Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 37

Ne Fakatu ne Iesu te Tama Tagata a te Fafine ko Mate Tena Avaga

Ne Fakatu ne Iesu te Tama Tagata a te Fafine ko Mate Tena Avaga

LUKA 7:11-17

  • TE TOETUGA O SE TINO I NAINA

I te otiga eiloa ne faka‵lei ne Iesu te masaki o te tavini a te ofisa o kautau, ne fanatu ei a ia ki Naina, se fa‵kai e 20 tupu maila te ‵mao i te feitu ki saute-togala. Ne seki fanatu fua a ia tokotasi. Ne faima‵laga fakatasi atu a ia mo ana soko mo se vaitino e tokouke. Kāti ko tai pōgia eiloa latou i te okoatuga ki koga i tafa o Naina. I konā, ne fetaui ei latou mo tino e solo o ave se tino mate telā e tai tokouke eiloa a tino Iutaia i ei. Ne avatu te foitino o se tamataene ke tanu mai tua o te fa‵kai.

A te ‵toe tino fanoanoa malosi eiloa ko te mātua o te tamataene. Ko oti ne mate tena avaga, kae ko mate foki nei tena tama eiloa e tokotasi. I te taimi ne mate ei tena avaga, kae ‵lei me koi ‵nofo eiloa a ia mo tena tama pele. Mafaufau la ki te ‵pili o te lā fesokotakiga, me ne fakamoemoe kae fakalagolago tou fafine ki tou tagata. Nei la, ko mate foki tou tagata. Ko oi la e ‵toe mai ke fesoasoani atu ki a ia?

I te laveaga ne Iesu a te fafine tenei, ne otia tena loto i te lasi o tena mafatia mo te fanoanoa ona ko tena tulaga. Ne fakatalitonu atu tou tagata ki tou fafine mo te alofa: “Sa tagi.” Kae ne uke atu ana mea ne fai. Ne fanatu atu a ia ki te moega telā ne ave i ei te foitino kae fakapatele atu ki ei. (Luka 7:13, 14) Ko ana uiga mo ana faifaiga ne ‵tu i ei a tino fanoa‵noa o te fa‵kai. Kāti ne mafau‵fau penei a tino e tokouke: ‘Se a te uiga o ana pati, kae ne a ana mea ka fai?

Kae e a latou kolā ne faima‵laga fakatasi atu mo Iesu kae ne lavea ne latou a te faiga ne ia o galuega ‵mana, te faka‵leiga o ma‵saki e uke? Kae kāti ne seki lavea aka eiloa ne latou ke fakatu aka ne Iesu se tino mai te mate. E tiga eiloa ne fai a toe‵tuga i aso mua loa, e mata, e mafai ne Iesu o fai se vaegā mea penā? (1 Tupu 17:17-23; 2 Tupu 4:32-37) Ne fakatonu atu a Iesu: “Te tamataene, au e fai atu ki a koe: Tu ki luga!” (Luka 7:14) Kae ne fai eiloa penā. Ne nofotu aka te tamataene kae kamata o faipati atu! Ne tuku atu ne Iesu tou tagata ki tena mātua, telā ne ofo masei kae fiafia malosi foki. Ko se toe nofo tokotasi tou fafine.

I te laveaatuga ne tino me ko toe ola tonu mai te tamataene, ne kamata o tavae atu latou ki te Tino ne tuku mai ne ia te ola, ko Ieova, olotou muna: “Ko oti  ne fakatu aka se pelofeta sili mai i a tatou.” Ne malamalama a nisi tino i te uiga o galuega fakaofoofogia a Iesu, telā ne fai mai latou: “Ko oti foki ne saga mai te Atua ki ana tino.” (Luka 7:16) Se mea vave loa o ‵pa atu te tala gali tenei ki kogā fenua katoa i tafa kae kāti ki te fa‵kai o Iesu, ko Nasaleta, telā e nofo ki te ono maila te ‵mao. Ne salalau atu foki te tala ki te feitu ki saute o Iuta.

Koi nofo atu eiloa a Ioane te Papatiso i te falepuipui, kae ne fia iloa malosi ne ia a nisi tala e uiga ki galuega kolā ne mafai o fai ne Iesu. Ne fakamatala atu ne ana soko a vavega konei ki a ia. Ne saga atu pefea tou tagata ki ei?