Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 51

Te Tatino i se ‵Kaiga o te Aso Fanau

Te Tatino i se ‵Kaiga o te Aso Fanau

MATAIO 14:1-12 MALEKO 6:14-29 LUKA 9:7-9

  • KO FAI A HELOTA KE ‵KATI TE ULU O IOANE TE PAPATISO

I te taimi koi fai ei ne apositolo a Iesu te lotou galuega i Kalilaia, ne seki maua te saolotoga ne te tino telā ne fakaasi mai ne ia a Iesu. Koi nofo atu eiloa a Ioane te Papatiso i te falepuipui, toeitiiti mai tua o te lua tausaga.

Ne fakaasi faka‵sau atu ne Ioane me ne seki ‵tau o avaga a te tupu ko Helota Anitipa ki a Helotia, te avaga a tena āfa taina, ko Filipo. Ko oti ne ‵tala ne Helota tena avaga muamua ke avaga a ia ki a Helotia. E ‵tusa mo te Tulafono Faka-Mose, telā e fai mai a Helota me ne tautali atu ki ei, a te avaga tenei se faifaiga mulilua kae se mea sē ‵tau. Ona ko pati polopoloki konā a Ioane, ne ‵pei ei ne Helota a Ioane ki te falepuipui kae kāti ne fakamalosi foki a Helotia ki tou tagata ke fai te mea tenā.

Ko se iloa ne ia me ne a ana mea e ‵tau o fai ki a Ioane, ‘me ne tali‵tonu a tino i a ia se pelofeta.’ (Mataio 14:5) Kae e seai eiloa ne lagonaga penā o Helotia. Ne ‘nofo faeloa tou fafine mo te ita fakamoemoe ki a Ioane,’ kae ko te ‵tonuga loa, ne ‵sala faeloa a ia ki se auala ke tamate tou tagata. (Maleko 6:19) Fakamuli ifo, ne sae aka ei te avanoaga ke fai penā.

Ko pili o oko atu ki te Paseka i te 32 T.A., kae ne fakatoka ne Helota se ‵kaiga lasi o tena aso fanau. Ne maopoopo katoa atu ki te ‵kaiga tenā a ofisa ma‵luga o te malo o Helota mo ana kautau, penā foki loa mo nisi tino takutakua mai Kalilaia. I te taimi o te ‵kaiga, ne uga atu a Salome, te tamaliki fafine a Helotia i tena avaga mua ko Filipo, ke saka i mua o tino ‵kami. Ko oko eiloa i te fia‵fia o tāgata konā ki tena sakaga.

Ona ko te lasi o tena fiafia ki tena tama fafine fai, ne fai atu ei a Helota ki a ia: “Taku mai ki a au so se mea e manako koe ki ei, kae ka tuku atu ne au ki a koe.” Ne tauto atu eiloa a ia: “So se mea e manako koe ki ei mai i a au, ka tuku atu eiloa ne au ki a koe, ke oko ki te āfa o toku malo.” A koi tuai o tali atu, ne fano muamua a Salome ki tena mātua kae fai atu: “Se a te mea ka taku atu ne au?”—Maleko 6:22-24.

Tenei eiloa te avanoaga ne faka‵tali ki ei a Helotia! “Ko te ulu o Ioane te Papatiso,” ne tali fakavave atu tou fafine. I konā foki eiloa, ne foki atu a Salome ki a Helota mo tena manakoga: “Au e manako ke tuku mai ne koe ki a au nei eiloa te ulu o Ioane te Papatiso i luga i se telē.”—Maleko 6:24, 25.

Ne fanoanoa malosi a Helota i te mea tenei, kae ko oti ne lagona ne ana tino ‵kami tena tautoga ki a Salome. Ko mā tou tagata māfai e se talia ne ia te manakoga tenā, faitalia me e aofia i te mea tenei a te tamatega o se tagata ‵lei. Tela la, ne uga atu ne ia se leoleo ki te falepuipui mo te fakatonuga matagā tenā. E seki leva kae ne foki mai te leoleo mo te ulu o Ioane i se telē. Ne tuku atu ne tou tagata ki a Salome, telā ne tuku atu ne ia ki tena mātua.

I te taimi ne lagona ei ne soko o Ioane a mea kolā ne ‵tupu, ne olo atu latou o avatu tena foitino o tanu. Ne fai atu ei ne latou te tala tenā ki a Iesu.

Fakamuli ifo, i te taimi ne lagona ei ne Helota me i a Iesu ko faka‵lei ne ia a masaki o tino kae ko ‵tuli keatea foki ne ia a temoni, ne mataku tou tagata. Ne mafaufau a ia me i te tagata tenei e fai ne ia a mea konei—telā ko Iesu—me ko Ioane eiloa te Papatiso telā ko ‘toe fakatu aka mai te mate.’ (Luka 9:7) Tela la, ne manako malosi eiloa a Helota ke lavea ne ia a Iesu. E se fai loa penei ona ko te fia fakalogologo ki te talaiga a Iesu. I lō te fai penā, e fia lavea ne Helota a Iesu ke fakamautinoa aka me e tonu tena manavase io me ikai.