Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 10

Ko Faima‵laga Atu te Kāiga o Iesu ki Ielusalema

Ko Faima‵laga Atu te Kāiga o Iesu ki Ielusalema

LUKA 2:40-52

  • E FAKAFESILISILI A FAIAKOGA NE IESU TELĀ KO SEFULU-LUA ANA TAUSAGA

  • NE FAKASINO ATU A IESU KI A IEOVA E PELĀ ME KO “TOKU TAMANA”

Ko te taimi e ‵somo sāle aka ei a lau o lakau. Tela la, ko te taimi tenā ne ‵tau ei o fai ne te kāiga o Iosefa, fakatasi mo olotou taugasoa mo olotou kāiga, te lotou malaga i tausaga katoa ki Ielusalema. E olo atu latou ke fakamanatu te Paseka, e pelā eiloa mo te fakatonuga i te Tulafono. (Teutelonome 16:16) Ne ‵tau o faima‵laga atu latou mai i Nasaleta ki Ielusalema, telā kāti e 75 maila te ‵mao [120 km]. Ne fai eiloa mo fai se taimi fakalavelave kae fakafiafia mō tino katoa. Ne olioli malosi eiloa a Iesu, telā ko 12 nei ana tausaga, ki te ‵kaiga fakamanatu tenā mo te avanoaga ke toe nofo pili atu ki te faletapu.

A te Paseka e sē se aso fua e tasi ki a Iesu mo tena kāiga. A te aso mai tua o te Paseka, ko “te aso muamua o te ‵kaiga o Falaoa sē Faka‵fete,” ko te kamataga o aso e fitu o te ‵Kaiga o Falaoa sē Faka‵fete. (Maleko 14:12) Ne ‵kilo atu ki ei e pelā me se vaega foki o te Paseka. Ne ‵tau o fakamāumāu se lua vaiaso i te faiga o te malaga mai te lotou fa‵kai i Nasaleta, te lotou ‵nofo i Ielusalema, mo te ‵toe ‵foki atu ki te lotou fa‵kai. Kae i te tausaga tenā ne tai leva atu te malaga tenā, ona ko te mea ne tupu ki a Iesu. Ne fatoa sae aka te fakalavelave i te malaga ‵foki mai Ielusalema.

A koi ma‵laga atu latou, ne leake a Iosefa mo Malia me ne nofo atu a Iesu i olotou kāiga mo taugasoa kolā ne faima‵laga fakatasi latou ki matū. Kae i te taimi ne ma‵nava aka ei latou i te po, ne seki maua ne lāua tou tagata. Tela la, ne olo atu lāua o ‵sala atu a ia i lā taugasoa, kae galo a ia i konā. Ne seki maua eiloa te lā tama tagata. Ne toe ‵foki atu eiloa a Iosefa mo Malia ki Ielusalema o ‵sala tou tagata.

Ne salasala aka ne lāua a ia i te aso kātoa, kae seki maua. Ne seki maua foki ne lāua a ia i te lua o aso. Kae fakamuli loa, i te tolu o aso, ne maua atu ne lāua tou tagata i te faletapu mo potu e uke i ei. Ne matea atu ne lāua a Iesu e sagasaga i te kogāloto o nisi faiakoga Iutaia. E fakalogologo kae fai foki ana fesili, kae ne ōfo latou i tena malamalama.

“Taku tama, kaia ne fai ei ne koe te mea tenei ki a māua?” ko te fesili a Malia tenā. “A māua mo tou tamana ne salasala ki a koe mo te manava‵se.”—Luka 2:48.

Ne ofo a Iesu me ne seki iloa ne lāua te koga ne ‵tau o maua ei a ia. “Kaia ne ‵sala ei koulua ki a au?” ko tena fesili. “E se iloa ne koulua me e ‵tau au o nofo i te fale o toku Tamana?”—Luka 2:49.

Nei la, ko toe ‵kau fakatasi latou, ne ‵foki atu a Iesu mo Iosefa mo Malia kae ne fakalogo faeloa a ia ki a lāua. Ne gasolo aka eiloa a ia o poto kae ne tupu aka foki a ia i te feitu faka-te-foitino. E tiga eiloa koi foliki a ia, ne alofagina a ia ne te Atua mo tino. E tonu, talu mai te taimi koi foliki ei a ia, ne tuku mai eiloa ne Iesu se fakaakoakoga ‵lei, e se gata fua i te salasalaga ki mea faka-te-agaga kae ne fakaasi atu foki ne ia te āva ki ana mātua.