Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

“Ke Tumau i te Alofa o te Atua”

 MATAUPU E 16

Ke ‵Teke Atu ki te Tiapolo mo Ana Auala Ma‵sei

Ke ‵Teke Atu ki te Tiapolo mo Ana Auala Ma‵sei

“‵Teke atu te Tiapolo, ko sola ei a ia keatea.”IAKOPO 4:7.

1, 2. Ko oi e fia‵fia i taimi e fai ei a papatisoga?

KAFAI ko oti ne tavini atu koe ki a Ieova i te fia o tausaga, kāti ko oti eiloa ne lagona ne koe a lauga mō te papatisoga e uke i ‵tou fono i te fenua mo fono i te atufenua. Kae faitalia te uke o taimi ne nofo atu ei koe i vaegā taimi penā, kāti koi otia eiloa tou loto i te taimi e ‵tu aka ei a latou kolā e saga‵saga i mua ke tuku atu latou mō te papatisoga. Ko te taimi eiloa tenā e pati lima ei a tino mo te fiafia lasi. Kāti ka ‵kano vai‵vai ou mata i te kilo atu ki se potukau o tino kolā ko oti ne filifili ke ‵kau atu latou ki te feitu o Ieova. Ko oko eiloa i te lasi o te fiafia i vaegā taimi penā!

2 E tiga eiloa e matea ne tatou a nāi papatisoga i te tausaga kātoa i te ‵tou fenua, kae e uke atu avanoaga e maua ne agelu ke matea ne latou a mea konā. E a, e matea ne koe “te lasi o te fiafia i te lagi” i te matea atu ne latou te fia afe o tino i te lalolagi kātoa e fakaopoopo ki te vaega matea o te fakapotopotoga a Ieova i vaiaso takitasi? (Luka 15:7, 10) E seai se fakalotolotolua e uiga ki te lasi o te fia‵fia o agelu ke matea atu te mea tenā!Hakai 2:7.

 A “TE TIAPOLO, E FANOFANO TELE E PELĀ MO SE LEONA FEKAI”

3. Kaia “e fanofano tele” ei a Satani “e pelā mo se leona fekai,” kae se a te mea e fia fai ne ia?

3 Kae e ‵kese mai i ei, e isi ne tino faka-te-agaga kolā e onoono atu ki papatisoga konā mo te kaitaua lasi. E kaitaua masei a Satani mo temoni ke matea atu ne latou te fia afe o tino e fulitua atu ki te lalolagi masei tenei. E fai penā ona ko pati ‵toa a Satani me e seai se tino e mafai o tavini atu ki a Ieova ona ko te alofa tonu kae e seai foki se tino e mafai o tumau i te fakamaoni mai lalo i tofotofoga faiga‵ta. (Faitau te Iopu 2:4, 5.) I taimi katoa e fai ei te fakaikuga a se tino ke tuku atu a ia ki a Ieova, e fakatalitonu atu i ei i a Satani se tino loi. E fai  pelā me e laupāpā ne se tino a mata o Satani i te fia afe o taimi i vaiaso takitasi o te tausaga. E se tioa eiloa o “fanofano tele e pelā mo se leona fekai, e salasala ki te tino ke kai ne ia”! (1 Petelu 5: 8) E fia folo ne te “leona” tenei a tatou i te feitu faka-te-agaga, ke fakamasei io me fakaseai atu ei te ‵tou fesokotakiga mo te Atua.Salamo 7:1, 2; 2 Timoteo 3:12.

I taimi katoa e tuku atu ei se tino ki a Ieova kae papatiso, e fakatalitonu atu i ei i a Satani se tino loi

4, 5. (a) Ne a auala tāua e lua ne fakatapula ei ne Ieova a te malosi o Satani? (e) Se a te mea e mafai o talitonu ki ei se Kelisiano tonu?

4 E tiga eiloa e fe‵paki tatou mo se fili tatino, e seai se pogai e ‵tau ei o tō ma‵taku tatou. Kaia? Me ko oti ne fakatapula ne Ieova a te “leona fekai” i auala tāua e lua. Ne a auala konā? Muamua la, ko oti ne ‵valo mai ne Ieova me ka ‵sao atu “te vaitino tokouke” o Kelisiano ‵tonu “i te fakasauaga lasi” telā ko pili mai. (Fakaasiga 7:9, 14) E se mafai o se fakataunu a valoaga a te Atua. Tela la, e iloa foki ne Satani me e se mafai o malei ne ia a tino o te Atua e pelā me se potukau.

5 A te lua o tapula e mafai o maua mai se mea tonu telā ne fakavae ki ei a pati a se tavini fakamaoni a te Atua i aso mua. Ne fai atu te pelofeta ko Asalia ki te tupu ko Asa: “A te Aliki e fakatasi mai ki a koutou, manafai e tumau te otou faka‵logo ki a ia.” (2 Nofoaiga Tupu 15:2; faitau te 1 Kolinito 10:13.) E uke a tala i te Tusi Tapu e fakaasi mai i ei me ne seki mafai o folo ne Satani a tavini a te Atua kolā ne ‵pili te lotou va mo ia. (Epelu 11:4-40) I aso nei, e mafai foki o ‵teke atu se Kelisiano telā e ‵pili te lā va mo te Atua io me fakatakavale ne ia te Tiapolo. E tonu, e fakatalitonu mai te Muna a te Atua: “‵Teke atu te Tiapolo, ko sola ei a ia keatea mai i a koutou.”Iakopo 4:7.

 “ME I A TATOU E . . . TAUA MO MALOSI MA‵SEI FAKA TE TIAPOLO”

6. E taua mai pefea a Satani ki Kelisiano taki tokotasi?

6 E se mafai o manumalo a Satani i te taua fakatusa tenei, kae e mafai o fakatakavale ne ia tatou taki tokotasi māfai e se matapula‵pula tatou. E iloa ne Satani me e mafai o folo ne ia tatou māfai e fakavāivāi ne ia te ‵tou fesokotakiga mo Ieova. E fakataunu pefea ne Satani te mea tenei? Mai te taua malosi mai ki a tatou katoa, ki a tatou taki tokotasi, mo te poto i ana auala ma‵sei. Ka mafau‵fau tatou nei ki auala ma‵sei kae lauiloa konei o Satani.

7. Kaia ko fakamalosi aka ei ne Satani a tena taua telā e fai ki tino o Ieova?

7 E taua malosi. Ne fai mai te apositolo ko Paulo: “Ka ko te lalolagi kātoa ko i lalo i te pule a te Tino Masei.” (1 Ioane 5:19) E maua i pati konei se mea ke fakaeteete i ei a Kelisiano ‵tonu katoa. Ona ko te mea ko oti ne folo ne Satani a te lalolagi o tino amio ma‵sei katoa, ko saga mai nei a ia o fakamalosi aka tena taua ki tino kolā koi ‵sao nei i tena malei—ko tino o Ieova. (Mika 4:1; Ioane 15:19; Fakaasiga 12:12, 17) Ko oko eiloa i tena kaitaua me e iloa ne ia i tena taimi ko toetoe. Tela la, ko momea aka ei ana taumafaiga. Ko fe‵paki eiloa tatou i aso nei mo tena toe taua fakamataku ke fakamasei ei te ‵tou fesokotakiga mo te Atua. Tela la, tenei eiloa te taimi e ‵tau o ‘iloa ei a mea kolā e ‵tau o fai ne tatou.’1 Nofoaiga Tupu 12: 32.

8. Se a te mea ne fakauiga ki ei a Paulo i ana pati i a tatou e “taua” mo agaga ma‵sei?

8 Te taua atu ki tino taki tokotasi. Ne polopoloki mai a Paulo ki ana taina Kelisiano: “Me i a tatou e . . . taua mo malosi ma‵sei faka te tiapolo i te lagi.” (Efeso 6:12)  Kaia ne fakaaoga ei ne Paulo a te pati “taua”? Me e fakaasi mai i ei te manatu e uiga ki se tokolua e ‵fusu ki loto. Tela la, mai te fakaaogaga o te pati tenā, ne faka‵mafa mai ei ne Paulo me i a tatou taki tokotasi e taua mo agaga ma‵sei. Faitalia me e ‵nofo tatou i se fenua telā e lauiloa i ei te talitonu ki agaga ma‵sei io me ikai, e se ‵tau lele o puli i a tatou me i te taimi eiloa e tuku atu ei tatou ki a Ieova, ko te taimi foki tenā e kamata ei o taua tatou mo agaga ma‵sei. E aofia a Kelisiano taki tokotasi i se taua mai te taimi eiloa e tuku atu ei a ia ki a Ieova. E se tioa eiloa o matea ne Paulo te manakoga ke fakamalosi atu i taimi e tolu ki Kelisiano i Efeso ke “tumau” latou!Efeso 6:11, 13, 14.

9. (a) Kaia e fakaaoga ei ne Satani mo temoni a “auala ma‵sei” kese‵kese e uke? (e) Kaia e taumafai ei a Satani o fakamasei a ‵tou mafaufauga, kae e ‵teke atu pefea tatou ki ana taumafaiga? (Ke onoono ki te pokisi i te “ Ke Fakaeteete i Auala Ma‵sei o Satani!”) (i) Se a te togafiti ka sau‵tala nei tatou ki ei?

9 Auala ma‵sei. E fakamalosi mai a Paulo ke tumau a Kelisiano o ‵teke atu a “auala ma‵sei” o Satani. (Efeso 6:11) Ke onoono aka me ne fai mai a Paulo me e uke a auala ma‵sei. E isi se pogai e fakaaoga ei ne agaga ma‵sei a auala faitogafiti e uke. E isi ne tino tali‵tonu kolā ne manumalo i se tofotofoga e tasi kae ne taka‵vale i te fe‵pakiga mo se isi togafiti. Tela la, e onoono faka‵lei eiloa te Tiapolo mo temoni ki uiga o tatou taki tokotasi ke matea ne latou a mea kolā e vāi‵vai malosi tatou i ei. Ko fakaaoga ei ne latou ‵tou vāivāiga faka-te-agaga konā. Kae e fakafetai tatou me e matea ne tatou a auala e uke o Satani, me e fakaasi mai a mea konā i te Tusi Tapu. (2 Kolinito 2:11) Ne sau‵tala eiloa tatou i mataupu mua o te tusi tenei e uiga ki togafiti pelā mo te fia maumea, taugasoa sē ‵lei, mo amioga finalalolagi. Nei  la, ka sau‵tala tatou ki se isi togafiti poto a Satani—ko te faivailakau.

TE FAIVAILAKAU—SE FAIFAIGA FAKALOILOI TINO

10. (a) Se a te faivailakau? (e) Se a te kilokiloga a Ieova ki te faivailakau, kae se a tau kilokiloga e uiga ki ei?

10 E auala i te faivailakau, io me ko faifaiga fakatemoni, e fesokotaki ‵tonu atu ei te tino ki agaga ma‵sei. A te faiga o vili, te faiga o sai, te fakavailakauga o se tino, mo te fesokotaki atu ki tino ‵mate, ko nisi vaega konā o te faivailakau. E pelā mo te mea e iloa ‵lei ne tatou, e “takalialia” a Ieova ki te faivailakau. (Teutelonome 18:10-12; Fakaasiga 21:8) Ona ko tatou e ‵tau foki o ‘ita ki te masei,’ e se ‵tau eiloa o mafau‵fau tatou ke fesokotaki atu ki agaga ma‵sei. (Loma 12:9) Ka fai eiloa te faiga tenā mo fai se fakaloiloiga lasi ki te ‵tou Tamana i te lagi, ko Ieova!

11. Kaia e maua ei ne Satani se manumalo lasi māfai e fakalata ne ia tatou ke ‵fuli atu ki te faivailakau? Fakamatala mai.

11 Kae ko te pogai eiloa tenā e taumafai malosi ei a Satani ke aofia a nisi tino o tatou i ei me e fakatakalialia te faivailakau ki a Ieova. I taimi katoa e fakalatagina ei se Kelisiano ke aofia i faifaiga fakatemoni, e manumalo eiloa Satani i se auala lasi ‵ki. Kaia? Mafaufau ki te fakatusa tenei: Kafai e fakalatagina se sotia ke tiakina tena kautau kae kau atu ki kautau a te fili, ka lasi eiloa te fiafia o te takitaki kautau o te fili. Kāti ka fakatu ne ia te sotia tenā e pelā me se failoga, ke fakaitaita atu ki te takitaki kautau mua o te sotia tenā. E penā foki māfai e ‵fuli atu se Kelisiano ki te faivailakau, ka tiaki eiloa ne ia mo te iloa tonu a Ieova ke nofo tonu a ia mai lalo i te pulega a Satani. Mafaufau ki te fiafia ka maua ne Satani ke fakatu ne ia te tino tenā e pelā me se failoga o te taua!  E mata, e manako se tino i a tatou o tuku atu se manumalo penā ki te Tiapolo? E se taitai eiloa! A tatou e se ne tino fakaloiloi tino.

TE FAKAAOGAGA O FESILI KE FAKALOTOLOTOLUA EI A TINO

12. Se a te togafiti e fakaaoga ne Satani ke fakamalosi aka ei te ‵tou kilokiloga e uiga ki te faivailakau?

12 Kafai e tumau tatou i te takalia‵lia ki te faivailakau, ka se mafai o manuia a Satani māfai e fakaaoga ne ia a mea konā ki a tatou. Ko matea atu ei te pogai e ‵tau o ‵fuli ne ia a ‵tou mafaufauga. E pefea la? E ‵sala ne ia auala ke faka‵numi aka ei a Kelisiano ke oko ki te tulaga telā ko taku ei ne latou “a amioga ma‵sei me ne mea ‵lei, kae taku ne [latou] a amioga ‵lei me ne amioga ma‵sei.” (Isaia 5:20) Ke fai te mea tenā, e fakaaoga ne ia sena togafiti telā ko oti ne aoga i taimi e uke—e faka‵sae aka ne ia a fesili ke fakalotolotolua ei a tino.

13. Ne fakaaoga pefea ne Satani te togafiti ko te faka‵saeakaga o fesili ke fakalotolotolua ei a tino?

13 Ke onoono ki te auala ne fakaaoga ei ne Satani te togafiti tenā i aso ko ‵teka. Ne fesili atu a ia ki a Eva i Etena: “E tonu eiloa i te Atua ne fai atu ke sa ‵kai koulua ki fuaga o so se lakau i te fatoaga?” I te fakatasiga o agelu i te lagi i taimi o Iopu, ne fakasae aka ne Satani te fesili tenei: E mata, e tapuaki atu eiloa a Iopu ki a koe manafai e seai sena ‵lei e maua i tena tapuaki atu ki a koe?” Kae i te kamataga o te galuega a Iesu i te lalolagi, ne toa atu a Satani ki a ia i ana pati konei: “Kafai koe ko te tama a te Atua, fakatonu ake ke liu falaoa a fatu konei.” Mafaufau ki te mea tenei—e uiga ki a Iesu, ne fakatauemu atu eiloa a Satani ki pati kolā ne fai mai ne Ieova i se ono vaiaso mai mua atu i ei: “Tenei eiloa taku  Tama fagasele e fiafia au ki ei”!Kenese 3:1; Iopu 1:9; Mataio 3:17; 4:3.

14. (a) E fakaaoga pefea ne Satani tena togafiti ke fakalotolotolua ei a tino e uiga ki te faivailakau? (e) Se a te mea ka mafau‵fau nei tatou ki ei?

14 E fakaaoga foki ne Satani te togafiti tenā i aso nei ke fakalotolotolua ei a tino e uiga ki te matagā o te faivailakau. E fakafanoanoa me ko oti eiloa ne fai ne ia ke fakalotolotolua a nisi tino tali‵tonu. Ko oti ne fakalotolotolua latou e uiga ki te tulaga masei o nisi faifaiga faivailakau. A te ‵tonuga loa, ko mafau‵fau latou, me e mata, “E tonu eiloa”? (2 Kolinito 11:3) E fesoasoani atu pefea tatou ki tino penā ke ‵fuli olotou mafaufauga? E fakamautinoa aka pefea ne tatou ke sē fakamalosi mai a togafiti a Satani ki a tatou? Ke maua te tali ki ei, ke mafau‵fau tatou ki feitu e lua o te olaga kolā ko oti ne fakalailai ne Satani mo te poto ki nisi faifaiga faivailakau. A mea konā ko fakafiafiaga mo te tausiga mai masaki.

TE FAKAAOGAGA O ‵TOU MANAKOGA

15. (a) E pefea te kilokiloga a tino e tokouke i atufenua mau‵mea e uiga ki te faivailakau? (e) Ne pokotia pefea a nisi Kelisiano i te kilokiloga a te lalolagi e uiga ki te faivailakau?

15 Ko oko eiloa te manatu mā‵ma o tino ki faifaiga kese‵kese o te faivailakau, maise eiloa i atufenua mau‵mea. E gasolo aka eiloa o uke a faifaiga fakatemoni i tamunei, tusi, polokalame i televise, mo tafaoga i komupiuta, ke fai mo mea fakafia‵fia kae se fakalogo‵mae atu. Ona ko te lasi o te lauiloa o te vaega e tasi o faifaiga faivailakau ko te fakataulaitu i tamunei mo tusi, ko oti eiloa ne fakatoka a kalapu ke ‵kau atu ki ei a tino kolā e fina ki ei. E manino ‵lei me ko oti ne manumalo a temoni i te faiga ke manatu mā‵ma a tino ki te masei o  te faifaiga faivailakau tenei. E mata, ko oti ne pokotia a Kelisiano i te manatu māmā tenei? Ko oti ne pokotia a mafaufauga o nisi tino i ei. I se auala fea? E pelā mo te mea tenei, i tena otiga ne onoono ki se tamunei e uiga ki te faifaiga faivailakau tenei, ne fai mai se Kelisiano, “Ne matea ne au te ata, kae ne seki aofia au i faifaiga faivailakau.” Kaia e fakama‵taku ei a fakamasakoga penā?

16. Kaia e fakamataku ei ke filifili aka a fakafiafiaga kolā e aofia i ei a faifaiga faivailakau?

16 E tiga eiloa e ‵kese te aofia i faifaiga faivailakau mo te onoono fua ki ei, e se ko tena uiga me e se fakamataku te onoono ki ei. Kaia? Mafaufau ki te mea tenei: E fakaasi mai i te Muna a te Atua me e se mafai o iloa ne Satani mo ana temoni a ‵tou mafaufauga. * Tela la, e pelā mo te mea ne fakaasi atu mua, ko te mea ke iloa aka a mea e mafau‵fau tatou ki ei mo so se vāivāiga faka-te-agaga i a tatou, e iloilo faka‵lei eiloa ne agaga ma‵sei konei a ‵tou mea e fai—e aofia i ei a ‵tou filifiliga e uiga ki fakafiafiaga. Kafai e fakaasi atu i amioga a se Kelisiano me e fiafia loa a ia ki tamunei mo tusi e uiga ki tino faivailakau, faifaiga fakataulaitu, tino e pukea ne temoni, io me ko mataupu e uiga ki temoni, ko tuku atu eiloa ne ia se fekau ki temoni. A te ‵tonuga loa, ko fakailoa atu eiloa ne ia ki a latou ana vāivāiga! Ko sinā fakamalosi aka ei ne temoni te lotou taua mo te Kelisiano tenā mai te fakaaogaga o tena vāivāiga telā ko oti ne fakaasi atu ke oko ki te taimi e takavale ei tou tagata.  A te ‵tonuga loa, a nisi tino ne kamata o fia‵fia ki te faivailakau mai te onoono atu ki ata kolā ne aofia i ei a faifaiga fakataulaitu, ko oti eiloa ne aofia ‵tonu i faifaiga faivailakau konā.Faitau te Kalatia 6:7.

Ke maua a mea aoga mai te fesoasoani o Ieova i taimi e ma‵saki ei tatou

17. Se a te togafiti matagā e mafai o fakaaoga ne Satani ki tino ma‵saki?

17 E se taumafai fua a Satani o fakaaoga a ‵tou manakoga mō fakafiafiaga kae e pelā foki mo ‵tou tausiga mai masaki. E pefea la? E mafai o manavase malosi se Kelisiano ki sena masaki telā ko uke a taumafaiga ke maua se togafiti ki ei kae e fanaka faeloa o masei. (Maleko 5:25, 26) E mafai o maua ne Satani mo temoni se avanoaga ‵lei ke fakaaoga ne latou a ia. E iloa ‵lei ne latou me e polopoloki mai te Muna a te Atua ke ‵kalo keatea mai te ‵sala atu ki te fesoasoani o “tino amio ma‵sei.” (Isaia 31:2) Ko te mea ke ‵teke atu ki te polopolokiga tenā, e mafai o fakaosooso ne temoni se tino penā ke filifili ne ia a togafiti kolā e aofia i ei a “malosi o agaga,” io me ko vailakau—se mea telā e lasi tena logo‵mae. Kafai e manuia te togafiti tenā a temoni, e mafai o fakavāivāi atu ki te fesokotakiga o te tino tenā mo te Atua. I se auala fea?

18. Ne a faifaiga e ‵tau o ‵teke ki ei se Kelisiano, kae kaia?

18 Ne polopoloki atu a Ieova ki tino Isalaelu kolā ne ‵fuli atu ki “malosi o agaga”: “Kafai e sisi ake otou lima o ‵talo, ka ko au e se fia kilo atu lele eiloa ki a koutou. Me e pefea eiloa te ‵talo malosi mai o koutou ki a au, kae ka se fakalogo lele atu eiloa au ki a koutou.” (Isaia 1:13, 15) E tonu, e ma‵nako faeloa tatou ke ‵kalo keatea mai so se mea telā e mafai o faka‵lave aka ei a ‵tou ‵talo mo te ‵lago mai o Ieova ki a tatou—kae maise eiloa i taimi e ma‵saki  ei tatou. (Salamo 41:3) Tela la, kafai e fakaasi mai me e isi ne mea fakataulaitu e aofia i salasalaga mo togafiti e fai ki masaki, e ‵tau o ‵teke ki ei te Kelisiano tonu. * (Mataio 6:13) I te auala tenā, ka tumau ei a Ieova i te ‵lago atu ki a ia.—Ke onoono ki te pokisi “ E Mata, a te Mea Tenei se Faivailakau?

KAFAI KO LAUILOA A TALA E UIGA KI TEMONI

19. (a) Se a te mea ko oti ne fakaloiloi ne te Tiapolo a tino e tokouke ke tali‵tonu ki ei e uiga ki tena malosi? (e) Ne a tala e ‵tau o ‵kalo keatea a Kelisiano ‵tonu mai i ei?

19 E tiga eiloa e manatu mā‵ma a tino e tokouke i atufenua mau‵mea ki te fakamataku o te malosi o Satani, e se fai eiloa penā i nisi kogā koga o te lalolagi. I koga konā, ko oti ne fakaloiloi ne te Tiapolo a tino e tokouke ke tali‵tonu me e lasi atu tena malosi i lō tena malosi tonu. E ola, e ‵kai, e ga‵lue, kae ‵moe a tino i aso takitasi mo te ma‵taku ki agaga ma‵sei. E salalau a tala e uke e uiga ki te ‵mana o galuega a temoni. E safe sāle te matagi i te fakamatalaatuga o tala penā; e ofo malosi a tino i ei. E mata, e ‵tau o fakasalalau atu ne tatou a tala  penā? Ikai, e ‵kalo keatea a tavini a te Atua tonu mai te mea tenā ona ko pogai tāua e lua.

20. E fakasalalau atu pefea ne se tino a togafiti a Satani e aunoa mo te iloa?

20 Muamua la, mai te fakasalalauga o tala e uiga ki galuega a temoni, e ‵lago atu ei te tino ki manakoga o Satani. E pefea la? E fakatalitonu mai te Muna a te Atua me e mafai o fai ne Satani a galuega ‵mana, kae e polopoloki mai foki me fakaaoga ne ia a “fakailoga” ‵loi mo “auala faitogafiti.” (2 Tesalonia 2:9, 10) Ona ko ia ko te tino pito sili i te fakaloiloi, e iloa ne Satani o fakagalue a mafaufau o tino kolā ko fia‵fia ki faifaiga faivailakau mo te faiga o latou ke tali‵tonu ki mea sē ‵tonu. E mafai eiloa o tali‵tonu tonu a vaegā tino penā ki mea ne matea kae lagona ne latou kae fakasalalau atu ki nisi tino. Kae oti aka loa, ko fakaopoopo atu ei a nisi mea sē ‵tonu  mai te fakamatala ‵soko atu. Kafai e fakasalalau atu ne se Kelisiano a vaegā tala penā, ko tena uiga ko fai eiloa ne ia te loto o te Tiapolo—“ko te tamana foki eiloa o te loi.” Ko tena uiga ko fakasalalau eiloa ne ia a togafiti a Satani.Ioane 8:44; 2 Timoteo 2:16.

21. Ne a mea e ma‵nako tatou o sau‵tala ki ei?

21 A ko te lua o mea, kafai ne fesokotaki ‵tonu atu se Kelisiano ki agaga ma‵sei i aso ko ‵teka, e se ‵tau o fakamatala atu ne ia a mea konā ki ana taina tali‵tonu. Kaia? E fakamalosi mai ki a tatou: “Ke tumau te ‵tou ‵kilo atu ki a Iesu, telā e fakavae ki ei te ‵tou fakatuanaki.” (Epelu 12: 2) Ao, e ‵tau o ‵saga atu tatou ki a Keliso, kae e se ko Satani. Se mea ‵lei ke matea atu me i tena nofoga i te lalolagi, ne seki fai atu eiloa ne Iesu ki ana soko a tala e uiga ki temoni, e tiga te uke o ana mea e iloa e uiga ki mea e mafai mo mea e se mafai o fai ne Satani. E ui i ei, ne saga tonu atu eiloa a Iesu ki te fekau o te Malo. Tela la, i te fakaakoako atu ki a Iesu mo apositolo, e ma‵nako fua tatou o sau‵tala “ki galuega fakaofoofogia a te Atua.”Galuega 2:11; Luka 8:1; Loma 1:11, 12.

22. Se a te mea e mafai o fai ne tatou ke fakatumau aka ei te “fiafia i te lagi”?

22 E tonu, e fakaaoga ne Satani a togafiti kese‵kese, e aofia i ei te faivailakau, ke fakamasei ei ‵tou fesokotakiga mo Ieova. Kae mai te takalia‵lia ki mea ma‵sei kae ‵piki ‵mau ki mea ‵lei, e seai eiloa se avanoaga e tuku atu ne tatou ki te Tiapolo ke fakavāivāi ei te ‵tou fakaikuga ke ‵teke atu ki te faivailakau i ana vaega kese‵kese katoa. (Faitau te Efeso 4:27.) Mafaufau ki “te lasi o te fiafia i te lagi” māfai e tumau tatou “o agai atu ki auala ma‵sei o te Tiapolo” ke oko ki te taimi e fakaseai atu ei a ia!Efeso 6:11.

^ pala. 16 A nisi igoa o Satani (Tino ‵Teke, Tino Fatufatu, Tino Fakaloiloi, Tino Fakaosooso, Tino Loi) e se fakaasi mai i ei me e mafai o iloilo ne ia ‵tou loto mo ‵tou mafaufau. Kae e ‵kese mai i ei, e fakamatala mai i a Ieova e tofotofo ne ia “te loto o te tagata,” a ko Iesu ko te tino telā e iloa ne ia a ‘mafaufauga mo manakoga o tino.’Faataoto 17:3; Fakaasiga 2:23.

^ pala. 18 Mō nisi fakamatalaga, ke onoono ki te mataupu “A Health Test for You?” i te lomiga o The Watchtower, i a Tesema 15, 1994, te itulau e 19-22, mo te mataupu “The Bible’s Viewpoint: Your Choice of Medical TreatmentDoes It Matter?” i te lomiga o te Awake! i a Ianuali 8, 2001.