Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Akoako Au Tama‵liki

 MATAUPU 11

Ne Tusi Mai Latou e Uiga ki a Iesu

Ne Tusi Mai Latou e Uiga ki a Iesu

E mata, e lavea ne koe a tāgata i te ata?— Ko Mataio, Maleko, Luka, Ioane, Petelu, Iakopo, Iuta, mo Paulo. Ne ola a tāgata katoa konei i te vaitaimi foki ne ola ei a Iesu, kae ne tusi ne latou a mea e uiga ki a Iesu. Ke onoono aka tatou ki mea e uiga ki a latou.

Ne a mea ko iloa ne koe e uiga ki tāgata konei?

E tokotolu mai i a latou ne apositolo kolā ne talai fakatasi mo Iesu. E iloa ne koe me ko oi te tokotolu konā?— Mataio, Ioane, mo Petelu. Ne iloa ‵lei eiloa ne te apositolo  ko Mataio mo Ioane a Iesu, kae ne tusi mai ne lāua a tusi takitasi e uiga ki te olaga o Iesu. Ne tusi mai ne te apositolo ko Ioane a te tusi o Fakaasiga mo tusi e tolu kolā e taku ki te Muamua Ioane, Lua Ioane, mo te Tolu Ioane. Ne tusi ne te apositolo ko Petelu a tusi e lua i te Tusi Tapu. E taku ki te Muamua Petelu mo te Lua Petelu. I te lua o ana tusi, ne tusi mai a Petelu e uiga ki te taimi ne faipati mai ei a Ieova i te lagi kae fai atu e uiga ki a Iesu: ‘Tenei taku tama. E alofa kae fakamatamata foki au ona ko ia.’

E akoako mai foki ne nisi tāgata i te ata a mea e uiga ki a Iesu i tusi kolā ne tusi ne latou. E tokotasi mai i a latou ko Maleko. Kāti ne nofo atu a ia i te taimi ne puke fakapagota ei a Iesu kae lavea atu ne ia a mea katoa ne ‵tupu. A te suā tino ko Luka. A ia se tokita kae kāti ne fai mo fai se Kelisiano mai tua o te taimi ne mate ei a Iesu.

A te suā tokolua tino tusitala o te Tusi Tapu ko taina fo‵liki o Iesu. E iloa ne koe lā igoa?— A igoa o lāua ko Iakopo mo Iuta. Muamua la, ne seki tali‵tonu lāua ki a Iesu. Ne mafau‵fau foki eiloa lāua me i a ia ko tai fakavalevale. Kae ne tali‵tonu fakamuli lāua ki a Iesu kae fai mo fai ne Kelisiano.

A te suā tino tusitala o te Tusi Tapu telā e lavea atu ne koe i te ata ko Paulo. A koi tuai o fai a ia mo fai se Kelisiano, tena igoa ko Saulo. Ne takalialia a ia ki Kelisiano kae ne ma‵sei ‵ki ana faifaiga ki a latou. E iloa ne koe me se a te mea ne fai ei a Paulo mo fai se Kelisiano?— I te aso e tasi, ne faimalaga atu a Paulo i te auala kae ne lagona ei ne ia se tino e faipati atu ki a ia mai te lagi. Ko Iesu! Ne fesili atu a ia ki a Paulo: ‘Kaia e masei katoa ei koe ki a latou kolā e tali‵tonu mai ki a au?’ Mai tua ifo i konā, ne ‵fuli ei a Paulo kae fai mo fai se Kelisiano. Ne tusi ne Paulo a tusi o te Tusi Tapu e 14, mai i a Loma ki a Epelu.

E fai‵tau tatou ki te Tusi Tapu i aso katoa, ne?— Mai te faitau ki te Tusi Tapu, e tauloto ei tatou ki mea e uke atu e uiga ki a Iesu. E fia iloa ne koe a mea e uke atu e uiga ki a Iesu?—