Fanatu ki te fakasologa

Fanatu ki te fakasologa o mataupu

 MATAUPU E 8

Ne ‵Sao Latou Mai i se Pule Fakasaua

Ne ‵Sao Latou Mai i se Pule Fakasaua

MATAIO 2:13-23

  • KO ‵SOLA ATU A TE KĀIGA O IESU KI AIKUPITO

  • KO AVATU NE IOSEFA TENA KĀIGA KI NASALETA

Ne ‵fagu ne Iosefa a Malia ke fai atu se tala tāua ki a ia. Ne fatoa fakasae atu te agelu a Ieova ki a ia i se moemiti kae fai atu: “Tu ki luga, puke te tamaliki mo tena mātua kae ‵tele ki Aikupito kae ‵nofo eiloa i konā ke oko ki te taimi e toe fai atu ei au ke toe ‵foki koutou, me i a Helota ko pili o ‵sala ki te tamaliki ke tamate ne ia.”—Mataio 2:13.

I konā eiloa, ne ‵sola fakavave atu ei keatea a Iosefa, Malia, mo te lā tama i te po. Toeitiiti kae se manuia latou me ko iloa ne Helota i a ia ne fakaloiloi ne tino iloilo fetū. Ne fai atu a ia ki a latou ke toe lipoti atu se tala. I lō te fai penā, ne tiakina ne latou te fenua e aunoa mo te faiga o te mea tenā. Ko se faka‵tau eiloa i te kaitaua o Helota. Koi manako eiloa a Helota ke tamate a Iesu, telā ne fakatonu atu ei a ia ke tamate a tama‵liki tā‵gata katoa i Peteleema mo fa‵kai i ana tafa kolā ko taki lua tausaga o fanaifo ki lalo. Ne fakatautau aka ne ia te matua o te tamaliki ki mea ne iloa ne ia mai i tino iloilo fetū kolā ne o‵mai mai te Saegala.

A te tamatega o tama‵liki tāgata katoa se mea matagā ‵ki eiloa! E se iloa ne tatou me e tokofia a tama‵liki tāgata ne tamate ne latou, kae ko te ‵tagi malosi mo te fanoa‵noa lasi o mātua konā ne fakataunu mai i ei te valoaga i te Tusi Tapu telā ne tuku mai e auala i a Ielemia, te pelofeta a te Atua.—Ielemia 31:15.

A koi fai te mea tenā, kae ko oti ne ‵sola atu a Iosefa mo tena kāiga ki Aikupito, kae ne ‵nofo atu eiloa latou i konā. Kae i te po e tasi, ne toe fakasae atu a te agelu a Ieova ki a Iosefa i se moemiti. Muna a te agelu: “Tu ki luga, puke te tamaliki mo tena mātua kae olo ki te fenua o Isalaelu, me ko oti ne ‵mate a latou kolā ne salasala ke tamate te tamaliki.” (Mataio 2:20) Tela la, ko iloa nei ne Iosefa me ko mafai o toe ‵foki atu tena kāiga ki te lotou fa‵kai. I te faiga tenei, ne fakataunu mai i ei a te suā valoaga i te Tusi Tapu—ko aumai keatea mai Aikupito a te Tama a te Atua.—Hosea 11:1.

E foliga mai me ne fakamoemoe a Iosefa ke ‵nofo  atu tena kāiga i Iuta, kāti e tai pili atu ki te fa‵kai ko Peteleema, ko te koga ne ‵nofo latou i ei kae koi tuai o ‵sola keatea latou ki Aikupito. Kae ne iloa ne ia me i te tamaliki matagā a Helota ko Alekilao ko fai nei mo fai te tupu o Iuta. I te suā moemiti, ne fakailoa atu ei ne Ieova ki a ia e uiga ki te fakamataku o te mea tenā. Tela la, ne faima‵laga atu a Iosefa mo tena kāiga ki te feitu ki matū kae ne ‵nofo latou i te fa‵kai ko Nasaleta i Kalilaia, telā e ‵mao mai te laumua o te lotu Iutaia. Ne tupu aka a Iesu i te fa‵kai tenei, telā ne fakataunu mai i ei a te suā valoaga: “Ka taku a ia se tino Nasaleta.”—Mataio 2:23.