Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Akoako Au Tama‵liki

 MATAUPU 5

Ne Tumau Eiloa a Samuelu i te Faiga o Mea ‵Lei

Ne Tumau Eiloa a Samuelu i te Faiga o Mea ‵Lei

Mai te taimi koi foliki ‵ki ei a Samuelu, ne nofo kae galue a ia i te faleie tapu, te koga telā e olo atu ki ei a tino ke tapuaki ki a Ieova. E iloa ne koe te auala ne nofo atu ei a Samuelu i te faleie tapu? Ke mafau‵fau muamua tatou ki te mātua o Samuelu, ko Hana.

Ne seki mafai o maua ne Hana se pepe faitalia me ne manako malosi a ia ki ei. Tela la, ne ‵talo atu tou fafine ki a Ieova kae fakamolemole atu ke fesoasoani atu ki a ia. Ne tauto atu tou fafine me kafai e isi sena tama tagata, ka uga atu ne ia ke nofo kae galue i te faleie tapu. Ne tali ne Ieova tena ‵talo kae ne maua ne tou fafine se tama tagata. Ne fakaigoa ne ia ki a Samuelu. Kae e pelā eiloa mo te tau­toga a Hana, i te taimi ko tolu io me ko fa ei a tausaga o Samuelu, ne avatu ne ia tou tagata ki te faleie tapu ke tavini atu ki te Atua i konā.

A Eli ko te faitaulaga sili i te faleie tapu. Ne ga‵lue foki ana tama tāgata e tokolua i konā. Masaua me i te faleie tapu ko te fale e tapuaki ei ki te Atua, kae e ‵tau o fai ne tino a mea ‵lei i konā. Kae ne fai ne tama tāgata a Eli a mea ma‵sei ‵ki. Ne lavea ne Samuelu a mea ne fai ne lāua. E mata, ne fai ne Samuelu a mea ma‵sei e pelā mo mea ne fai ne tama a Eli?— Ikai, ne tumau eiloa tou tagata i te faiga o mea ‵lei, e pelā eiloa mo te mea ko oti ne akoako atu ne ana mātua ke fai ne ia.

Se a tau faka‵tau me ne a mea ne ‵tau o fai ne Eli ki ana tama tāgata e tokolua konā?— Ne ‵tau o fakasala ne ia lāua. Ne seki ‵tau foki o toe talia ne ia lāua ke ga‵lue i te fale o te Atua. Kae ne seki fai ne Eli a te mea tenā, telā ne kaitaua ei a Ieova ki a ia mo ana tama tāgata e tokolua. Ne fakaiku aka ne Ieova ke fakasala ne ia latou.

Ne fai atu ne Samuelu te fekau a Ieova ki a Eli

I te po e tasi ne moe ei a Samuelu, ne lagona ne ia se tino e kalaga atu ki a ia: ‘Samuelu!’ Ne tele atu tou tagata ki a Eli, kae ne fai atu a Eli: ‘Ne seki kalaga atu eiloa au ki a koe.’ Ne tupu fakalua te mea tenei. Mai tua o te tolu o taimi, ne fai atu a Eli ki a Samuelu me kafai e toe lagona ne ia te leo, e ‵tau o fai atu a ia penei: ‘Ieova, fakamolemole faipati mai, au tenei e fakalogologo atu.’ Tela la, ne fai eiloa ne Samuelu te mea tenā. Ne fai atu ei a Ieova ki a Samuelu: ‘Fai ki a Eli me ka fakasala ne au tena kāiga mō mea ma‵sei ne fai ne latou.’ Se a tau faka‵tau me ne faigofie ki a Samuelu ke fai atu ki a Eli a te fekau tenei?— Ikai, ne seki faigofie. Kae e tiga eiloa ne mataku a Samuelu, ne fai eiloa ne ia a te mea ne fai atu a Ieova ke fai ne ia. Ne taunu eiloa a pati a Ieova. Ne tamate a tama tāgata e tokolua a Eli, kae ne mate atu foki i ei a Eli.

E fai eiloa a Samuelu mo fai se fakaakoakoga ‵lei mō tatou. Ne fai eiloa ne ia a te mea tonu faitalia me ne lavea ne ia a nisi tino e fai ne latou a mea ma‵sei. Kae e a koe? E mata, ka fai koe e pelā mo Samuelu kae tumau i te faiga o te mea ‵lei? Kafai e fai koe penā, ka fai eiloa ne koe a Ieova mo ou mātua ke fia‵fia.

FAITAU I TAU TUSI TAPU

  • 1 Samuelu 2:22-26; 3:1-21