Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

 MATAUPU E 5

Ke Tumau i te ‵Vae Keatea Mai te Lalolagi

Ke Tumau i te ‵Vae Keatea Mai te Lalolagi

‘E se ‵kau koutou ki te lalolagi.’IOANE 15: 19.

1. Se a te mea ne faka‵mafa mai ne Iesu i tena toe po e pelā me se tagata i te lalolagi?

I TENA toe po e pelā me se tagata i te lalolagi, ne fakaasi atu ne Iesu tena manavase ki mea ka ‵tupu ki ana soko i aso mai mua. Ne ‵talo foki a ia e uiga ki te mea tenā, i ana pati ki tena Tamana: “Au e se ‵talo atu ke ave ne koe latou keatea mai te lalolagi, ka ko au e ‵talo atu ke tausi latou ne koe mai te Tino Masei. E se ne tino o te lalolagi latou, e penei foki mo au e sē se tino o te lalolagi.” (Ioane 17:15, 16) I tena ‵talo tenei mai tena ‵kano loto, ne fakaasi atu ei ne Iesu a te ‵poko o tena alofa ki ana soko mo te tāua o ana pati kolā ne fai muamua atu i te po eiloa tenā ki nisi o latou: ‘E se ‵kau koutou ki te lalolagi.’ (Ioane 15:19) E manino ‵lei me ne fakatāua malosi ne Iesu ke tumau ana soko i te ‵vae keatea mai te lalolagi!

2. Se a “te lalolagi” telā ne fakasino atu ki ei a Iesu?

2 E fakasino atu loa “te lalolagi” telā ne faipati a Iesu ki ei ki tino katoa kolā e ‵vae keatea mai te Atua, e pule ne Satani kae ‵nofo pologa ki te agaga o te kaimanako mo te fakamatamata telā e māfua mai i a ia. (Ioane 14:30; Efeso 2:2; 1 Ioane 5:19) E tonu, a te “fai mo taugasoa o te lalolagi [tenā], ko te fili tenā o te Atua.” (Iakopo  4:4) Kae e mafai la pefea o ‵nofo i te lalolagi a tino kolā e fia tumau i te alofa o te Atua kae ‵vae foki keatea mai i ei? Ka mafau‵fau tatou ki auala e lima konei: ke tumau i te fakamaoni ki te Malo o te Atua mai lalo i a Keliso kae se ‵kau ki se feitu i mea fakapolitiki a te lalolagi, mai te tumau i te ‵teke atu ki te agaga o te lalolagi, mai teuga mo gatu kolā e fetaui ‵lei, mai te tausiga o ‵tou mata ke faigofie te kilo, mo te ‵pei ki ‵tou gatu tau faka-te-agaga.

TE TUMAU I TE ALOFA FAKAMAONI MO TE ‵VAE KEATEA

3. (a) Se a te kilokiloga a Iesu ki mea fakapolitiki i ana aso? (e) Kaia e mafai ei o fai atu me e ga‵lue a soko fakaekegina o Iesu e pelā me ko ana sui? (Ke aofia te fakamatalaga mai lalo.)

3 I lō te kau atu ki mea fakapolitiki i ana aso, ne saga atu eiloa a Iesu o talai te Malo o te Atua, ko te pulega i te lagi telā ka fai ei a ia mo fai te Tupu i ei. (Tanielu 7:13, 14; Luka 4:43; 17:20, 21) Tela la, i te taimi ne tu atu ei i mua o te kovana o Loma ko Pilato, ne mafai o fai atu a Iesu: “E se mai te lalolagi nei a toku malo.” (Ioane 18:36) E tau‵tali atu ana soko fakamaoni ki tena fakaakoakoga mai te lotou a‵lofa fakamaoni ki a Keliso mo tena Malo mo te fakasalalauatuga o te Malo tenā ki te lalolagi. (Mataio 24:14) “A matou ko sui o Keliso,” ko pati a te apositolo ko Paulo. “Ona ko matou ko sui o Keliso, ko fakamolemole atu ei matou ki a koutou ke faka‵lei koutou mo te Atua.” *2 Kolinito 5:20.

4. Ne fakaasi atu pefea te a‵lofa fakamaoni o Kelisiano ‵tonu katoa ki te Malo o te Atua? (Ke onoono ki te pokisi i te  Kelisiano Mua Kola ne Seki Kau ki Kinauga.)

 4 Ona ko tino kolā e sui ne latou a malo io me ko atufenua fakaa‵tea, e se ‵tau o ‵kau ki faifaiga a atufenua kolā e ga‵lue latou i ei; e tumau latou i te sē ‵kau ki olotou kinauga. Kae e ‵lago atu eiloa a sui konei ki malo o atufenua kolā e sui ne latou. E penā foki a soko fakaekegina o Keliso kolā ko “tino o te lagi.” (Filipi 3:20) E tonu, ona ko te lotou loto finafinau i te talaiga o te Malo, ko oti ne fesoasoani atu latou ki te fia miliona o nisi “mamoe” a Keliso ke ‘faka‵lei latou mo te Atua.’ (Ioane 10:16; Mataio 25:31-40) E tavini atu fakamuli a latou konei e pelā me ne sui lagolago o Keliso i te ‵lago atu ki taina fakaekegina o Keliso. E pelā me se lafu mamoe fealofani telā e ‵lago atu ki te Malo faka-Mesia, e tumau a potukau konei e lua i te sē ‵kau ki se feitu i kinauga fakapolitiki a te lalolagi.Faitau te Isaia 2:2-4.

5. E ‵kese pefea te fakapotopotoga Kelisiano mo Isalaelu mua, kae e fakaasi mai pefea ne Kelisiano te ‵kese tenei?

5 A te alofa fakamaoni ki a Keliso e se ko te pogai fua e tasi e se ‵kau ei a Kelisiano ‵tonu ki se feitu i kinauga konei. E se pelā mo Isalaelu mua telā ne tuku atu ne te Atua te lotou fenua, a tatou ne vaega o se kautaina i te lalolagi kātoa. (Mataio 28:19; 1 Petelu 2:9) Tela la, kafai e ‵kau tatou ki se potukau fakapolitiki i ‵tou fenua, ka gutugutulua eiloa tatou ki te ‵tou saolotoga o fai‵pati atu e uiga ki te fekau o te Malo mo te ‵tou fealofani e pelā me ne Kelisiano. (1 Kolinito 1:10) E se gata i ei, i taimi e fai ei a taua, ka taua atu eiloa tatou ki ‵tou taina tali‵tonu, kolā e fakatonu mai ke a‵lofa tatou ki ei. (Ioane 13: 34, 35; 1 Ioane 3: 10-12) Tenā te pogai ne fai atu ei a Iesu ke se ‵kau ana soko ki taua. Ne  fai atu foki ke a‵lofa latou ki olotou fili.Mataio 5: 44; 26:52; ke onoono ki te pokisi “ E Mata, e Tumau Au i te sē Kau ki se Feitu i Kinauga a te Lalolagi?

6. E pokotia pefea tou fesokotakiga mo malo o tagata ona ko tou tukuatuga ki te Atua?

6 E pelā me ne Kelisiano ‵tonu, ko oti ne tuku atu ‵tou ola ki te Atua, kae e se ki se tino, se fakapotopotoga o tino, io me se atufenua. E fai mai te 1 Kolinito 6:19, 20: “A koutou e se mō koutou ake eiloa, kae mō te Atua. Ne fakasaoloto ne ia koutou mai te agasala i tona mate.” Tela la, e tiga eiloa e ‵tau o avatu ki “malo” o tagata ana mea e auala i te fakaaloalo atu, te ‵togiga o lafoga, mo te fakalogo telā e se katoatoa, e fai foki ne soko o Iesu olotou “tiute ki te Atua.” (Maleko 12:17; Loma 13:1-7) E aofia i te mea tenei te lotou tapuakiga, te lotou a‵lofa mo te loto kātoa, mo te lotou fakamaoni o faka‵logo. Kafai ko ‵tau i ei, e toka latou o tuku atu olotou ola mō te Atua.Luka 4:8; 10:27; faitau te Galuega 5:29; Loma 14:8.

‵TEKE ATU FAELOA KI TE “AGAGA O TE LALOLAGI”

7, 8. Se a “te agaga o te lalolagi,” kae e “pule” atu pefea te agaga tenā ki se tino?

7 A te suā auala e ‵vae ei kea‵tea a Kelisiano mai te lalolagi ko te ‵teke atu faeloa ki tena agaga masei. “E seki maua ne matou a te agaga o te lalolagi tenei; kae ne maua ne matou a te Agaga ne aumai ne te Atua,” ne tusi mai a Paulo. (1 Kolinito 2:12) Ana muna ki te kau Efeso: “I aso foki konā, koi tau‵tali eiloa koutou i auala ma‵sei o te lalolagi; ne faka‵logo koutou ki te pule o te  ‵mana fakatiapolo i te lagi [ea], ko te agaga telā e pule ne ia a tino kolā e se faka‵logo ki te Atua.”Efeso 2:2, 3.

8 Te “ea” io me ko te agaga o te lalolagi, se malosi  telā e se matea kae e malosi ‵ki telā e fai ne ia ke se faka‵logo a tino ki te Atua kae e fakamalosi aka ne ia a “mea e matea ne tino kae ma‵nako ki ei.” (1 Ioane 2:16; 1 Timoteo 6:9, 10) E maua te “‵mana” o te agaga o te lalolagi tenei e auala i ana takolekolega ki te foitino agasala, i tena faigata o matea, mo tena salalau valevale e pelā mo te ea. E se gata i ei, e “pule” atu te agaga tenā mai te atiakaga malielie o uiga ma‵sei i loto  i te tino, e pelā mo te kaimanako, te fakamatamata, te fia fai tofi, mo te agaga o te fia tu tokotasi i mea tau amioga mo uiga ‵teke. * I tugapati faigofie, e ati malielie aka ne te agaga o te lalolagi a uiga o te Tiapolo ke ola i te loto o te tino.Ioane 8:44; Galuega 13:10; 1 Ioane 3:8, 10.

9. I auala fea e ulu mai ei te agaga o te lalolagi ki ‵tou mafaufau mo ‵tou loto?

9 E mata, e mafai o ‵mau a aka o te agaga o te lalolagi i tou mafaufau mo tou loto? Ao, māfai fua e se matapulapula koe. (Faitau te Faataoto 4:23, Tusi Paia, Samoa) E kamata sāle ana fakamalosiga i se auala sē matea, kāti mai te fai taugasoa mo tino kolā e foliga mai me e ‵lei, kae e se a‵lofa ki a Ieova. (Faataoto 13:20; 1 Kolinito 15:33) E mafai foki o maua ne koe te agaga tenā e auala i tusi ma‵sei, ata ma‵sei io me ko fakatuatusi o aposetate i te itaneti, fakafiafiaga ma‵sei, mo fakatau‵faiga ‵lasi i tafaoga—e auala i so se tino io me ko so se mea telā e avatu ne ia a mafaufauga o Satani io me ko tena lalolagi.

10. E mafai pefea o ‵teke atu faeloa tatou ki te agaga o te lalolagi?

10 E mafai pefea o ‵teke atu tatou ki te agaga fakamataku tenei o te lalolagi ke tumau ei tatou i te alofa o te Atua? Mai te fakaaogaga katoatoa o fakatokaga faka-te-agaga a Ieova mo te ‵talo faeloa mō te agaga tapu. E malosi fakafia atu a Ieova i a Satani io me ko te lalolagi matagā telā e pule ne ia. (1 Ioane 4:4) Tela la, e pefea te tāua o te fakapili‵pili atu ki a Ieova e auala i ‵talo!

 KE FAKAASI ATU TE LOTO MAULALO I ‵TOU GATU MO TEUGA

11. Ne fakamalosi aka pefea ne te agaga o te lalolagi te tulaga o gatu mo teuga?

11 A te fakaasiga i tua o te agaga telā e fakamalosi atu ki te tino ko ana gatu, teuga mo tena tu ‵ma. Ne ma‵sei ‵ki eiloa a tulaga o gatu i atufenua e uke telā ne fai mai ei se tino galue i te televise me ko pili mai te taimi ka olo fua‵fua ei a fafine talitagata. Ke oko ki tama‵liki fa‵fine kolā e seki kātoa olotou taki sefulu tupu tausaga ko pokotia foki i te uiga tenei—“e tuku faka‵sau atu a koga e uke o te foitino, kae se lava te loto maulalo,” ko te lipoti i te nusipepa e tasi. A ko te isi uiga ko te sona fai valevale o teuga tela e fakaasi mai i ei te agaga ‵teke mo te seai o se āva.

12, 13. Ne a akoakoga fakavae e ‵tau o fakaaoga ne tatou i ‵tou gatu mo teuga?

12 E pelā me ne tavini a Ieova, e ma‵nako eiloa tatou ke ‵lei ‵tou foliga, ko tena uiga ko teuga kolā e ‵ma, e fakafiafia, kae e fetaui ‵lei mo so se mea. E ‵tau o fakaasi atu i ‵tou teuga i taimi katoa a te ‘mafaufau ‵lei mo te fai faka‵lei,’ fakatasi mo te “amio ‵lei” kolā e fetaui mo so se tino—se tagata io me se fafine—“lotu,” telā e  fia tavae atu ki te Atua. E tonu, a te mea telā e fakatāua malosi ne tatou e se ko te faiga o tino ke ‵saga mai ki a tatou, kae ke tumau tatou “i te alofa o te Atua.” (1 Timoteo 2:9, 10; Iuta 21) Ao, a ‵tou toe teuga ‵gali ko “te tino sē lavea ko te loto . . . , [telā e] tāua i mua o te Atua.”1 Petelu 3:3, 4.

13 Ke masaua foki me e mafai o pokotia te kilokiloga a nisi tino e uiga ki te tapuakiga tonu i ‵tou gatu mo teuga. A te pati Eleni tela e ‵fuli ki te “fai faka‵lei,” māfai e fakaaoga ki mea tau amioga, e fakamatala mai i ei te manatu e uiga ki te fakaaloalo, te ofo, mo te āva ki lagonaga mo manatu o nisi tino. Tela la, a te mea telā e ‵tau o kausaki tatou ki ei ko te fakatāua atu ne tatou a loto lagona o nisi tino i lō mea kolā e ma‵nako fua tatou ki ei e ‵tusa mo ‵tou saolotoga. Kae e sili i  mea katoa, e ma‵nako eiloa tatou o avatu a tavaega ki a Ieova mo ana tino kae ke fai tatou mo ana tavini, i te faiga o mea katoa “mō te vikiga o te Atua.”1 Kolinito 4:9; 10:31; 2 Kolinito 6:3, 4; 7:1.

E mata, e fakaaloalo atu ki a Ieova oku teuga?

14. Ne a fesili e ‵tau o ‵sili ifo ne tatou ki a tatou eiloa e uiga ki ‵tou teuga mo te ‵tu ‵ma?

14 E tāua atu foki ‵tou gatu, teuga, mo te ‵tu ‵ma māfai ko ga‵lue tatou i te galuega talai io me e ‵kau atu ki fakatasiga Kelisiano. Fesili ifo ki a koe eiloa: ‘E mata, e ‵saga mai fua a tino ki oku teuga mo toku tu ‵ma? E mata, e fai ei ke se ‵lei a lagonaga o nisi tino? E mata, e fakatāua atu ne au oku saolotoga i mea konei i lō te mauaga o tauliaga i te taviniga i te fakapotopotoga?’Salamo 68:6; Filipi 4:5; 1 Petelu 5:6.

15. Kaia e se tuku mai ei i te Muna a te Atua ne tulafono mautinoa e uiga ki gatu, teuga, mo te ‵tu ‵ma?

15 E seai ne tulafono mautinoa e tuku mai i te Tusi Tapu mō Kelisiano e uiga ki gatu, teuga, mo te ‵tu ‵ma. E se manako a Ieova ke fakaseai te ‵tou saolotoga o fai ‵tou filifiliga io me ko te fakaaogaga o ‵tou mafaufau. I lō te fai penā, e manako a ia ke fai tatou mo fai ne tino ma‵tua ‵lei kolā e mafai o fakasako‵sako atu a akoakoga fakavae i te Tusi Tapu kae “kola ko oti ne akoako ke iloa ne latou o tami ki te kesekesega o te ‵lei mo te masei.” (Epelu 5:14) Kae ko te ‵toe mea tāua, e manako a ia ke pule tatou ne te alofa—te alofa ki te Atua mo tuakoi. (Faitau te Maleko 12:30, 31.) E ‵tusa mo te avā tulafono konā, e mafai ei o filifili aka ki vaegā gatu mo teuga kese‵kese e uke. E matea atu te fakamaoniga o te mea tenei i teuga lanu kese‵kese o tino fia‵fia o Ieova i so se koga e maopoopo ei latou i te lalolagi.

 KE “FAKAFAIGOFIE” TAU KILO

16. E ‵teke atu pefea te agaga o te lalolagi ki akoakoga a Iesu, kae ne a fesili e ‵tau o ‵sili ifo ne tatou ki a tatou eiloa?

16 E fakaloiloi mai te agaga o te lalolagi kae fakamalosi atu ki te fia miliona ke ‵saga atu ki tupe mo kope ke maua ei te fiafia. Kae ne fai mai a Iesu: “Me i te olaga tonu o te tino e se fakavae i luga i te uke o ana mea!” (Luka 12:15) E tiga eiloa ne seki talia ne ia ke ola a ia i se olaga fakataputapu kae faigata, ne akoako mai a Iesu me e maua te fiafia tonu ne “latou kolā e iloa ne latou i a latou e ma‵tiva faka te agaga” mo latou kolā e “fakafaigofie” te lotou ‵kilo, ko tino loto fakamaoni kolā e ‵saga ‵tonu atu ki mea faka-te-agaga. (Mataio 5:3; 6:22, 23NW) Fesili ifo ki a koe eiloa: ‘E mata, e talitonu au ki mea kolā ne akoako mai ne Iesu, io me ko fakamalosigina au ne “te tamana . . . o tino ‵loi”? (Ioane 8:44) Ne a mea e fakaasi mai i aku pati, oku fakamoemoega, mea kolā e fakamuamua ne au, mo te auala e ola ei au?’Luka 6:45; 21:34-36; 2 Ioane 6.

17. Taku mai ne mea aoga ko oti ne maua ne tino kolā e fakafaigofie te lotou ‵kilo.

17 “A te poto . . . e fakaasi ‵tonu mai i ana galuega,” ko pati a Iesu. (Mataio 11:19) Mafau‵fau ki nai mea aoga e maua ne tino kolā e fakafaigofie te lotou ‵kilo. E maua ne latou te malosi fou i te taviniga ki te Malo. (Mataio 11:29, 30) E se sona manava‵se latou, ko se lagona ei ne latou te ‵mae o te mafaufau. (Faitau te 1 Timoteo 6:9, 10.) Ona ko te lotoma‵lie ki mea kolā e aoga ‵tonu ki te tausiga o te ola, ko uke atu olotou taimi e maua mō olotou kāiga e pelā foki mo taugasoa Kelisiano. E iku atu i ei ki te ‵moe ‵lei o latou. (Failauga 5:12) Ko sili atu nei te lotou fia‵fia ona ko te tuku atu fua o mea, i  so se auala. (Galuega 20:35) E mautinoa te lotou “fakamoemoega” kae lagona ne latou te filemu mo te lotomalie i loto i a latou. (Loma 15:13; Mataio 6:31, 32) E seai se aofaki tupe e mafai o ‵togi ki ei a fakamanuiaga konei!

“PUKE KI MEATAU KATOA A TE ATUA”

18. E fakamatala mai pefea i te Tusi Tapu a te ‵tou fili, ana auala, mo te tulaga o te ‵tou taua?

18 A tino kolā e ‵nofo tumau i loto i te alofa o te Atua e maua foki ne latou te puipuiga faka-te-agaga mai i a Satani, telā e se manako fua ke se fia‵fia a Kelisiano, kae ke se maua foki ne latou te ola se-gata-mai. (1 Petelu 5:8) “Me i a tatou e se taua mo tino, kae taua mo malosi ma‵sei faka te tiapolo i te lagi, ko pule, malo, mo te malosi o te lalolagi pouliuli i aso nei,” ko pati a Paulo. (Efeso 6:12) E fakaasi mai i te pati “taua” me e se ‵mao te ‵tou taua mai i se koga saogalemu— pelā mo te pili mai o se ana i lalo o te laukele— kae se taua telā e ī eiloa a tino ki loto. E se gata i ei, e fakaasi mai i pati pelā mo “malo,” mo “pule” me ne fakatoka kae palani faka‵lei a taua konei mai te koga e ‵nofo i ei a agaga ma‵sei.

19. Fakamatala mai a te gatu tau faka-te-agaga o te Kelisiano.

19 Kae faitalia ‵tou vāivāiga mo ‵tou tapula, ka manumalo eiloa tatou. E pefea la? Mai te “puke ki meatau katoa a te Atua.” (Efeso 6:13) E fakamatala mai a meatau konā i te Efeso 6:14-18: “Tela la, ke ‵tu mautakitaki koutou: ke fai a te munatonu mo kafanoa e li fakatamilo i otou taugasulu; ke fakapei ki luga i otou foitino a te amiotonu ke fai mo otou ufifatafata, ka ke toka foki koutou o takutaku atu a te Tala ‵Lei o te  Filemu, ke pelā mo ne taka mō otou vae. E ‵tau o ave sāle a te fakatuanaki i taimi katoa ke fai mo talita; ko te mea ke mafai ne koutou o tamate ki ei a matasana ‵ka a te Tino Masei. Ke talia ne koutou a te fakaolataga ke fai mo otou puloutau, mo te muna a te Atua ke fai mo pelu, e pelā eiloa mo te tukuatuga ne te Agaga ki a koutou. Ke fai katoa ne koutou a mea konei i te ‵talo, e fakatagi atu ei koutou ki te Atua mo tena fesoasoani. ‵Talo i taimi katoa, e pelā eiloa mo te takitakiga a te Agaga.”

20. E ‵kese pefea te ‵tou tulaga mai se sotia tonu?

20 Ona ko te mea se fakatokaga a te Atua ke puipui tatou ne te gatu tau faka-te-agaga tenei, ka se taka‵vale eiloa tatou māfai e ‵pei tatou ki ei i taimi katoa. E se pelā mo sotia ‵tonu kolā e leva te lotou malologa māfai e seai ne taua, e taua atu faeloa a Kelisiano i se taua telā e aofia i ei te ola io me ko te mate kae ka se mafai o gata seiloga ke fakaseai ne te Atua a te lalolagi a Satani kae ‵sai aka ei a agaga ma‵sei katoa. (Fakaasiga 12:17; 20:1-3) Tela la, ke mo a ma ‵fiu māfai ko fei‵kiki koe mo vāivāiga io me ko manakoga sē ‵tonu, me e ‵tau o “fakataputapu” ‵tou foitino ko te mea ke tumau tatou i te fakamaoni ki a Ieova. (1 Kolinito 9:27) E tonu, ko te taimi eiloa telā ko se taua ei tatou ko ‵tau ei o manava‵se tatou!

21. E mafai pefea o manumalo tatou i te ‵tou taua faka-te-agaga?

21 E se gata i ei, e se mafai o manumalo tatou i te taua tenei i ‵tou malosi eiloa. Tenā te pogai e fakamasaua mai ei a Paulo e uiga ki te manakoga ke ‵talo ki a Ieova “i taimi katoa.” Ko te taimi foki tenā e ‵tau ei o faka‵logo tatou ki a Ieova mai te sukesuke ki tena Muna mo te fakatasitasi mo ‵tou taina “sotia” i so se  avanoaga, me e se ko tatou fua e taua i te taua tenei! (Filemoni 2; Epelu 10:24, 25) A tino kolā e fakamaoni i feitu katoa konei ka se manumalo fua kae ka mafai foki o ‵pulu malosi ne latou te lotou fakatuanaki māfai e fakafesiligina.

KE TOKA O ‵PULU TOU FAKATUANAKI

22, 23. (a) Kaia e ‵tau ei o toka tatou i taimi katoa o ‵pulu te ‵tou fakatuanaki, kae ne a fesili e ‵tau o ‵sili ifo ne tatou ki a tatou eiloa? (e) Se a te mea ka sau‵tala ki ei i te suā mataupu?

22 ‘Ona ko koutou e se ne tino o te lalolagi e takalialia te lalolagi ki a koutou,’ ko pati a Iesu. (Ioane 15:19) Tela la, e ‵tau faeloa o toka a Kelisiano o ‵pulu te lotou fakatuanaki kae fai penā mo te āva mo te loto maulalo. (Faitau te 1 Petelu 3:15, 16.) Fesili ifo ki a koe eiloa: ‘E mata, e malamalama au i te pogai e ‵kese ei te tulaga o Molimau a Ieova i nisi taimi mai mea kolā e talia ne te tokoukega o tino? Kafai ko fepaki au mo se mea faigata ke faka‵kese ei toku tulaga, e mata, e talitonu katoatoa au me e tonu te mea telā e fai mai ne te Tusi Tapu mo te tavini fakamaoni kae poto? (Mataio 24:45; Ioane 17:17) Kae kafai e fai ne au se mea telā e tonu i te kilokiloga a Ieova, e mata, e se toka fua au o fai ke ‵kese toku tulaga kae e fakamatamata foki au i ei?’Salamo 34:2; Mataio 10:32, 33.

23 Kae e tofotofo sāle te ‵tou fia ‵vae keatea mai te lalolagi i auala kolā e faigata o matea. E pelā mo te mea ne fakaasi atu mua, e taumafai te Tiapolo o fakalata a tavini a Ieova ke ‵to atu ki loto i te lalolagi e auala i fakafiafiaga faka-te-lalolagi. E mafai pefea o filifili ne tatou a fakafiafiaga aoga kolā e fakafou i ei te malosi kae maua ei se loto lagona ‵ma? Ka sau‵tala tatou ki te mea tenā i te suā mataupu.

^ pala. 3 Talu mai te Penitekoso i te  33 T.A., ne tavini atu ei a Keliso e pelā me ko te Tupu ki luga i te fakapotopotoga o ana soko fakaekegina i te lalolagi. (Kolose 1:13) I te 1914, ne maua ei ne Keliso te ‘pule fakatupu ki te lalolagi.’ Tela la, ko fai ei a Kelisiano fakaekegina i aso nei mo fai a sui o te Malo faka-Mesia.Fakaasiga 11:15.

^ pala. 8 Ke onoono ki te tusi ko te Reasoning From the Scriptures, te itulau e 389-393, telā ne ‵lomi ne Molimau a Ieova.