Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Akoako Au Tama‵liki

 MATAUPU 1

Se Mea ‵Funa Telā e Fia‵fia Tatou ke Iloa Atu

Se Mea ‵Funa Telā e Fia‵fia Tatou ke Iloa Atu

Kai fai atu aka eiloa ne se tino ki a koe se mea ‵funa?— * E fakaasi mai eiloa i te Tusi Tapu se mea ‵funa fakapito telā e taku ki “te mea ‵funa kae tapu.” E tapu me ne aumai mai te Atua. Kae e taku ki se mea ‵funa me e seai se mea e iloa ne tino e uiga ki ei. Ke oko ki agelu, ne ma‵nako ke iloa ne latou te mea tenei. E fia iloa ne koe me se a te mea ‵funa tenā?—

Se a tau faka‵tau me ne a mea ne taumafai a agelu ke iloa ne latou?

I aso mua eiloa, ne faite ne te Atua a te tagata mo te fafine muamua. A igoa o lāua ko Atamu mo Eva. Ne tuku atu ne te Atua ki a lāua se koga gali mo lā ‵nofo e igoa ki te fatoaga o Etena. Moi ne faka‵logo a Atamu mo Eva ki te Atua, ne mafai eiloa ne lāua mo lā tama‵liki o fai te lalolagi kātoa e pelā mo te fatoaga tenā. Kae ne mafai o ‵nofo foki lāua i te Palataiso ki te se-gata-mai. Kae e masaua ne koe a te mea ne fai ne Atamu mo Eva?—

Ne seki faka‵logo a Atamu mo Eva ki te Atua, kae tenā eiloa te pogai e se ‵nofo ei tatou i te palataiso i aso nei. Kae ne fai mai te Atua me ka fai ne ia te lalolagi kātoa mo fai se koga gali, kae ka ola ki te se-gata-mai kae fia‵fia foki a tino katoa i ei. Ka fai pefea ne ia te mea tenei? Ne leva ‵ki eiloa te taimi ne seki iloa ei ne tino a te mea tenei. A te mea tenei se mea ‵funa.

I te taimi ne vau ei a Iesu ki te lalolagi, ne akoako atu ne ia a tino ki mea e uke atu e uiga ki te mea ‵funa tenei. Ne fai mai a ia me se mea e uiga ki te Malo o te Atua. Ne fai a Iesu ki tino ke ‵talo atu ke oko mai te Malo tenei. Ka fai ne ia te lalolagi mo fai se palataiso gali.

E mata, e fiafia koe ke iloa atu a te mea ‵funa tenei?— Masaua la me ko tino fua kolā e faka‵logo ki a Ieova ka ola i te Palataiso. E fakaasi mai i te Tusi Tapu a tala e uke e uiga ki tāgata mo fāfine kolā ne faka‵logo ki a Ieova. E mata, e fia iloa ne koe a mea e uiga ki a latou?— Ke onoono aka tatou ki nisi o latou mo te auala e mafai ei o fai tatou e pelā mo latou.

FAITAU I TAU TUSI TAPU

^ pala. 3 I talā katoa konei, ka lavea ne koe a te fakailoga tenei (—) mai tua o nisi fesili. Tenā te taimi ke mānava kae tuku atu ei te avanoaga ki tau tama ke tali mai.