MALEKO 1:14, 15 LUKA 4:14, 15 IOANE 4:43-54

  • NE TALAI ATU A IESU ME “KO PILI MAI TE MALO O TE ATUA”

  • NE FAKA‵LEI NE IA TE MASAKI O SE TAMALIKI TAGATA MAI I SE KOGA ‵MAO

Mai tua o aso kāti e lua i Samalia, ne fanatu a Iesu ki tena fa‵kai tonu. Ne fatoa oti ne fai ne ia se galuega talai lasi i Iuta, kae ne seki foki atu a ia ki Kalilaia o malōlō. I lō te fai penā, ne kamata ne ia se galuega lasi i te fenua telā ne tupu aka ei a ia. Ne seki fakamoemoe a ia ke talia faka‵lei a ia ne tino i konā, me ne fai mai a Iesu, “me i te pelofeta e se ‵malu i tena fenua tonu.” (Ioane 4:44) I lō te ‵nofo fakatasi mo tou tagata, ne ‵foki atu ana soko ki olotou kāiga mo olotou galuega mua.

Se a te fekau telā ne kamata o talai atu ne Iesu? Tenei te fekau: “Ko pili mai te Malo o te Atua. Sala‵mo, kae fakatuanaki ki te tala ‵lei.” (Maleko 1:15) Ne ‵saga atu pefea a tino ki ei? A te ‵tonuga loa, ne talia mo te fiafia ne tino Kalilaia e tokouke a Iesu, kae ne āva latou ki a ia. E seki fai fua penā ona ko tena fekau. Ne ‵nofo atu a nisi tino mai Kalilaia i te Paseka i Ielusalema, i nai masina mai mua atu i ei, kae ne lavea ne latou a fakailoga fakaofoofogia kolā ne fai ne Iesu.—Ioane 2:23.

Tefea te koga ne kamata ei ne Iesu tena galuega lasi i Kalilaia? Kāti i Kana, te koga telā ne ‵fuli ne ia a vai ke liu uaina i te ‵kaiga o te fakaipoipoga. A koi nofo atu i konā, i te lua o taimi, ne iloa ei ne Iesu me ne masaki malosi se tamaliki kae ko tai mate aka eiloa. A ia ko te tamaliki a te ofisa i te malo o Helota Anitipa, telā ne ‵kati ne ia te ua o Ioane te Papatiso. Ne logo te ofisa tenei me i a Iesu ko fanatu mai Iuta ki Kana. Telā ne faimalaga atu ei te tagata tenā mai i tena fale i Kapanaumi ki Kana ke ‵sala atu ki a Iesu. Ne fakamalosi aka eiloa tou tagata ne tena fanoanoa ke fai atu ki a ia: “Te Aliki, vau la koi tuai o mate taku tamaliki.”—Ioane 4:49.

Ne tali atu a Iesu i se auala telā ne ‵tau o ofo a te tagata i ana pati: “Fano la me ko ola tau tama.” (Ioane 4:50) Ne talitonu te ofisa a Helota ki a Iesu kae kamata tena malaga o toe foki atu ki tena fale. I tena auala ne fetaui a ia mo ana tavini, kolā ne ‵tele fakavave atu o fakailoa ki a ia a te tala fakafiafia. Ao, ko ola kae ‵lei tena tama tagata! ‘Ko te itula fea ne ‵lei ei a ia?’ ko tena fesili, ona ko te taumafai ke fakafetaui aka a mea ne ‵tupu.

“Ko te aso anafi i te fitu o itula ne ‵lei ei tena fiva,” ko te lotou tali.—Ioane 4:52.

Ne iloa ne te ofisa me tenā eiloa te taimi ne fai atu ei a Iesu, “Ko ola tau tama.” Mai tua ifo o te mea tenei, ne fai te tagata tenā, telā ne maumea eiloa me e isi ne ana pologa, mo tena kaufale kātoa mo fai ne soko o Keliso.

A Kana, se koga telā ne fai fakalua i ei ne Iesu a vavega, ko te ‵fuliga o vai ke liu uaina kae mai tua ifo, ne faka‵lei ne ia se tamaliki tagata mai i se koga telā e 16 maila te ‵mao. Kae e se konei fua ana vavega ne fai. Ne tāua eiloa te faka‵leiga tenei me ne fakamailoga ki ei tena fokiatuga ki Kalilaia. E manino ‵lei me i a ia ko te pelofeta telā e talia ne te Atua, kae ka pefea te leva ka ‘faka‵malu atu ei ki te pelofeta tenei i tena fenua tonu’?

Ka lavea atu eiloa i te taimi ko toe foki atu ei a Iesu ki tena fa‵kai ko Nasaleta. Ne a mea ne faka‵tali mai ki a ia i konā?