Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 47

Ne Toe Ola Mai se Tamaliki Fafine!

Ne Toe Ola Mai se Tamaliki Fafine!

MATAIO 9:18, 23-26 MALEKO 5:22-24, 35-43 LUKA 8:40-42, 49-56

  • NE TOE FAKATU AKA NE IESU A TE TAMALIKI FAFINE A IAILO

Ne lavea ne Iailo me ko faka‵lei ne Iesu a te fafine telā ne ‵tafe tena sua. E mautinoa eiloa me e mafai foki o fesoasoani atu a Iesu ki tena tamaliki fafine, faitalia tena mafaufau me “kāti ko oti ne mate” atu nei. (Mataio 9:18) E mata, koi mafai eiloa o fesoasoani atu ki tou fafine?

A koi faipati atu Iesu ki te fafine telā ne faka‵lei ne ia, ne oko mai a nisi tāgata mai te fale o Iailo kae ne fai atu ki a ia: “Ko mate tau tamaliki fafine! E se ‵tau o toe fakalavelave atu koe ki te Faiakoga.”—Maleko 5:35.

Ko oko eiloa te fakafanoanoa o te tala! Ko seai lele eiloa se mea e mafai nei o fai ne te tagata tenei, telā ne fakaaloalogina malosi i te fa‵kai. Ko mate atu tena tama fafine eiloa e tokotasi. Kae ne lagona ne Iesu te tala kae ‵fuli atu ki a Iailo, ne fakamalosi atu a ia: “Sa mataku, kae fakatuanaki fua.”—Maleko 5:36.

Ne olo fakatasi atu ei a Iesu mo Iailo ki tena fale. I te okoatuga, ne lagona ei ne latou me ko ‵tagi kae pa‵kalaga valevale a tino. Ne ‵tagi mautuutu latou kae fitifiti a tino kolā ne maopoopo atu ki konā ona ko te fanoa‵noa. Ne ulu atu a Iesu ki loto kae fai atu: “A te tamaliki tenā e seki mate kae e moe fua.” (Maleko 5:39) I te lagonaga ne latou te mea tenei, ne ‵kata atu a tino ki a Iesu. Ne iloa ne latou me ko mate tonu eiloa te tamaliki fafine. Mai i te fakaaogaga o tena ‵mana mai te Atua, ne fakaasi atu ei ne ia me e mafai o toe fakaola mai a tino mai te mate e pelā eiloa mo te mafai o ‵fagu mai se tino mai i te moe palapala.

Ko uga atu nei kea‵tea ne Iesu a tino katoa ki tua, kae na ko Petelu, Iakopo, Ioane, mo mātua o te tamaliki fafine ko mate. Ne puke kae avatu ne Iesu a tino e tokolima konei ki te koga telā ne takato ei te tamaliki fafine. Ne puke ne Iesu te lima o tou fafine kae fai atu: “‘Talita kumi,’ ko tena uiga māfai e ‵fuli: ‘Te tamaliki fafine, au e fai atu ki a koe, “Tu ki luga!”’” (Maleko 5:41) Se mea vave o tu aka tou fafine kae kamata o sasale. Mafaufau la ki te fia‵fia o Iailo mo tena avaga i te laveaga ne lāua a te mea tenei! I te toe fakamaoni atu me ko ola tonu mai te tamaliki fafine, ne fakatonu atu a Iesu ke avatu ne mea‵kai ki te tamaliki.

Mai mua atu, ne fakatonu atu a Iesu ki tino kolā ne faka‵lei ne ia ke mo a ma taku atu ki se tino te mea telā ne fai ne ia, kae ne fai atu foki a ia penā ki mātua konei. E tiga eiloa te feitu tenā, ne faka‵pa atu ne mātua fia‵fia konei mo nisi tino a te tala ‵lei “i te koga kātoa tenā.” (Mataio 9:26) E mata, e se fia faipati atu koe mo te fiafia māfai ne lavea ne koe sou tino pele ko toe fakatu aka mai te mate? Tenei eiloa te lua o faka‵tuga ne fai ne Iesu.