Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Akoako Au Tama‵liki

 MATAUPU 13

Ne Manako a Timoteo o Fesoasoani Atu ki Tino

Ne Manako a Timoteo o Fesoasoani Atu ki Tino

A Timoteo se talavou tagata telā ne fiafia o fesoasoani atu ki tino. Ne faimalaga atu a ia ki koga e uke ke fesoasoani atu ki nisi tino. Ona ko te mea tenei, ne gali ‵ki eiloa tena olaga. E mata, e fia fakalogologo koe ki tena tala?—

Ne akoako ne te mātua mo te tupuna o Timoteo a tou tagata e uiga ki a Ieova

Ne tupu aka a Timoteo i se fa‵kai e igoa ki a Lusa. I te taimi koi foliki ei a ia, ne kamata o akoako a ia ne tena tupuna ko Loise mo tena mātua ko Eunike e uiga ki a Ieova. I te taimi ne tupu aka ei a Timoteo, ne manako a ia o fesoasoani ki nisi tino ke tauloto e uiga ki a Ieova.

A koi tamataene a Timoteo, ne ‵kami ne Paulo a ia ke faima‵laga fakatasi lāua o talai atu i nisi koga. Ne fai atu a Timoteo: ‘Ao!’ Ne toka a ia ke fanatu o fesoasoani atu ki nisi tino.

 Ne faima‵laga fakatasi a Timoteo mo Paulo ki se fa‵kai i Maketonia ko Tesalonia. Ke oko atu ki ei, ne ‵tau o sa‵sale lāua i se auala loa kae ‵sopo atu i se vaka. I te taimi ne oko atu ei lāua, ne fesoasoani atu lāua ki tino e tokouke ke tauloto e uiga ki a Ieova. Kae ne kaitaua a nisi tino kae taumafai ke fakalogo‵mae atu ki a lāua. Tela la, ne ‵tau o tiakina ne Paulo mo Timoteo a te koga tenā kae talai atu i nisi koga.

Ne maua ne Timoteo se olaga fakafiafia kae gali

I nai masina mai tua ifo, ne fesili atu a Paulo ki a Timoteo ke toe ‵foki atu lāua ki Tesalonia kae ke āsi atu ki taina i ei. E manakogina a te loto malosi ke toe ‵foki atu ki te fa‵kai fakamataku tenā! Kae ne fanatu a Timoteo me ne manavase a ia ki taina i konā. Ne foki atu a ia ki a Paulo mo tala fakafia‵fia. Ko oko eiloa i te ma‵losi o taina i Tesalonia i te feitu faka-te-agaga!

Ne ga‵lue fakatasi a Timoteo mo Paulo i tausaga e uke. Ne tusi mai a Paulo i se taimi e tasi me i a Timoteo ko te ‵toe tino ‵lei eiloa ne mafai o uga atu ne ia ke fesoasoani ki fakapotopotoga. Ne alofa a Timoteo ki a Ieova mo tino.

E mata, e alofa koe ki tino kae fia fesoasoani atu ke tauloto latou e uiga ki a Ieova?— Kafai e penā loa, e mafai o maua ne koe se olaga fakafiafia kae gali, e pelā eiloa mo Timoteo!