A Lepeka se fafine telā ne alofa ki a Ieova. A te igoa o tena avaga ko Isaako. Ne alofa foki a ia ki a Ieova. Ne fetaui pefea a Lepeka mo Isaako? Ne fakaasi atu pefea ne tou fafine me ne manako a ia o fakafiafia a Ieova? Ke na onoono aka tatou ki nisi mea e uke atu e uiga ki tou fafine.

A mātua o Isaako ko Apelaamo mo Sala. Ne ‵nofo atu latou i te fenua o Kanana, telā e se tapuaki atu a tino i ei ki a Ieova. Kae ne manako a Apelaamo ke avaga tena tama ki se fafine telā e tapuaki ki a Ieova. Tela la, ne uga atu ne ia tena tavini, kāti ko Eliesa, ke ‵sala mai se avaga mō Isaako i te koga e taku ki a Halana, telā e ‵nofo atu i ei a nisi kāiga o Apelaamo.

Ne faimalaga atu a Eliesa mo nisi tavini a Apelaamo. Ne olo atu eiloa latou i se malaga loa ‵ki. Ne ave ne latou a mea‵kai mo meaalofa i luga i kamela e sefulu. Ka iloa pefea ne Eliesa o filifili a te fafine mō Isaako? I te taimi ne oko atu ei a Eliesa mo nisi tavini ki Halana, ne ma‵nava latou i se vaikeli ona ko te mea ne iloa ne Eliesa me ko pili fua o olo atu a tino o asu vai. Ne ‵talo atu a ia ki a Ieova kae fai atu: ‘Kafai e fakamolemole atu au ki se tamāfafine ke tuku mai ne vai kae tuku mai ne ia a vai ki a au mo aku kamela, ka iloa ei ne au me tenei te fafine ko oti ne filifili ne koe.’

Oti aka, fanatu ei a Lepeka ki te vaikeli.  E fai mai te Tusi Tapu me ko oko eiloa i te matagali o tou fafine. Ne fakamolemole atu a Eliesa ki tou fafine ke inu aka a ia i vai kae ne fai atu tou fafine: ‘E ‵lei. Ka tuku atu ne au ne vai ki a koe, kae ka fano foki au o asu mai ne vai mō au kamela.’ Mafaufau la! E inu malosi a kamela ki vai, tela la, ne fokifoki atu faeloa a Lepeka ki te vaikeli o asu mai a vai. E lavea ne koe i te ata a te galue malosi o tou fafine?— Ne ofo a Eliesa i te auala ne tali atu ei a Ieova ki tena ‵talo.

Ne tuku atu ne Eliesa a meaalofa ‵gali e uke ki a Lepeka. Ne ‵kami ne tou fafine a Eliesa mo nisi tavini ki te fale o tena kāiga. Ne fakamatala atu ne Eliesa a te pogai ne uga atu ei a ia ne Apelaamo ki konā mo te auala ne tali atu ei a Ieova ki tena ‵talo. Ne fia‵fia eiloa te kāiga o Lepeka ke avaga tou fafine mo Isaako.

Kae e mata, ne fia avaga a Lepeka ki a Isaako?— Ne iloa ne Lepeka me ne uga atu ne Ieova a Eliesa ki konā. Tela la, i te taimi ne fesili atu ei tena kāiga me e fia fano a ia ki Kanana o avaga ki a Isaako, ne fai atu a ia: ‘Ao, au e manako o fano.’ I konā foki eiloa, ne fanatu ei tou fafine i a Eliesa. I te taimi ne oko atu ei latou ki Kanana, ne avaga lāua mo Isaako.

Ona ko te mea ne fai ne Lepeka a te mea ne manako a Ieova ki ei, ne fakamanuia tou fafine ne Ieova. I te fia o tausaga mai tua ifo i ei, ne fanau mai eiloa a Iesu i te kāiga o tou fafine! Kafai e fai koe e pelā mo Lepeka kae fakafiafia ne koe a Ieova, ka fakamanuia foki ne ia koe.