Fanatu ki te fakasologa

Fanatu ki te fakasologa o mataupu

 MATAUPU E 53

Se Pule Telā e Mafai o Pule Atu ki te Natula

Se Pule Telā e Mafai o Pule Atu ki te Natula

MATAIO 14:22-36 MALEKO 6:45-56 IOANE 6:14-25

  • NE MA‵NAKO A TINO KE FAI A IESU MO TUPU

  • NE SASALE A IESU I LUGA I TE TAI, KAE FAKAFILEMU TE MATAGI

Ne lasi ‵ki te fakamalosiga ki tino a te fagaiga fakavavega ne Iesu a te fia afe o tino. Ne fakaiku aka ne latou me “tenei eiloa te Pelofeta telā ne ‵tau o vau ki te lalolagi,” ko te Mesia, kae e mautinoa me ka fai a ia mo fai se pule ‵lei. (Ioane 6:14; Teutelonome 18:18) Tela la, ne mafau‵fau a tino o puke a Iesu ke fai mo tupu.

Ne iloa ne Iesu te lotou aofaga. Ne uga atu ne ia a te vaitino ke olo, kae fakatonu atu ki ana soko ke toe ‵sopo atu ki te lotou poti. Se a te auala mo te koga ne olo atu latou ki ei? Ne ‵tau o olo atu latou ki Petesaita i te auala ki Kapanaumi. Kae ko Iesu, ne fano tokotasi tou tagata ki luga i te mauga o ‵talo i te po tenā.

I te mainaga o te masina mai mua malie eiloa o te vaveao, ne lavea ‵mao ne Iesu a te poti. Ne gasolo aka o sou malosi te tai ona ko te malosi o te matagi, kae ne logo‵fio eiloa te kau apositolo “i te pūlūga o te poti ona ko te mea e ‵pono tonu mai eiloa te matagi i olotou mua.” (Maleko 6:48) Ne fanaifo a Iesu mai te mauga kae ne kamata o sasale atu i luga i galu ki a latou. I te taimi nei ko oti ne ‘pūlu atu te lotou poti, kāti ko te tolu io me ko te fa maila.’ (Ioane 6:19) Ne lavea ne soko me e foliga mai me ne mua atu a ia i a latou, kae ne kamata o paka‵laga atu latou mo te ma‵taku: “A te mea tenei se aitu!”—Maleko 6:49.

Ne fakamalosi atu a Iesu: “Ke loto ‵toa koutou! Ko au fua tenei; sa ma‵taku.” Kae ne fai atu Petelu: “Te Aliki, kafai ko koe eiloa tenā, fakatonu mai ke fanatu au ki a koe i luga i te vai.” Ne tali atu Iesu: “Vau la!” Tenā ne sopo ifo ei a Petelu ki tua mo te poti, kae ne sasale atu ki a Iesu i luga o te vai. Kae i te taimi ne kilo atu ei a Petelu ki te matagi, ne mataku ei a ia, telā kamata ei o goto ifo a ia ki lalo. Ne kalaga atu a ia: “Te Aliki, fakasao aka au!” Ne ‵kapa atu te lima o Iesu o puke aka a Petelu kae fai atu: “Ko oko eiloa te foliki o tou fakatuanaki, kaia ne fakalotolotolua ei koe?”—Mataio 14:27-31.

Ne ‵sopo aka a Iesu mo Petelu ki loto i te poti, kae ne ‵noga foki te matagi. Ne ofo masei te kau soko, kae e mata, ne ‵tau eiloa o ofo latou? Moi ne malamalama latou “i te uiga o falaoa,” te vavega ne fai ne Iesu i nai itula mai mua atu i ei i te taimi ne fagai ne ia te fia afe o tino, ne seki ‵tau o ofo latou me ne mafai ne ia o sasale atu i luga i te tai kae fakafilemu foki ne ia te matagi. Ne ifo atu latou ki a ia, kae fai atu: “Ko koe eiloa ko te Tama a te Atua.”—Maleko 6:52; Mataio 14:33.

E seki leva kae ne oko atu latou ki Kenesaleta, se koga laugatasi e gali kae ola ‵lei i ei a lakau, i te feitu ki saute o Kapanaumi. Ne tau te lotou poti kae ne olo aka ki uta. Ne iloa ne tino a Iesu, telā ne olo fakatasi atu ei latou mo nisi tino mai i fenua i tafa, o avatu a tino ma‵saki ki a ia. I te taimi eiloa ne pa‵tele atu fua latou ki kapakapa o tena gatu, ne toe ‵lei eiloa latou.

I te taimi tenā, ko iloa ne te vaitino kolā ne matea ne latou te fagaiga fakavavega ne Iesu o te fia afe o tino, me i a Iesu ko fano. Tela la, i te taimi ne oko atu ei a tamā poti mai Tipelia, ne ‵sopo atu a tino ki ei kae olo ki Kapanaumi o ‵sala a Iesu. I te taimi ne maua ei ne latou, ne fesili atu penei: “Te Faiakoga, anafea ne oko mai ei koe ki konei?” (Ioane 6:25) Ne ‵liko ne Iesu latou mō se pogai ‵lei.