Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 38

Ne Fia Iloa ne Ioane se Mea Mai i a Iesu

Ne Fia Iloa ne Ioane se Mea Mai i a Iesu

MATAIO 11:2-15 LUKA 7:18-30

  • NE FESILI ATU A IOANE TE PAPATISO E UIGA KI TE TULAGA O IESU

  • NE TAVAE NE IESU A IOANE

Kāti ko kātoa nei te tasi tausaga ne nofo atu ei a Ioane te Papatiso i te falepuipui. Kae koi logo eiloa a ia i tala e uiga ki galuega fakaofoofogia a Iesu. Mafaufau la ki lagonaga o Ioane i te taimi ne fai atu ei ana soko me ne fakatu aka ne Iesu te tama tagata a te fafine telā ko mate tena avaga i Naina. Kae ne fia lagona tonu eiloa ne Ioane mai i a Iesu a te uiga tonu o mea katoa konei. Telā ne uga atu ei ne Ioane ana soko e tokolua. Se a te pogai? Ke fesili atu ki a Iesu: “A koe ko te Tino telā ka vau, io me koi faka‵tali matou ki se isi tino?”—Luka 7:19.

E mata, ne tai fai fakaa‵tea te fesili tenā? A Ioane se tagata malosi ‵ki i te feitu faka-te-agaga, telā ne lavea ne ia a te fanaifoga o te agaga o te Atua ki luga i a Iesu, kāti i se lua tausaga ko ‵teka i te taimi ne papatiso ei ne ia a Iesu, kae ne lagona foki ne ia a te leo fiafia o te Atua. E seai eiloa ne pogai e ‵tau ei o mafau‵fau tatou me ko gasolo o vāivāi te fakatuanaki o Ioane. Moi fai penā, penei e se tavae malosi ne Iesu a Ioane i te taimi tenei. Kae kafai e seki fakalotolotolua a Ioane, kaia ne fai atu ei ne ia te fesili tenā e uiga ki a Iesu?

Kāti ne manako fua a Ioane ki se fakamaoniga mai i a Iesu eiloa me i a ia ko te Mesia. Ka fakamalosi atu eiloa te mea tenei ki a Ioane i te taimi ne nofo tigaina atu ei a ia i te falepuipui. Kae e isi aka foki se uiga o te fesili tenā a Ioane. Ne masani ‵lei a Ioane mo valoaga i te Tusi Tapu kolā e fakaasi mai i ei me i te Tino Fakaekegina a te Atua e ‵tau o fai mo fai se tupu mo se tino fakasao. Kae ne nofo atu eiloa a Ioane i te falepuipui i te fia o masina mai tua o te papatisoga o Iesu. Tela la, ne fesili atu a Ioane me e isi aka se tino e vau, se sui o Iesu, telā ka fakataunu katoatoa ne ia a mea katoa kolā ne ‵valo mai me ka fai ne te Mesia.

I lō te fai ‵tonu atu fua ki soko o Ioane penei, ‘E tonu, au ko te Tino telā e vau!’ ne tuku atu ne Iesu a fakamaoniga me ne maua ne ia te fesoasoani o te Atua mai te faka‵leiga o tino e tokouke mo olotou vaegā ma‵saki valevale. Ne fai atu ei a ia ki soko konā: “Olo o fakailoa atu ki a Ioane a mea kolā ko lagona kae lavea ne koulua: A tino ‵kivi ko ‵kite kae ko tino vae ma‵sei ko sa‵sale, a tino lepela ko oti ne faka‵magina kae ko tino ‵tuli ko ‵logo, a tino ‵mate ko oti ne faka‵tu kae ko tino ma‵tiva ko oti ne folafola atu ki ei te tala ‵lei.”—Mataio 11:4, 5.

Kāti ne fakauiga te fesili a Ioane me ne fakamoemoe tou tagata ke uke atu a mea ka fai ne Iesu kae ke fakasaoloto foki ne ia a Ioane mai te falepuipui. Kae ne fai atu a Iesu ki a Ioane ke mo a ma fakamoemoe ki nisi mea aka i lō vavega kolā ne fai eiloa ne Ia.

I te ologa o soko o Ioane, ne fakatalitonu atu ne Iesu ki te vaitino me e sili atu a Ioane i lō te pelofeta. A iako te “avefekau” a Ieova telā ne ‵valo mai i te Malaki 3:1. A iafoki ko te pelofeta ko Elia, e pelā mo te mea ne ‵valo mai i te Malaki 4:5, 6. Ne fakamatala mai a Iesu: “Au e fai tonu atu ki a koutou, e seai se tino mai i a latou kolā ne fa‵nau mai i fāfine e sili atu i a Ioane te Papatiso, kae ko te ‵toe tino malalo i te Malo o te lagi e sili atu i a ia.”—Mataio 11:11.

Mai i ana pati me i te ‵toe tino malalo i te Malo o te lagi e sili atu i a Ioane, ne fakaasi mai ei ne Iesu me ka se aofia a Ioane i te Malo faka-te-lagi. Ne fakatoka ne Ioane a te auala mō Iesu kae ne mate a ia a koi tuai o ‵tala a te auala ki te lagi. (Epelu 10:19, 20) Kae ne fai eiloa a Ioane mo fai se pelofeta fakamaoni a te Atua kae ka nofo foki a ia i te lalolagi mai lalo i te Malo o te Atua.