Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 19

Ne Akoako Atu ki te Fafine Samalia

Ne Akoako Atu ki te Fafine Samalia

IOANE 4:3-43

  • KO AKOAKO ATU A IESU KI SE FAFINE SAMALIA MO NISI TINO

  • TE TAPUAKIGA TELĀ E TALIA NE TE ATUA

I te lotou auala mai Iuta ki Kalilaia, ne olo atu a Iesu mo ana soko ki matū i te kogā koga o Samalia. Ne fi‵ta latou i te faiga o te lotou malaga. Kāti ko te fakatutonu ne ma‵nava aka latou o malō‵lo i tafa o te fa‵kai o Sukala, se vaikeli telā ne keli ne Iakopo io me ne ‵togi ne ia a tino ke keli ne latou i te fia senitenali mai mua atu i ei. Ke oko mai eiloa ki ‵tou aso nei, e mafai o maua atu te vaikeli tenā i tafa o te fa‵kai ko Napulusi.

Ne mānava malie a Iesu i te vaikeli, kae ne olo atu ana soko ki te fa‵kai telā e pili atu o ‵togi mai ne mea‵kai. I te taimi koi ‵galo ei latou, ne fanatu se fafine Samalia o asu ana vai. Ne fai atu a Iesu ki tou fafine: “Aumai aka ne vai ke inu au.”—Ioane 4:7.

E se fesokotaki sāle a te kau Iutaia mo te kau Samalia ona ko olotou lagonaga fakailoga tino. Tela la, ne poi te fafine kae ne fesili atu: “E mafai pefea o fai mai koe ki a au ke inu koe i a koe se tino Iutaia a ko au se fafine Samalia?” Ne tali atu a Iesu: “Moi ne iloa ne koe te meaalofa faivasaga a te Atua penā foki loa mo te tino telā e fai atu ki a koe, ‘Aumai aka ne vai ke inu au,’ penei ko fakamolemole mai koe ki a ia, ko tuku atu ei ne ia ki a koe a te vai o te ola.” “Tou ‵malu,” ko tena tali, “e seai sau paketi mo asu a vai, kae e ‵poko a te vaikeli. Tela la, e maua ne koe i fea a te vai o te ola tenei? E a, e sili atu koe i te motou tupuga ko Iakopo, telā ne tuku mai ne ia te vaikeli tenei ki a matou kae ne inu ei a ia mo ana tama mo ana pulumakau?”—Ioane 4:9-12.

“A tino katoa kolā e inu ki te vai tenei e toe fia inu foki,” ko muna a Iesu. “So se tino e inu ki te vai telā ka tuku atu ne au ka se toe fia inu eiloa, kae ko te vai telā ka tuku atu ne au ki a ia ka fai pelā me se vaipuna i loto i a ia telā ka ‵puna aka ke tuku mai ei te ola se-gata-mai.” (Ioane 4:13, 14) Ao, faitalia tena fi‵ta, ne loto fiafia eiloa a Iesu ke fakaasi atu a muna fakaola tino o te munatonu ki te fafine Samalia.

Ne fai atu te fafine: “Tou ‵malu, tuku mai ki a au a te vai tenā, ko au ke se toe fia inu io me toe vau ki te koga tenei o asu vai.” Ne foliga mai me ko ‵fuli nei ne Iesu a te mataupu e sau‵tala lāua ki ei kae fai atu ki tou fafine: “Fano o kalaga ki tau avaga kae ‵mai ki te koga tenei.” Ne tali atu tou fafine: “E seai saku avaga.” Kae ne poi masei tou fafine i mea ne iloa ne Iesu i te taimi ne fai atu tou tagata ki a ia: “E tonu eiloa koe i au pati, ‘E seai saku avaga.’ Me ko oti ne avaga koe ki tāgata e tokolima, kae ko te tagata tenā e ‵nofo mo koe e se ko tau avaga. Ne faipati ‵tonu eiloa koe.”—Ioane 4:15-18.

Ne maina ‵lei eiloa tou fafine i te uiga o tena pati, kae ne fai atu ei a ia mo te ofo: “Tou ‵malu, ko iloa nei ne au i a koe se pelofeta.” Ne fakaasi atu ei ne ia me e fiafia a ia ki mea faka-te-agaga. E pefea la? Ne toe fai atu tou fafine: “A motou tupuga [tino Samalia] ne tapuaki i te mauga tenei [ko te Mauga o Kelisima telā ne tu pili mai]; kae e fai mai koutou [tino Iutaia] me ko Ielusalema te koga e ‵tau o tapuaki i ei a tino.”—Ioane 4:19, 20.

Kae ne fakamatala mai ne Iesu me e se tāua te koga telā e tapuaki atu i ei. Ana muna: “Ka oko mai eiloa te itula ka se toe tapuaki ei a koutou ki te Tamana i te mauga tenei io me ko Ielusalema.” Ne toe fai atu a ia ki tou fafine: “Ka oko mai te itula, kae ko oko eiloa ki ei, ka tapuaki atu ei a tino tapuaki ‵tonu ki te Tamana i te agaga mo te munatonu, me e ‵sala eiloa te Tamana ki tino penei ke tapuaki atu ki a ia.”—Ioane 4:21, 23, 24.

 A te mea telā e kilo ki ei te Tamana i ana tino tapuaki ‵tonu, e se ko te koga e tapuaki atu ei latou, kae ko te auala e tapuaki atu ei latou. Ne ofo malosi te fafine i ei. “E iloa ne au i te Mesia e vau telā e taku ko Keliso,” ko ana muna. “Kafai e oko mai a te tino tenā, ka folafola mai ne ia a mea katoa ki a matou.”—Ioane 4:25.

Ne fakaasi atu ne Iesu se munatonu tāua: “Au ko te tino tenā, ko te tino tenei e faipati atu ki a koe.” (Ioane 4:26) Mafaufau ki te mea tenā! Ko fanatu te fafine i te fakatutonu o asu vai. Kae ne fakatāua malosi ne Iesu tou fafine i se auala fakaofoofogia. Ne taku ‵tonu atu ne Iesu a te mea telā ne seki taku atu ne ia ki nisi tino—me i a ia ko te Mesia.

NE TALI‵TONU A TINO SAMALIA E TOKOUKE

Ko ‵foki atu a soko o Iesu mai Sukala mo olotou mea‵kai. Ne maua atu ne latou a Iesu i te vaikeli o Iakopo i te koga telā ne tiakina ei ne latou a ia, kae nei, ko sau‵tala a ia mo te fafine Samalia. I te okoatuga o ana soko, ne tiaki ne tou fafine tena fagu vai, kae ne fanatu eiloa ki te fa‵kai.

I tena okoatuga ki Sukala, ne taku atu ne te fafine ki tino i ei a mea katoa ne fai ne Iesu ki a ia. Ne fai atu a ia mo te loto talitonu ki a latou: “‵Mai o onoono ki te tagata telā ne fai mai ne ia ki a au a mea katoa kolā ne fai ne au.” Kae ke fakamalosi aka te lotou fia ‵logo, ne fesili atu a ia: “E a, e se ko ia tenei te Keliso?” (Ioane 4:29) Tenā eiloa te fesili e uiga ki se mataupu tāua—se mea telā ko leva ne fia iloa ne tino i aso o Mose. (Teutelonome 18:18) Ne fakaosofia ei a tino o te fa‵kai ke olo atu onoono ki a Iesu.

A koi fai penā, kae ne fakamalosi atu a soko ki a Iesu ke kai ki mea‵kai ne aumai ne latou. Kae ne tali atu a ia penei: “E isi ne aku meakai e kai ei au kolā e se iloa ne koutou.” Ne fakatau fesilisili ei te kau soko e uiga ki te mea tenā: “E a, e isi se tino ne avatu ne ia ki ei ne meakai?” Ne fakamatala atu mo te alofa ne Iesu i pati kolā ne tāua malosi ki ana soko katoa: “A taku meakai ko te faiga o te loto o ia telā ne uga mai ne ia au kae ke fakapalele foki tena galuega.”—Ioane 4:32-34.

A te galuega telā ne faipati ki ei a Iesu e se ko te  ‵katiga o saito, telā kāti e toe fa masina kae oko ki ei. I lō te fai penā, ne fakasino atu a Iesu ki te ‵katiga o saito i te feitu faka-te-agaga, e pelā mo ana pati ne fai mai: “‵Kilo aka ki luga kae onoono atu ki fatoaga, me ko ‵kena eiloa i fuataga e ‵tau o tau. Ko oti ne maua ne te tino tau fuataga a tena ‵togi kae ko ‵luku mai a fuataga mō te ola se-gata-mai, ko te mea ke fia‵fia fakatasi a te tino ‵toki mo te tino tau fuataga.”—Ioane 4:35, 36.

Ne mafai o iloa ‵lei ne Iesu a ikuga ‵lei ka maua mai i te lā fetauiga mo te fafine Samalia. E tokouke a tino mai Sukala ne fakatuanaki ki a ia ona ko te molimau o tou fafine, me ne fai atu tou fafine ki tino: “Ne fai mai ne ia ki a au a mea katoa kolā ne fai ne au.” (Ioane 4:39) Tela la, i te taimi ne olo atu ei latou mai Sukala ki te vaikeli, ne fakamolemole atu a latou ki a Iesu ke nofo mai o taku atu a nisi mea ki a latou. Ne talia ne Iesu a te ‵kamiga tenā kae ne nofo atu a ia i Samalia i aso e lua.

A koi fakalogo‵logo te kau Samalia ki a Iesu, ne gasolo aka o tokouke a tino ne tali‵tonu ki a ia. Ne fai atu latou ki te fafine: “Ko se toe tali‵tonu matou ona fua ko au pati ne fai; me ko oti eiloa ne lagona ne matou kae ko iloa ne matou mo te mautinoa me i te tagata tenei ko te fakaola o te lalolagi.” (Ioane 4:42) A te ‵tonuga loa, ne tuku mai ne te fafine Samalia se fakaakoakoga ‵lei ki te auala e mafai ei o molimau atu tatou e uiga ki te Keliso, mai te fakamalosi aka o te fia ‵logo ko te mea ke ma‵nako ‵tou tino fakalogo‵logo ki fakamatalaga e uke atu.

Masaua la me e toe fa masina a koi tuai o ‵kati a saito—kāti ko te ‵katigā kalite, telā e fai sāle i te kogā koga tenei i te taimi e ‵somo aka ei a lau o lakau. Kāti a te masina tenā ko Novema io me ko Tesema. Ko tena uiga mai tua ifo o te Paseka i te 30 T.A., ko oti ne fakamāumāu ne Iesu mo ana soko a masina e valu io me e uke atu i Iuta i te akoakoga mo te papatisoga o tino i ei. Ne olo atu ei latou ki matū ki te lotou fa‵kai i Kalilaia. Ne a mea ne faka‵tali mai mō latou i konā?