolā e fai ne matou.”—Epelu 13:18.

  2. E sili atu te fakamagalo ne tino a latou kolā e taku ‵tonu atu olotou mea ‵se.

    E fai mai te Tusi Tapu: “E se mafai koe o manuia i te olaga nei manafai e taumafai faeloa koe o ‵funa au agasala. Fakaasi au agasala, kae sa toe fai, kae ka alofa atu te Atua ki a koe.”—Faataoto 28:13.

  3. E sili atu i te tāua kae e fakafiafia atu ki te Atua.

    E fai mai te Tusi Tapu: “Me i te Aliki e takalialia ki tino fai amioga ma‵sei, kae e fiafia ki tino amio‵tonu.”—Faataoto 3:32.

A Kolina, telā ko 20, ne taumafai o ‵funa ne ia a te lisiti o taku sala mō te fakateletele makini mai tena tamana. Kae ne seki mafai ne ia o ‵funa aka ki te se-gata-mai. “Kāti mai tua o se tausaga,” e fai mai a Kolina, “ne lavea ne toku tamana se lisiti o taku sala mō te fakateletele makini e tusi ei toku igoa. Ne fakasala eiloa au i ei!”

Se a te akoakoga? E fai mai a Kolina: “A te ‵funaga o mea, e fai fua i ei ke momea aka te masei o te tulaga tenā. Ka logo‵mae fakamuli eiloa koe i ei!”

KE TAULOTO MAI I AU MEA ‵SE

E fai mai te Tusi Tapu: “Me i a tatou katoa e ‵siga i taimi e uke.” (Iakopo 3:2) Kae e pelā mo te mea ne lavea atu, a te taku ‵tonu atu o au mea ‵se e fai mo fai se fakailoga o te loto maulalo mo te matua ‵lei—kae ke taku ‵tonu atu fakavave.

A te suā auala ke tauloto mai i au mea ‵se. E fai mai se tamaliki fafine e igoa ki a Veni: “E taumafai au ke kilo atu ki mea ‵se takitasi e pelā me se auala ke tauloto mai i ei kae fakaaoga te akoakoga i ei ke momea aka toku ‵lei kae fakafesagai atu ki ei i te suā taimi i se auala tai ‵kese.” Ke onoono aka tatou ki te auala e mafai ne koe o fai te mea tenā.

E seki pāsi koe i te sukega ona ko te mea ne seki tauloto koe ki ei. Se a tau mea ka fai?

  • ‵Losi atu ki te sukega.

  • Talia te pogai mō tou sē pāsi.

  • Fai atu me e isi se mea e se fiafia ei tou faiakoga ki a koe.

Ne fakaaoga ne koe te pasika a tou tamana kae ko masei i a koe. Se a tau mea ka fai?

  • Sa fakaasi atu kae fakamoemoe ke se lavea ne tou tamana.

  • Fai ‵tonu atu ki tou tamana a te mea ne tupu.

  • Fai atu ki tou tamana a te mea ne tupu kae ‵losi atu ki te suā tino.

A te mafaufau faeloa ki mea ‵se i aso mua e pelā mo te ‵pula ‵toka atu ki te kilo telā e fakasaga ki tua i te taimi e fakatele atu ei te motoka

 Ke toe mafaufau muamua ki tulaga konā kae taumafai o fakaataata i tou mafaufau me i a koe ko (1) tou tamana (2) tou faiakoga. Ne a mafaufauga o tou tamana mo tou faiakoga māfai e taku ‵tonu atu ne koe au mea ‵se? Ne a lā mafaufauga māfai e ‵funa aka ne koe au mea ‵se?

Nei la, mafaufau e uiga ki se mea ‵se ne fai ne koe i te tausaga ko teka kae tali mai a fesili konei. Se a te mea ‵se? Ne fakafesagai atu koe pefea ki ei?

  • Ne ‵funa aka ne au.

  • Ne ‵losi atu ne au ki se isi tino.

  • Ne taku ‵tonu atu eiloa ne au.

Kafai ne seki taku ‵tonu atu ne koe tau mea ‵se, ne a ou lagonaga e uiga ki ei?

  • Fiafia ‵ki—ne sao au mai i ei!

  • Ma‵sei oku lagonaga—ne ‵tau eiloa o fai atu ne au te mea tonu.

Ne ‵tau o fakafesagai atu pefea koe ki ei i se auala telā e tai ‵lei atu?

Ne a au mea ne tauloto mai i au mea ‵se?

SE A TAU FAKA‵TAU?

Kaia e taofi aka ei ne nisi tino a te ‵taku tonu atu olotou mea ‵se?

Ne a mafaufauga o tino e uiga ki a koe māfai e taumafai faeloa koe o ‵funa aka au mea ‵se kae ne a olotou mafaufauga e uiga ki a koe māfai e taku ‵tonu atu au mea ‵se?—Luka 16:10.