Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

“Ke Tumau i te Alofa o te Atua”

 MATAUPU E 2

E Fakatumau Pefea ne Koe se Loto Lagona ‵Lei?

E Fakatumau Pefea ne Koe se Loto Lagona ‵Lei?

“Tausi ke ‵ma otou loto lagona.”1 PETELU 3:16, Tusi Paia, Samoa.

1, 2. Kaia e tāua ei te kamupasi, kae e mafai pefea o fakatusa te mea tenā ki te loto lagona?

E FOLAU atu eiloa se vakamutu i loto i se vasa sou kae lasi ‵ki; e sasale atu se tino i loto i se togavao matolu; e lele atu se vakalele mai luga atu o kaumana pouli i te ea. E mata, e iloa ne koe a te mea e masani o pokotia i ei a latou konei? E mafai o pokotia a latou konei i se fakalavelave lasi māfai e seai se kamupasi—maise eiloa māfai e se maua ne latou a nisi poto ‵fou.

2 A te kamupasi se mea faigaluega faigofie, e foliga pelā me se itula mo se nila telā e isi se maneta i ei kae fakasino atu faeloa ki matu. Kafai e ‵lei loa te kamupasi kae maise eiloa māfai e fakaaoga fakatasi mo se mape ‵lei, e mafai o faka‵sao i ei a tino. I nisi feitu, e mafai o fakatusa ki se  meaalofa telā ko oti ne tuku mai ne Ieova ki a tatou—ko te loto lagona. (Iakopo 1:17) E aunoa mo se loto lagona, ka seai lele eiloa se mea e takitaki ne ia tatou. Kafai e fakaaoga faka‵lei, e mafai eiloa o fesoasoani mai ke sa‵sale tatou i te auala tonu i ‵tou olaga. Tela la, ke na mafau‵fau tatou ki te uiga o te loto lagona mo te auala e galue i ei. Ko sau‵tala ei tatou ki manatu konei: (1) Te auala e akoako ei te loto lagona, (2) kaia e ‵tau ei o amanaia tatou ki loto lagona o nisi tino, a ko te (3) e aogā pefea ki a tatou a te loto lagona ‵lei.

TE UIGA O TE LOTO LAGONA MO TE AUALA E GALUE EI

3. Se a te uiga mua o te pati Eleni mō te “loto lagona,” kae se a tena galuega fakapito i loto i tino telā e fakamatala mai i ei?

3 A te uiga mua o te tugapati Eleni mō te “loto lagona” i te Tusi Tapu ko “te iloa o te tino i a ia eiloa.” E se pelā mo manu katoa i te lalolagi, ne tuku mai ne te Atua ki a tatou a te atamai ke iloa ne tatou a tatou eiloa. E mafai o ma‵nava malie aka tatou kae toe iloilo ifo ki a tatou eiloa e uiga ki ‵tou amioga me e ‵lei io me ikai. I te fai pelā me se molimau i loto i a tatou, io me se famasino, e mafai o iloilo ne ‵tou loto lagona ‵tou faifaiga, ‵tou kilokiloga, mo ‵tou filifiliga e fai. E mafai o takitaki i ei tatou ke fai se fakaikuga ‵lei io me e fakailoa mai ki a tatou māfai se mea masei. Mai tua ifo i ei, e mafai o fakamafanafana mai mō te faiga o se filifiliga ‵lei io me e fakasala ne ia tatou ki te loto mafatia māfai ne fai se filifiliga masei.

4, 5. (a) E iloa pefea ne tatou me ne tofu a Atamu mo Eva mo te loto lagona, kae se a te mea ne iku mai ona ko te soliga o te tulafono a te Atua? (e) Ne a mea e fakaasi mai me ne galue te loto lagona i loto i tino fakamaoni mai mua atu o te kau Kelisiano?

4 Ne tuku atu eiloa mai te kamataga a te malosi o te mafaufau tenei ki loto i te tagata mo te fafine. Ne fakaasi mai ne Atamu mo Eva me ne tofu lāua mo se loto lagona. E  matea ne tatou a te fakamaoniga o te mea tenā ona ko te lā ‵ma i te taimi ne agasala ei laua. (Kenese 3:7, 8) E fakafanoanoa me ne seki aoga ki a laua lā lagonaga ma‵sei i te taimi tenā. Ko oti ne ‵teke tonu atu lāua ki te tulafono a te Atua. Tela la, ne filifili laua mo te iloa tonu ke fai laua mo tino ‵teke, ko fili o te Atua. E pelā me ne tino ‵lei katoatoa, ne iloa tonu ne laua a lā mea ne fai kae ne seki mafai o toe ‵foki atu laua ki te Atua.

5 E se pelā mo Atamu mo Eva, e tokouke a tino sē ‵lei katoatoa ne faka‵logo eiloa ki olotou loto lagona. E pelā mo te tino fakamaoni ko Iopu telā ne mafai o fai mai penei: “Ka tumau eiloa au i toku talitonuga i au e tonu; a toku mafaufau e ‵lei faeloa.” * (Iopu 27:6) Ne fakaeteete malosi a Iopu o fakalogo ki tena loto lagona ke takitaki ei ana faifaiga mo ana fakaikuga. Tela la, ne mafai ei o fai mai mo te lotomalie tonu me ne seki fakasala io me fakapuapuaga a ia ne tena loto lagona ki te mā mo te māsiasi. Mafaufau la ki te ‵kese o Iopu mo Tavita. I te taimi ne fakaasi atu ei ne Tavita te se āva ki a Saulo, te tupu fakaekegina a Ieova, “ne ma‵sei ‵ki ana lagonaga fakamuli ifo.” (1 Samuelu 24:5, Tusi Paia, Samoa) Ne aoga eiloa a te masei o te loto lagona o Tavita ki a ia, me ne akoako atu ke se toe fai ne ia se vaegā mea penā fakamuli ifo.

6. E fakaasi mai pefea i te loto lagona se meaalofa mō tino katoa?

6 E mata, e maua fua ne tavini a Ieova te meaalofa ko te loto lagona? Mafaufau ki pati fakaosofia a te apositolo ko Paulo: “E se maua ne fenua fakaa‵tea te Tulafono, kae kafai e fai ne latou a fakatonuga o te Tulafono i te loto lagona,  ne tulafono mea konā ki a latou; kae tonu me e seai se lotou Tulafono. E fakaasi mai ei ne latou me i mea kolā e manako ki ei te Tulafono, e tusi i olotou loto; kae molimau foki olotou mafaufau me ‵tonu, i te mea i nisi taimi ko fakamasino io me faka‵sao latou ne olotou manatu [“loto lagona,” NW].” (Loma 2:14, 15) Ke oko ki a latou kolā e seai lele se lotou iloa i tulafono a Ieova e mafai o fakamalosi aka ne olotou loto lagona i nisi taimi ke gasue‵sue e ‵tusa mo akoakoga fakavae a te Atua.

7. Kaia e mafai ei o ‵se te loto lagona i nisi taimi?

7 Kae e mafai o ‵se te loto lagona i nisi taimi. Kaia? Ia, kafai e tuku atu se kamupasi i tafa o se fiti, e mafai o ‵lou ne te fiti tenā ke fakasino atu tena nila ki se isi koga i lō matu. Kae kafai e fakaaoga e aunoa mo se mape ‵lei, e mafai eiloa o se aoga te kamupasi tenā. E penā foki māfai e fakamalosigina tatou ne manakoga o ‵tou loto, e mafai o ‵taki tatou ne ‵tou loto lagona ki te koga ‵se. Kae kafai e fakaaoga e aunoa mo te fakatakitakiga mautinoa a te Muna a te Atua, ko se mafai ei ne tatou o faka‵kese a te mea tonu mo te mea ‵se i mea tāua e uke. E tonu, e ‵tau o maua ne tatou te takitakiga a te agaga tapu o Ieova ko te mea ke galue faka‵lei ‵tou loto lagona. Ne tusi mai a Paulo: “Me i toku mafaufau tonu, e molimau foki ki a au i te Agaga Tapu.” (Loma 9:1) Kae e mafai la pefea o fakamautinoa aka ne tatou me e fetaui ‵tou loto lagona mo te agaga tapu o Ieova? E mafai o fai penā mai te akoako faka‵lei atu ki ei.

TE AUALA E AKOAKO EI TE LOTO LAGONA

8. (a) E mafai pefea o pokotia te loto lagona i te loto, kae se a te mea e ‵tau o fakamuamua ne tatou i ‵tou fakaikuga? (e) Kaia e se lava sāle i ei te loto lagona ‵ma o se Kelisiano? (Ke onoono ki te fakamatalaga mai lalo.)

8 E mafai pefea o fai sau fakaikuga telā e fakavae ki te  loto lagona? E foliga mai me e onoono fua a nisi tino ki loto i a latou, iloilo aka olotou lagonaga, ko fai ei se fakaikuga e uiga ki te mea ka fai. Ko fai mai ei latou, “Ia, e se masei i ei toku loto lagona.” E mafai o ‵se ‵ki eiloa a manakoga o te loto, ke oko ki te fakagasuesue ne ia o te loto lagona i se auala sē ‵lei. E fai mai te Tusi Tapu e uiga ki ei: “Ko te ‵toe mea tafasili foki eiloa i te faka‵se tino; e se mafai o fai ke ‵lei, me ko tō masaki.” (Ielemia 17:9) Tela la, e se ‵tau o fai a manakoga o ‵tou loto mo fai a toe mea tāua ke mafau‵fau ki ei. I lō te fai penā, e ‵tau o fakamuamua ne tatou a mea kolā e fiafia ki ei a Ieova te Atua. *

9. Se a te uiga o te mataku ki te Atua kae e mafai pefea o pokotia ‵tou loto lagona i ei?

9 Kafai e fakavae tonu ‵tou fakaikuga ki ‵tou loto lagona kolā ko oti ne akoakogina, ka fakaasi atu i ei te ‵tou ma‵taku ki te Atua, kae e se ko ‵tou manakoga totino. Mafaufau ki te fakaakoakoga ‵lei tenei. Ne maua ne te kovana fakamaoni ko Neemia te saolotoga ke maua ne ia ne tupe mai lafoga o tino i Ielusalema. Kae ne seki fai ne ia te mea tenā. Kaia? Ne ita fitifiti a ia ma mafaufau fua ki te sē fiafia o Ieova māfai e fakafi‵ta atu ki ana tino. Ana pati: “Ka ko au e se fai penā, me i a au e mataku ki te Atua.” (Neemia 5:15) E tāua ‵ki eiloa te mataku tonu ki te Atua, ko te mataku mo te loto kātoa ke mo a ma fakafanoanoa atu ki te ‵tou Tamana i te lagi. Ko te vaegā mataku mo te āva tenā ka fakamalosi mai ke ‵sala atu tatou ki te takitakiga mai te Muna a te Atua māfai e fai ‵tou fakaikuga.

10, 11. Ne a akoakoga fakavae i te Tusi Tapu e fetaui mo te mataupu ko te inu ki meainu ma‵losi, kae e fakagalue aka pefea ne tatou i ei te takitakiga a te Atua?

 10 E pelā mo te mataupu e uiga ki meainu ma‵losi. Tenei eiloa te fakaikuga e ‵tau o fai ne te tokoukega o tatou i maopoopoga fakafia‵fia, E mata, ka inu au io me ikai? Muamua la, e ‵tau o akoako ne tatou a tatou eiloa. Ne a akoakoga fakavae i te Tusi Tapu e mafai o fakaaoga ki te mea tenei? Ia, e se taku fakamasei ne te Tusi Tapu a te fakaaoga ‵tau o meainu ma‵losi. E tavae atu ki a Ieova mō te meaalofa ko te uaina. (Salamo 104:14, 15) Kae e taku fakamasei ne te Tusi Tapu a te konā mo te faiga o fakafiafiaga o te konā. (Luka 21:34; Loma 13:13) E se gata i ei, e aofia foki te konā i nisi agasala matagā, e pelā mo te finalalolagi mo te mulilua. *1 Kolinito 6:9, 10.

11 E akoako kae fakamalosigina te loto lagona o se Kelisiano ne vaegā akoakoga fakavae penā. Tela la, kafai e ‵tau o fai se fakaikuga e uiga ki te inu kava i se maopoopoga fakafiafia, sili ifo ki a tatou eiloa a fesili penei: ‘Se a te vaegā fakafiafiaga tenei? E mata, e mafai o iku atu ki te faivalevale e pelā mo fakafiafiaga o te konā? Ne a oku manakoga? E mata, a te kava ko toku fina, ko fakalagolago au ki ei, ko fakaaoga ne au ke pule mai ki oku lagonaga mo aku amioga? E mata, e lava toku loto pulea ke faka‵tau taku inu?’ I taimi e mafaufau ‵loto ei tatou ki akoakoga fakavae i te Tusi Tapu mo fesili kolā e ‵sae aka i ei, se mea ‵lei ke ‵talo tatou mō te takitakiga a Ieova. (Salamo 139:23, 24) I te faiga tenei, e ‵kami ei ne tatou a Ieova ke takitaki ne ia tatou ki tena agaga tapu. E akoako foki ne tatou ‵tou loto lagona ko te mea ke fetaui mo akoakoga fakavae a te Atua. Kae e isi foki se mea  e ‵tau o mafaufau faka‵lei ki ei i te faiga o ‵tou fakaikuga.

KAIA E ‵TAU EI O MAFAU‵FAU TATOU KI LOTO LAGONA O NISI TINO?

E mafai o fesoasoani atu a te loto lagona telā ko oti ne akoakogina kit e Tusi Tapu ke fai sau fakaikuga me e inu koe ki meainu ma‵losi io me ikai

12, 13. Ne a nisi pogai e kese‵kese ei a loto lagona o Kelisiano, kae e ‵tau o pefea ‵tou faifaiga ki vaegā mea penā?

12 Kāti ka poi koe i nisi taimi i te lasi o te ‵kese o loto lagona o Kelisiano. E se fiafia loa se tino e tokotasi ki se faifaiga io me se tuu; a ko te suā tino e fiafia ki ei kae e se matea ne ia se pogai ke taku fakamasei ei te mea tenā. E pelā mo te inu ‵tau, e fiafia eiloa se tino o inu fakatasi kae sau‵tala mo nai taugasoa i se afiafi; a ko te suā tino e se fiafia ki ei. Kaia e ‵kese ei a vaegā mea konā, kae e pokotia pefea ‵tou fakaikuga i ei?

13 E uke a pogai e kese‵kese ei a tino. E lasi ‵ki te ‵kese o auala ne puti aka i ei a tino. E isi ne tino e iloa ‵lei ne latou olotou vāivāiga kolā ne fei‵kiki mo latou i aso ko ‵teka—kāti ne seki manuia faeloa olotou taumafaiga. (1 Tupu 8:38, 39) E uiga ki meainu ma‵losi, e fakaeteete malosi eiloa a vaegā tino penā i ei. Kafai e asi mai se vaegā tino penā ki tou fale, kāti ka fai ne tena loto lagona ke se inu a ia. E mata, ka se fiafia koe ki ei? E mata, ka faimalo ne koe ke inu? Ikai. Faitalia me iloa ne koe ana pogai io me ikai—ko pogai kolā kāti ko oti ne filifili ne ia ke gata fua i a ia eiloa e uiga ki te mea tenei—ka fakamalosi eiloa koe ne te alofa fakataina ke talia ne koe.

14, 15. Se a te mataupu ne kese‵kese i ei a loto lagona o tino i te fakapotopotoga Kelisiano i te senitenali muamua, kae ne a fautuaga a Paulo e uiga ki ei?

14 Ne matea ne te apositolo ko Paulo me ne ‵kese sāle a loto lagona o Kelisiano i te senitenali muamua. I te taimi tenā, ne seki fia‵fia eiloa a nisi Kelisiano e uiga ki mea‵kai kolā ne ofo atu e pelā me ne taulaga ki tupua. (1 Kolinito 10:25) Ne ‵lei fua te loto lagona o Paulo e uiga ki mea‵kai kolā ne fakatau atu fakamuli i maketi. E seai ne aoga o tupua  ki a ia; e se i a tupua a mea‵kai kolā ne māfua mai i a Ieova kae i a Ia eiloa a mea katoa konā. Kae ne malamalama a Paulo me e se ‵pau te kilokiloga a nisi tino e uiga ki te mea tenei. Kāti ne aofia malosi a nisi tino i te ifo ki tupua a koi tuai o fai latou mo fai ne Kelisiano. E se fakafiafia atu ki a latou so se mea telā ne aofia i faifaiga ko te ifo ki tupua. Ne faka‵lei aka pefea ne Paulo te mataupu tenei?

15 Ana muna: “Ko tatou kolā e ma‵losi i te fakatuanaki, e ‵tau mo tatou o fesoasoani ki mea e se mafai ne tino vāi‵vai, kae ke se fakafiafia ifo tatou ki a tatou eiloa. Me i a Keliso e seki fakafiafia ki a ia eiloa.” (Loma 15:1, 3) Ne fai mai a Paulo me e ‵tau o fakamuamua ne tatou a manakoga o ‵tou taina i lō tatou, e pelā eiloa mo te mea ne fai ne Keliso. I ana nisi fakamatalaga, ne fai mai a Paulo me e ‵lei atu  māfai e se kai lele a ia ki meafasi māfai e fakavāivāi atu te mea tenā ki se mamoe tāua telā ko oti ne maua ne ia te aoga o te ola o Keliso.Faitau te 1 Kolinito 8:13; 10:23, 24, 31-33.

16. Kaia e ‵tau ei o ‵kalo keatea a tino kolā e se malosi ‵lei olotou loto lagona mai te fakamasinoga o tino kolā e ‵kese mai i a latou?

16 I te suā feitu, a latou kolā e se malosi ‵lei olotou loto lagona e se ‵tau o taku fakamasei ne latou a nisi tino katoa, mai te faimalo atu ke fai olotou loto lagona e pelā mo latou. (Loma 14:10) E tonu, a te ‵toe fakaaogaga sili o te loto lagona ko te fai pelā me se famasino i loto i a tatou, e se ko te fai mo fai se pogai ke fakamasino atu ki nisi tino. Ke masaua a pati a Iesu: “Sa fakamasino atu ki nisi tino, ko te mea ke mo a e fakamasino koutou ne te Atua.” (Mataio 7:1) E ma‵nako a tino katoa i te fakapotopotoga ke ‵kalo keatea mai te faiga o kinauga e uiga ki mea e ‵tusa mo te  loto lagona o te tino. I lō te fai penā, e ati aka ne tatou te alofa mo te fealofani, o fakatau ati aka kae e se ko te fakatau fakamasei.Faitau te Loma 14:19.

E AOGA PEFEA KI A TATOU TE LOTO LAGONA ‵LEI

E mafai o takitaki tatou ne se loto lagona ‵lei i te ‵tou Malaga i loto i te olaga, ke maua i ei te fiafia mo te filemu

17. Se a te mea ko oti ne tupu ki loto lagona o tino e tokouke i aso nei?

17 Ne tusi mai a te apositolo ko Petelu: “Tausi ke ‵ma otou loto lagona.” (1 Petelu 3:16, Tusi Paia, Samoa.) A te loto lagona telā e ‵ma i te kilokiloga a Ieova se meaalofa lasi ‵ki eiloa. E se fai pelā mo loto lagona o tino e tokouke i aso nei. Ne fakamatala mai ne Paulo a tino kolā ko “‵mate foki olotou mafaufauga ‵lei [loto lagona], e pelā me ne ‵sunu ki se fiti ‵vela.” (1 Timoteo 4:2) E ‵sunu ne se fiti ‵vela a te ‵kano ke ‵pula kae seai sena mea e lagona. E maua ne tino e tokouke i aso nei se loto lagona telā ko oti eiloa ne mate—ko tō ‵pula malosi kae ko seai sena mea e lagona, ko se mafai ei o tuku mai ne ia ne polopolokiga, mo lagonaga ma‵sei o te mā mo te māsiasi ona ko mea ‵se ne fai. E tokouke a tino i aso nei ko se amanaia ki lagonaga o te mā māfai e fai ne latou se mea ‵se.

18, 19. (a) Ne a mea aoga e mafai o maua mai i lagonaga o te mā mo te māsiasi? (e) Se a te mea e mafai o fai ne tatou māfai e tumau eiloa te fakasala o tatou ne ‵tou loto lagona ona ko agasala kolā ne fai i aso ko ‵teka kae ko oti ne sala‵mo tatou i ei?

18 E tonu, e mafai o fai a lagonaga o te mā e pelā me se auala e fakaasi mai ei ne te loto lagona me ko oti ne fai ne tatou se mea ‵se. Kafai e fai ne lagonaga penā ke salamō se tino agasala, e mafai eiloa o fakamagalogina te ‵toe agasala matagā. E pelā mo te tupu ko Tavita, ne fai ne ia se agasala matagā kae ne fakamagalogina maise eiloa ona ko tena salamō tonu. Ona ko tena takalialia ki tena mea ‵se ne fai mo tena fakaikuga ke fakalogo ki tulafono a Ieova mai te taimi tenā o fano ki mua, ne fai ei ke matea tonu ne ia i a Ieova “e ‵lei kae loto fakamagalo.” (Salamo 51:1-19; 86:5) Kae e a māfai e tumau eiloa a lagonaga o te mā  mo te māsiasi kae ko oti ne sala‵mo kae fakamagalogina tatou?

19 I nisi taimi ko tō lasi te fakasalaga e fai ne te loto lagona, me e fakalogo‵mae ne ia a lagonaga o te tino agasala i se vaitaimi leva, ko se fai ei mo fai se mea aoga. I vaegā mea penā, kāti e manakogina ke fakatalitonu atu ki vaegā loto penā i a Ieova e sili atu i lagonaga o tino katoa. E ‵tau o tali‵tonu tatou kae talia tena alofa mo tena fakamagaloga, e pelā eiloa mo fakamalosiga e fai ne tatou ke fai ne nisi tino. (Faitau te 1 Ioane 3:19, 20.) I te suā feitu, e aumai ne te loto lagona ‵ma se filemu, se tokagamalie, mo te fiafia lasi telā e faigata o maua i te lalolagi tenei. E tokouke a tino kolā ne aofia mua i agasala matagā ko oti ne maua ne latou se fakatapūga gali kae ko maua ne latou i aso nei se loto lagona ‵lei i te lotou tavini atu ki a Ieova te Atua.1 Kolinito 6:11.

20, 21. (a) Ne fakatoka pefea te tusi tenei ke fesoasoani atu ki a koe? (e) E pelā me ne Kelisiano, se a te saolotoga telā e maua ne tatou, kae e ‵tau o fakaaoga pefea ne tatou?

20 Ne fakatoka te tusi tenei ke fesoasoani atu ke maua ne koe te fiafia tenā, ke maua ne koe se loto lagona ‵lei i aso fakaoti kae faiga‵ta katoa koi ‵toe o te olaga masei tenei a Satani. E tonu, e se fakamatala atu i te tusi tenei a tulafono mo akoakoga fakavae katoa i te Tusi Tapu kolā e ‵tau o mafaufau koe ki ei kae fakaaoga ki tulaga kolā e ‵sae aka i aso takitasi. E se gata i ei, ke mo a ma fakamoemoe koe ke maua ne tulafono mautinoa kae faigofie e uiga ki faifaiga o te loto lagona. A te pogai o te tusi tenei ko te fesoasoani atu ke akoako kae fakamalosi aka tou loto lagona mai te sukesuke ki auala e fakaaoga ei ne koe te Muna a te Atua i tou olaga i aso takitasi. E se pelā mo te Tulafono a Mose, e ‵kami ne “te tulafono a Keliso” ana tino tapuaki ke sili atu te lotou ola e ‵tusa mo olotou loto lagona mo akoakoga fakavae i lō tulafono tusia. (Kalatia 6:2) Tela la, e  tuku mai ne Ieova se saolotoga fakaofoofogia ki Kelisiano. Kae fakamasaua mai tena Muna ke mo a ma fakaaoga ne tatou te saolotoga tenā “o ufiufi so se mea masei.” (1 Petelu 2:16) I lō te fai penā, e tuku mai ne te saolotoga tenā se avanoaga tafasili i te gali ke fakaasi atu te ‵tou a‵lofa ki a Ieova.

21 Mai te mafau‵fau fakatasi mo te faiga o ‵talo ki te ‵toe auala ‵lei e mafai ei o ola koe mai lalo i akoakoga fakavae i te Tusi Tapu kae fakagalue aka au fakaikuga, ko fakatumau ei ne koe tau fakatokaga tāua telā ne kamata i te taimi ne iloa muamua ei ne koe a Ieova. Ka akoakogina i ei te “malosi o tou mafaufau” e “auala i tena fakaaogaga.” (Epelu 5:14, Tusi Paia, Samoa) Ka aoga ki a koe tou loto lagona telā ko oti ne akoakogina ki te Tusi Tapu i aso katoa o tou olaga. E pelā mo te takitaki o te tino faimalaga ne te kamupasi, ka fesoasoani atu eiloa tou loto lagona ke fai ne koe a fakaikuga kolā e fakafiafia atu ki tou Tamana i te lagi. Tenei eiloa te auala mautinoa e tumau ei koe i te alofa o te Atua.

^ pala. 5 E seai se pati tonu mō te “loto lagona” e sae mai i te Tusi Tapu i te ‵gana Epelu. Kae e manino ‵lei a te galuega o te loto lagona i vaegā fakaakoakoga penei. E fakasino atu eiloa a mea katoa konei ki se vaega fakapito i loto i te tagata—ko tena loto lagona. E nofo pelā ki se 30 taimi e sae mai ei te tugapati ko te “loto lagona” i te Tusi Tapu i te ‵gana Eleni.

^ pala. 8 E fakaasi mai i te Tusi Tapu me e se lava sāle i te mauaga o se loto lagona ‵ma. E pelā mo pati a Paulo: “E se iloa ne au se mea e ‵se ei au, kae se ko tena uiga me ko au e tonu. Ko te Aliki e fakamasino ne ia a au.” (1 Kolinito 4:4) Ke oko ki tino kolā e fakasaua atu ki Kelisiano, e pelā mo Paulo i aso mua, e mafai o fai ne latou te mea tenā mo te loto lagona ‵ma ona ko te lotou tali‵tonu me e talia ne te Atua. E tāua ‵ki ke ‵ma ‵tou loto lagona ki a tatou kae ke ‵ma foki i te kilokiloga a te Atua.Galuega 23:1; 2 Timoteo 1:3.

^ pala. 10 E ‵tau o iloa ne tatou me e fai mai a tokita e tokouke me e se mafai o pule atu a tino kolā ko u‵miti ki te kava ki olotou mea e inu; a te “inu faka‵tau” ki a latou ko te sē inu eiloa.