Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tali ki Fesili e 10 a Talavou

 MATAUPU E 10

E Fesoasoani Mai Pefea te Tusi Tapu?

E Fesoasoani Mai Pefea te Tusi Tapu?

TE POGAI E TĀUA EI

E fai mai te Tusi Tapu me i “Tusitusiga Tapu katoa ne māfua mai i te Atua.” (2 Timoteo 3:16) Kafai e tonu te mea tenei, ko mafai ei o tuku atu ne te Tusi Tapu a te takitakiga e manakogina ne koe.

NE A AU MEA KA FAI?

Mafaufau ki te tulaga tenei: E fakatele atu ne Tavita tena motoka i se koga telā e seai eiloa se mea e masani a ia ki ei. E fakaasi mai ne igoa mo fakailoga o auala me e seki fanatu tou tagata i koga kolā ne ‵tau o fanatu a ia i ei. Ne iloa aka ei ne Tavita me ko ‵se tena auala. Kāti ne ‵pale a ia i se koga ‵se i te taimi o tena malaga.

Moi fai koe ko Tavita, ne a au mea ka fai?

TU KAE MAFAUFAU!

E uke a auala e mafai o filifili aka ne koe:

  1. A. Fesili atu mō takitakiga.

  2. E. Onoono ki se mape io me fakaaoga a te GPS (se tamā masini telā e mafai o fakaasi atu ne ia tou auala.)

  3. I. Ke fakatele atu eiloa mo te fakamoemoega me ka maua ne koe te auala tonu.

A te ‵tonuga loa, a te auala I ko te ‵toe auala sē magoi.

A te auala E e tai ‵lei atu i te mea muamua. E tonu, e mafai o fesoasoani atu a te mape io me se GPS ki a koe i te malaga kātoa, telā e fesoasoani ke takitaki atu koe i te auala tonu.

E mafai o fesoasoani atu te Tusi Tapu ki a koe i se auala tai ‵pau!

A te ‵toe tusi lauiloa eiloa tenei e mafai o

  • takitaki ne ia koe i loto i fakalavelave o te olaga

  • fesoasoani atu ke iloilo ifo ki a koe kae fai mo fai se tino tai ‵lei atu

  • fakaasi atu ne ia a te auala ke maua te ‵toe olaga ‵lei

 TALI KI TOE FESILI TĀUA I TE OLAGA

I te taimi eiloa e fai‵pati tatou, e ‵sili atu ne tatou a fesili.

  • Kaia e ‵lanu moana ei a te lagi?

  • Ne faite pefea a fetu?

Fakamuli ifo e toe kamata o ‵sili atu ne tatou a fesili e uiga ki mea ‵tupu i te lalolagi.

Kae e a māfai ko leva eiloa ne maua a tali i te Tusi Tapu?

E fai mai a tino e tokouke, e ‵fonu a te Tusi Tapu i tala ‵kai mo tala sē ‵tonu, ko seai sena aoga, io me ko tō faigata ke malamalama i ei. Kae e mata, a te fakalavelave ko te Tusi Tapu io me ko mea fua kolā e fakaiku aka ne tino e uiga ki te Tusi Tapu? E mata, ne faka‵segina latou?

E mafau‵fau a tino me e fai mai te Tusi Tapu i te Atua ko te pule o te lalolagi. Kae e mafai pefea o tonu te manatu tenā? Ko se mafai o pule faka‵lei atu ki te lalolagi tenei. Ko ‵fonu eiloa i puapuaga mo logo‵maega, masaki mo te mate, te mativa mo fakalavelave ‵tupu. E mafai pefea o ‵losi atu ki se Atua alofa mō mea katoa konei?

E fia iloa ne koe te tali? E mafai eiloa o ofo koe i pati a te Tusi Tapu e uiga ki te pule o te lalolagi!

Kāti e mafai o iloa ne koe me i fakatakitakiga e maua i te polosiua tenei e fakavae eiloa ki te Tusi Tapu. E tali‵tonu eiloa a Molimau a Ieova me i te Tusi Tapu se tusi telā e fakatalitonugina a fakatakitakiga i ei. E fai eiloa penā me ne “māfua mai i te Atua, kae e aoga ki te akoako atu, ki te faiga o polopolokiga, ki te fakatonutonuga o mea ‵se.” (2 Timoteo 3:16, 17) E ‵tau eiloa mo koe o iloilo aka a te tusi mua tenei telā e fetaui ‵lei mo aso nei!