Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

 MATAUPU FAKAOPOOPO

Te Pulou o te Ulu—Ko te Taimi Fea e Pulou ei Kae Kaia?

Te Pulou o te Ulu—Ko te Taimi Fea e Pulou ei Kae Kaia?

Ko te taimi fea kae kaia foki e pulou ei ne se fafine Kelisiano tena ulu i tena tapuakiga? Ke mafau‵fau tatou ki pati fakaosofia a te apositolo ko Paulo e uiga ki te mataupu tenei. E tuku mai ne ia te fakatakitakiga e ‵tau o maua ne tatou i te faiga o fakaikuga ‵lei, kolā e fakaaloalo atu ei ki te Atua. (1 Kolinito 11:3-16) E fakaasi mai ne Paulo a manatu  tāua e tolu ke mafau‵fau ki ei: (1) ko faifaiga kolā e ‵tau ei o pulou ne se fafine tena ulu, (2) ko fakanofonofoga kolā e ‵tau ei o fai penā, mo te (3) ko pogai e fakaaoga ei ne ia te tulafono tenei.

Faifaiga. E taku mai ne Paulo a mea e lua: ko te ‵talo mo te folafola atu o te muna. (Fuaiupu e 4, 5) E tonu, a te ‵talo ko te faipati atu mo te āva ki a Ieova. I aso nei, a te folafola atu o te muna e fakasino atu foki ki so se akoakoga faka-te-Tusi Tapu telā e fai ne se faifeau Kelisiano. E mata, e taku mai ne Paulo me e ‵tau eiloa o pulou ne se fafine tena ulu i so se taimi e ‵talo io me e akoako atu ei ne ia a muna‵tonu mai te Tusi Tapu? Ikai. E tāua ‵ki eiloa te fakanofonofoga telā e ‵talo io me e akoako atu ei se fafine.

Ko fakanofonofoga. E taku mai i pati a Paulo a fakanofonofoga, io me ko fakatokaga e lua—ko te kāiga mo te fakapotopotoga. Ana muna: “A te tagata e sili foki i tena avaga . . . So se fafine foki e ‵talo tavae io me folafola atu te muna a te Atua i mua o tino mo tona ulu sē pulou, ko te sē āva tenā ki tena avaga.” (Fuaiupu e 3, 5) I te fakatokaga o te kāiga, a te avaga a te fafine ko te tino telā e ‵tofi aka ne Ieova mo fai te ulu o te fafine. Seiloga ke matea ne tou fafine te malosi pule o tena avaga, ka fakamasiasi eiloa ne ia tena avaga māfai e fai ne ia a tiute kolā ne tuku ne Ieova ki tou tagata. E pelā mo te fai ne ia o se akoga faka-te-Tusi Tapu kae nofo tena avaga, ka fakaasi atu i ei me talia ne ia tena tulaga pule mai te pulou o tena ulu. E ‵tau o fai penā faitalia me se tino papatiso tena avaga io me ikai, ona ko ia ko te ulu o te kāiga. * Kafai e ‵talo io me e akoako atu a ia i mua o sena tama tagata papatiso, e ‵tau foki o pulou tena ulu, e se ona ko ia ko te ulu o te kāiga, kae ona ko te malosi pule telā ne tuku atu ki tagata papatiso  i te fakapotopotoga Kelisiano.

Ne fakaasi mai ne Paulo te tulaga i te fakapotopotoga i ana pati konei: “Kae kafai so se tino e isi sena akoakoga e tai ‵kese mo te mea tenei e akoako atu ne au, konei la aku muna e fai atu ki a ia; tenei eiloa te tu ko masani ei tatou i tapuakiga i ekalesia.” (Fuaiupu e 16) E tuku atu te malosi pule ki tagata papatiso i te fakapotopotoga Kelisiano. (1 Timoteo 2:11-14; Epelu 13:17) Ko tagata fua e faka‵sopo mo fai a toeaina mo tavini fakafaifeau kae e tuku atu ne te Atua ki a latou te tiute ke tausi atu ki te lafu a te Atua. (Galuega 20:28) Kae i nai taimi, e mafai o manakogina ke fai ne se fafine Kelisiano se tiute telā e fai sāle eiloa ne se tagata papatiso. E pelā mo te mea tenei, kāti e manakogina ke takitaki ne ia te fakatasiga mō te galuega talai ona ko te mea e seai se tagata papatiso e nofo i konā. Io me e fai ne ia se akoga faka-te-Tusi Tapu telā ko leva ne fakatoka i mua o se taina papatiso. Ona ko mea konā ne vaega katoa o galuega a te fakapotopotoga Kelisiano, e ‵tau o pulou tena ulu ke fakailoa atu i ei me ko fai ne ia se tiute telā e fai sāle eiloa ne se taina.

I te suā feitu, e uke a vaega o te tapuakiga e se manakogina i ei ke pulou a ulu o tuagane. E pelā mo mea konei, e se manakogina ke pulou te ulu o te fafine māfai e fai ana manatu i fakatasiga faka-Kelisiano, i te galuega talai mai fale ki fale fakatasi mo tena avaga io me se isi taina papatiso, io me māfai e akoako kae ‵talo fakatasi mo ana tama‵liki seki papatiso. E tonu, e mafai o ‵sae aka a nisi fesili, kae kafai e se iloa tonu ne se tuagane se mea, e mafai  o fai ne ana sukesukega fakaopoopo ki ei. * Kafai koi fakalotolotolua a ia kae ‵lei tena loto lagona, e se masei ke pulou tena ulu, e pelā mo te mea e fakaasi mai i te ata.

Pogai. E maua ne tatou i te fuaiupu e 10 a pogai e lua e ‵tau ei o fakataunu ne se tuagane Kelisiano te manakoga tenei: “Ona ko agelu, ko ‵tau ei o ufiufi a ulu o fafine, e fakaasi ei i a latou e mai lalo o te pulega a olotou avaga.” Tela la, a te pogai muamua e pulou ei te ulu o te fafine, e fakaasi atu i ei me e matea ne ia te malosi pule telā ne tuku ne Ieova ki luga i taina papatiso i te fakapotopotoga. E fakaasi atu i ei tena alofa mo te alofa fakamaoni ki a Ieova te Atua. A te lua o pogai e maua i pati konei “ona ko agelu.” E pokotia pefea a agelu ma‵losi i se fafine telā e pulou tena ulu?

E fia‵fia a agelu ke iloa ne latou me e matea ne tino katoa te malosi pule o te Atua i te fakapotopotoga saukātoa a Ieova, i te lagi mo te lalolagi. E aoga foki ki a latou a fakaakoakoga ‵lei a tino sē ‵lei katoatoa i te feitu tenei. Me e ‵tau o faka‵logo latou ki fakatokaga a Ieova—se tofotofoga telā ne taka‵vale i ei te fia o agelu i taimi ko ‵teka. (Iuta 6) Nei la, e mafai o matea ne agelu se fafine Kelisiano e poto kae apo atu i lō se taina papatiso i te fakapotopotoga; e tiga te feitu tenā e toka ‵lei eiloa a ia o fakaasi atu tena fakalogo ki te pulega a tou tagata. I nisi taimi, a te fafine se Kelisiano fakaekegina telā ka fai fakamuli mo fai se sui e tokotasi o Keliso. Ka tavini fakamuli atu eiloa se fafine penā i se tulaga telā e maluga atu i agelu kae ka pule fakatasi mo Keliso i te lagi. Ko oko eiloa i te gali o te fakaakoakoga telā e fai nei mō agelu! E maua eiloa ne tuagane katoa se tauliaga fakapito ke fakaasi atu ne latou te fakalogo mo te loto maulalo e auala i te lotou a‵lofa fakamaoni kae faka‵logo i mua o te fia miliona o agelu fakamaoni!

^ pala. 3 E se mafai o ‵talo ki luga se fafine Kelisiano i mua o tena avaga talitonu seiloga ke tupu se fakalavelave e pelā mo te sē mafai ne tena avaga o faipati ona ko te masaki.

^ pala. 2 Mō nisi fakamatalaga, fakamolemole ke onoono ki The Watchtower i a Iulai 15, 2002, te itulau e 26-27, mo te lomiga i a Fepuali 15, 1977, te itulau e 125-128.