Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 31

Ne Tau a Saito i te Sapati

Ne Tau a Saito i te Sapati

MATAIO 12:1-8 MALEKO 2:23-28 LUKA 6:1-5

  • NE TAU NE SOKO A SAITO I TE SAPATI

  • A IESU KO TE “ALIKI O TE SAPATI”

Ko toe faima‵laga atu nei a Iesu mo ana soko ki te feitu ki matū o Kalilaia. A te taimi tenā ko ‵somo aka ei a lau o lakau, kae ne maua atu eiloa a saito i kau saito i fatoaga. Ona ko te fia‵kai, ne tau ei ne soko a kau saito kae ‵kai ki ei. A te aso tenā ko te Sapati, kae ne lavea ne Falesaio a mea ne fai ne latou.

Masaua ne fatoa ma‵nako a nisi tino Iutaia ke tamate a Iesu, kae ‵losi atu ki ei mō te ofaga ne ia a te Sapati. Nei la, ko toe fai foki ne Falesaio se ‵losiga telā e fakavae ki faifaiga a soko. “Kiloke! Ko fai ne ou soko a te mea telā e tapu i te Sapati.”—Mataio 12:2.

Ne fai atu a te kau Falesaio me kafai e tau kae mili a saito ki te lima o te tino ke kai a ia ki ei, ko te ‵katiga mo te ‵tukiga tenā o saito. (Esoto 34:21) A te lotou fakamatalaga faigata e uiga ki mea kolā e aofia i galuega, ne fai ei te Sapati mo fai se amoga ‵mafa, kae ne ‵tau o fai mo fai se aso fakafiafia, telā e fakamalosi aka ei a tino i te feitu faka-te-agaga. Ne tali atu a Iesu fakatasi mo fakaakoakoga ke fakaasi atu ei me ne seki manako a Ieova te Atua ke fakagalue aka Tena tulafono e uiga ki te Sapati i te auala tenā.

E tasi te fakaakoakoga ne tuku atu ne Iesu ko Tavita mo ana tāgata. I te taimi ne fia‵kai ei latou, ne afe atu latou ki te faleie tapu kae kai ne latou a falaoa o te tukuatuga. A falaoa konā, ko oti ne ave keatea mai mua o Ieova kae sui ki falaoa ‵fou, me ne masani o tuku sāle atu ke kai ne te kau faitaulaga. Ona ko vaegā taimi penā, ne seki taku fakamasei a Tavita mo ana tāgata me ne kai ne latou.—Levitiko 24:5-9; 1 Samuelu 21:1-6.

Kae ko te lua o fakaakoakoga, ne fai atu a Iesu: “E seki fai‵tau koutou ki te Tulafono me i taimi o Sapati  ne soli ne faitaulaga i te faletapu a te Sapati kae e se agasala eiloa latou?” Ne fakauiga a ia me ne tamate sāle ne te kau faitaulaga a manu i te Sapati kae fai foki a nisi galuega i te faletapu. Muna a Iesu: “Kae e fai atu au ki a koutou me e isi se tino i konei e sili atu i te faletapu.”—Mataio 12:5, 6; Numela 28:9.

Ne toe fakasino atu foki a Iesu ki te Tusi Tapu ke fakamaoni atu ei tena manatu: “Moi fai ne malamalama koutou i te uiga o te mea tenei, ‘Au e manako ki te loto fakamagalo, kae e se ko taulaga,’ penei e se taku fakamasei ne koutou a tino e se ‵tau o fakasala.” Kae ne fakaoti penei ana pati: “Me i te Tama a te tagata ko te Aliki o te Sapati.” Ne fakauiga a Iesu ki tena foki mai i te pulega filemu a te Malo mō te afe tausaga.—Mataio 12:7, 8; Hosea 6:6.

Ko leva ne logo‵mae a tino i te ‵nofo pologa ki fakalavelave faiga‵ta kolā e māfua mai i a Satani, fakatasi mo amioga fakasaua mo taua e uke. Ko oko eiloa i te ‵kese o te olaga ka maua mai lalo i te pulega i te Sapati lasi a Keliso, telā ka tuku mai a te taimi malōlō telā ko leva ne ma‵nako tatou ki ei!