Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 62

Se Akoakoga Tāua e Uiga ki te Loto Maulalo

Se Akoakoga Tāua e Uiga ki te Loto Maulalo

MATAIO 17:22–18:5 MALEKO 9:30-37 LUKA 9:43-48

  • NE TOE ‵VALO MAI NE IESU TENA MATE

  • KO ‵TOGI NE IA A LAFOGA KI SE TUPE MAI TE GUTU O TE IKA

  • KO OI TE TINO TAFASILI I TE MALUGA I TE MALO?

I te otiga ne ‵fuli a foliga mo te faka‵leiga o te tamaliki tagata telā ne ulufia ne temoni i kogā koga o Kaisaleia Filipi, ne fanatu a Iesu ki Kapanaumi. Ne faimalaga atu fua a ia mo ana soko ko te mea ke se “iloa ne se tino te mea tenā.” (Maleko 9:30) Ne tuku atu ne te mea tenei a te suā avanoaga ke fakatoka ana soko mō tena mate, penā foki mo te galuega ka fai ne latou. “E ‵tau o tuku atu te Tama a te tagata ki lima o tāgata faitogafiti,” ko tena fakamatalaga, “kae ka tamate ne latou a ia, kae ka toe fakatu aka a ia i te tolu o aso.”—Mataio 17:22, 23.

Ne seki ‵tau o ‵poi ana soko i te manatu tenā e pelā me se mea fou. Ne faipati muamua atu a Iesu e uiga ki tena tamate, faitalia me ne ita fitifiti a Petelu ke talitonu me ka tupu te mea tenei. (Mataio 16:21, 22) Ne lavea ne apositolo e tokotolu a te ‵fuliga o ana foliga kae lagona foki ne latou te sau‵talaga e uiga ki te taimi ka “tiaki” ne ia te lalolagi. (Luka 9:31) Ne “fanoa‵noa malosi” a soko i pati a Iesu, faitalia me e se malamalama latou i te uiga kātoa o ana pati. (Mataio 17:23) Ne ma‵taku eiloa latou ke toe fesili atu ki a ia e uiga ki te mea tenā.

E seki leva kae oko atu latou ki Kapanaumi, te koga e fai sāle ne Iesu tena galuega mo te fa‵kai foki o nai apositolo. I konā loa, ne olo atu a tino ao lafoga o te faletapu ki a Petelu. Kāti ne taumafai latou ke ‵losi atu ki a Iesu mō te sē ‵togi o lafoga, ne fesili atu latou: “E a, e ‵togi ne te otou faiakoga a te lafoga o te faletapu?”—Mataio 17:24.

Muna a Petelu, “Ao.” I te fale, ne iloa ‵lei ne Iesu a mea kolā ne ‵tupu. Tela la, i lō te faka‵tali ke fakasae aka ne Petelu te mataupu, ne fesili atu a Iesu: “Simona, se a tau faka‵tau, ko oi a tino e ‵togi ne latou a tiute io me ko lafoga foitino ki tupu o te lalolagi? Ko olotou tama io me ko tino fakaa‵tea?” Ne tali atu a Petelu: “Ko tino fakaa‵tea.” Ne fai atu ei a Iesu: “Tela la, a tama a te tupu e se ‵togi lafoga.”—Mataio 17:25, 26.

A te Tamana o Iesu, ko te Tupu o te iunivesi mo te Tino e tapuaki atu ki ei i te faletapu. Tela la, e se manakogina i te tulafono ke ‵togi ne te Tama a te Atua a te lafoga ki te faletapu. “Kae ko te mea ke se fakaitaita atu tatou ki a latou,” ko muna a Iesu, “fano o ‵pei atu se kafilo ki te tai, kae puke te ika muamua telā e maua, kae kafai e fakamaga ne koe tena gutu, ka maua ne koe i ei se tupe siliva [a stater io me se tetradrachma]. Puke te tupe tenā kae tuku atu ki a latou mō tāua tokolua.”—Mataio 17:27

E seki leva kae toe maopoopo fakatasi a te kau soko, kae e isi se lotou fesili ki a Iesu me ko oi te ‵toe tino sili i te Malo. Konei foki loa a tāgata kolā ne ma‵taku ma fesili ki a Iesu e uiga ki tena mate, kae nei ko se ma‵taku latou o fesili atu ki a ia e uiga ki te lotou olaga i aso mai mua. Ne iloa ne Iesu a mea e mafau‵fau latou ki ei. Se mea telā ne kinau muamua ei latou i te taimi ne sa‵sale malie atu latou i ana tua i te lotou auala o ‵foki ki Kapanaumi. Telā ne fesili atu ei latou: “Se a te mea ne kinau ei koutou i te auala?” (Maleko 9:33) Ne ‵ma te kau soko, kae e seai se lotou tali, ona ko te mea ne kinau latou i a latou eiloa me ko oi te ‵toe tino sili. I te otiga loa, ne fai atu ei ne te kau apositolo ki a Iesu a te fesili telā ne fai‵pati faeloa latou ki ei: “Ko oi te ‵toe tino sili te Malo o te lagi?”—Mataio 18:1.

E faigata ke maina me ne kinau a te kau soko, mai tua o te lua tupu tausaga ne onoono kae fakalogo‵logo latou ki a Iesu. Kae e tiga eiloa te feitu tenā, e se ‵lei katoatoa latou. Kae ne ‵tupu aka foki  latou i se vaegā lotu telā ne fakamalosi mai i ei a tulaga mo tofi. E sili atu i ei, ne fatoa lagona ne Petelu a te folafolaga a Iesu e uiga ki te tukuatuga o “kī” o te Malo ki a ia. E mata, ne maua ne ia se lagonaga fia maluga? Kāti ne penā foki loa a manatu o Iakopo mo Ioane ona ko te mea ne molimau lāua ki te ‵fuliga o foliga o Iesu.

Faitalia me ne a mea ne aofia i ei, ne gasuesue eiloa a Iesu ke fakatonutonu olotou manatu. Ne kalaga atu a ia ki se tamaliki, ne fakatu ne ia a ia i olotou mua kae fai atu: “Seiloga ke ‵fuli koutou ke fai pelā me ne tama‵liki, ka se mafai eiloa o ulu atu koutou ki te Malo o te lagi. Tela la, a te tino e fakamalalo ne ia a ia eiloa e pelā mo te tamaliki tenei, ko ia tenā te ‵toe tino sili i te Malo o te lagi, kae ko so se tino e talia ne ia se tamaliki penei ona ko toku igoa ka talia foki ne ia au.”—Mataio 18:3-5.

Ko se faka‵tau eiloa i te gali o te auala ne akoako atu ei! Ne seki ita atu a Iesu ki a latou, kae ne seki taku foki ne ia a latou ne tino kaima‵nako kae fia ‵sili. I lō te fai penā, ne fakaaoga ne ia se mea matea ke tuku atu i ei se akoakoga. E se ti fia ma‵luga io me fia ‵sili a tamā tamaliki. Ne fakaasi atu ei ne Iesu me e ‵tau o ati aka ne ana soko a te vaegā kilokiloga tenei e uiga ki a latou. Ne fakaoti ne Iesu te akoakoga o ana soko, mai te fai atu: “Me ko te tino e fai ne ia a ia e pelā me se tino sē taulia i a koutou katoa, ko ia tenā e tafasili i te maluga.”—Luka 9:48.