Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 63

Ne Tuku Atu ne Iesu a Pati Fakatonutonu e Uiga ki te Fakavāivāi Atu mo te Agasala

Ne Tuku Atu ne Iesu a Pati Fakatonutonu e Uiga ki te Fakavāivāi Atu mo te Agasala

MATAIO 18:6-20 MALEKO 9:38-50 LUKA 9:49, 50

  • PATI FAKATONUTONU E UIGA KI TE FAKAVĀIVĀI ATU

  • KAFAI KO FAI NE SE TAINA SE AGASALA

Ne fatoa fakaasi atu ne Iesu a te uiga e ‵tau o maua ne ana soko. E ‵tau o ‵kilo atu latou ki a latou eiloa e pelā mo tama‵liki, e loto maulalo kae se fia fai tulaga. E ‵tau o talia ne soko ‘a vaegā tamaliki penā ona ko tena igoa kae ka talia foki ei ne latou a Iesu.’—Mataio 18:5.

Ne fatoa kinau te kau apositolo me ko oi te ‵toe tino sili, tela la, ne mafai o ‵kilo atu latou ki pati a Iesu e pelā me se polopolokiga. Kae nei la, ko fakasae aka ne te apositolo ko Ioane se mea ne fatoa tupu: “Te Faiakoga, ne lavea ne matou se tagata e afuli ne ia a temoni i tou igoa, kae ne taumafai matou o ‵vao a ia, me i a ia e se tautali mai i a matou.”—Luka 9:49.

E mata, ne manatu aka a Ioane me ko te kau apositolo fua e ‵tau o faka‵lei ne latou a nisi tino io me afuli ne latou a temoni? Kafai e penā loa, kaia ne mafai ei ne te tagata Iutaia tenei o afuli a agaga ma‵sei? E foliga mai me ne mafaufau a Ioane me e se ‵tau o fai ne te tagata tenā a galuega ‵mana, me e seki kau atu a ia ki a Iesu mo te kau apositolo.

Ne ofo masei a Ioane me ne fai atu a Iesu: “Sa taumafai o taofi a ia, me e seai se tino e fai ne ia a galuega ‵mana i toku igoa ka mafai ne ia o fai fakavave ne pati sē ‵lei e uiga ki a au. Me ko so se tino telā e se ‵teke ki a tatou e kau mo tatou. Kae ko so se tino e tuku atu ne ia ki a koutou se ipu vai ke inu ona ko koutou ko tino o Keliso, au e fai tonu atu ki a koutou, ka se mafai o galo tena taui.”—Maleko 9:39-41.

Ikai, i te taimi tenei, e se manakogina ke tautali atu te tagata tenā ki te Keliso ko te mea ke kau atu ei ki a Iesu. E seki fakatu aka te fakapotopotoga Kelisiano i te vaitaimi tenā, tela la, a te sē faima‵laga fakatasi o te tagata tenā mo Iesu, e se fakauiga i ei me i a ia se tino ‵teke io me fakamalosi aka ne ia se lotu ‵se. Ne fakatuanaki eiloa te tagata tenā ki te igoa o Iesu, kae fakaasi atu i pati a Iesu me ka se galo atu i te tagata tena taui.

I te suā feitu la, ne fakamataku ‵ki māfai ko fakavāivāi te tagata tenā ona ko pati mo faifaiga a te kau apositolo. Ne fai atu ne Iesu te mea e lavea ne ia: “Kae ko so se tino e fakavāivāi ne ia se tino i tino fatauva konei e fakatuanaki ki a au, e ‵lei atu moi ne ‵sai tena ua ki se fatu solo saito telā e toso ne asini kae ‵pei atu ki te moana.” (Maleko 9:42) Ne fai atu ei a Iesu me e ‵tau o ave keatea ne ana soko so se mea, faitalia me e ‵pau eiloa te tāua o te mea tenā mo te tāua o se lima, se vae, io me se mata māfai e fakavāivāi atu a mea konā ki a latou. E ‵lei atu ke galo te mea tāua tenā kae ulu atu ki te Malo o te Atua, i lō te manumanu ki ei kae iku atu ei ki Kēna (te Vanu o Hinoma). Kāti ne lavea sāle ne apositolo a te vanu tenei, e pili ki Ielusalema, kae ‵sunu i ei a kaiga, tela la, ne malamalama latou me ne fakaata mai i ei te fakaseaiga tumau.

Ne fakailoa atu foki ne Iesu: “Ke mo a eiloa e takalia‵lia koutou ki se tokotasi o tino fatauva konei. Au e fai atu ki a koutou me e lavea faeloa ne olotou agelu i te lagi a foliga o toku Tamana telā i te lagi.” E pefea te tāua o “tino fatauva” konā ki tena tamana? Ne fai atu ne Iesu se tala e uiga ki te tagata  telā e 100 ana mamoe, kae ko galo se mamoe e tasi. Ne tiakina ne te tagata ana mamoe e 99 kae fanatu o ‵sala ki te mamoe telā ko galo, kae i te taimi ne maua ne ia, ne sili atu tena fiafia ki ei i lō mamoe e 99. Ne toe fai mai a Iesu: “E penā foki a toku Tamana i te lagi, e se manako ke mate se tokotasi o tino fatauva konei.”—Mataio 18:10, 14.

Kāti ne mafaufau a Iesu ki te kinauga o ana apositolo e uiga ki te ‵toe tino sili, telā ne fakamalosi atu ei a Iesu ki a latou: “Ke i a koutou te masima, kae tausi te filemu i va o koutou.” (Maleko 9:50) E momea aka te ‵gali o mea‵kai māfai e fakaaoga te masima. E fai ne te masima fakatusa ke taliagofie a pati a se tino, kae fesoasoani atu ke fakatumau te filemu, telā e se mafai o maua mai i kinauga.—Kolose 4:6.

I nisi taimi, ka ‵sae aka a tulaga faiga‵ta, kae ko oti ne taku mai ne Iesu a te auala ke fakafesagai faka‵lei atu ki ei. Muna a Iesu: “Kafai ne fai ne tou taina se agasala, fano o faipati ki ei i a koulua aka eiloa kae fakaasi atu tena mea ‵se. Kafai e fakalogo a ia, ko maua ne koe tou taina.” Kae e a māfai e se fakalogo mai a ia? “Puke la ne koe se tokotasi io me se tokolua, ko te mea ke fakatalitonu aka ei a mea katoa ne fai ne molimau e tokolua io me e tokotolu.” Kae kafai e seki ‵lei loa te fakalavelave, e ‵tau o fai‵pati atu lāua ki “te fakapotopotoga,” telā ko toeaina tofia kolā e mafai ne latou o fai se fakaikuga. Kae e a māfai koi tumau eiloa te sē fia fakalogo mai a te tino agasala? “Ke fai la ne koe a ia e pelā me se tagata o fenua fakaa‵tea io me se tino ‵tae lafoga,” ko tino kolā e se fesokotaki sāle ki ei a tino Iutaia.—Mataio 18:15-17.

E ‵tau o tau‵tali fakapili‵pili atu a ovasia i te fakapotopotoga ki te Muna a te Atua. Kafai e maua ne latou se tino agasala kae e ‵tau o polopoloki, ka ‘saisai foki i te lagi’ a te lotou fakamasinoga. Kae kafai e maua atu ne latou me e seai se mea ‵se, ka ‘‵tala foki i te lagi’ a te fakaikuga tenā. Ka aoga eiloa a fakatakitakiga konei i te taimi ne fakatu aka ei te fakapotopotoga Kelisiano. I vaegā tulaga faigata penā, ne fai atu a Iesu: “So se koga e maopoopo i ei se tokolua io me se tokotolu i toku igoa, e nofo foki au i konā.”—Mataio 18:18-20.