Fanatu ki te fakasologa

Fanatu ki te fakasologa o mataupu

 MATAUPU 14

Se Malo Telā ka Pule Mai ki te Lalolagi Kātoa

Se Malo Telā ka Pule Mai ki te Lalolagi Kātoa

E mata, e mafai o mate mai ne koe me se a te Malo e fai‵pati tatou ki ei?— Ao, ko te Malo o te Atua, te Malo telā ka fai ne ia te lalolagi kātoa mo fai se palataiso. E mata, e fia iloa ne koe a mea e uke atu e uiga ki te Malo tenei?—

E isi eiloa se tupu o so se malo. Kae e pule atu te tupu ki tino o tena fenua. E iloa ne koe me ko oi te Tupu o te Malo o te Atua?— Ko Iesu Keliso. E nofo atu a ia i te lagi. E se leva kae ka fai a ia mo Tupu ki luga i tino katoa i te lalolagi! Se a tau faka‵tau me ka fia‵fia tatou māfai ko fai a Iesu mo fai te Tupu i te lalolagi kātoa?—

Se a te mea e olioli malosi koe ki ei i te Palataiso?

Ka fia‵fia malosi eiloa tatou! I te Palataiso, ka se toe taua io me e olo atu a tino ki taua. Ka fakatau a‵lofa a tino katoa. Ka se toe ai se tino e masaki io me mate. Ka ‵kite a mata o tino ‵kivi, ka lagona ne tino ‵tuli, mo tino kolā e se mafai o sa‵sale ka mafai o ‵tele kae eva ki luga. Ka lava kae ‵toe a meakai a tino katoa. Ka fai taugasoa a manu i a latou eiloa, penā foki mo tatou. A tino kolā ko oti ne ‵mate ka toe‵tu mai ki te ola. A tāgata mo fāfine e tokouke kolā ko oti ne tauloto koe e uiga ki a latou i te polosiua tenei e pelā mo Lepeka, Lahapa, Tavita, mo Elia ka toe fakaola mai foki! E a, e fia  fetaui koe ki a latou māfai e toe fakaola mai?—

E alofa a Ieova ki a koe kae e manako foki ke fiafia koe. Kafai e tumau koe i te tauloto e uiga ki a Ieova kae fakalogo ki a ia, ka mafai o ola koe ki te se-gata-mai i te lalolagi palataiso! E mata, tenā eiloa te mea e manako koe ki ei?—