Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 35

Te Lāuga Takutakua i Luga i te Mauga

Te Lāuga Takutakua i Luga i te Mauga

MATAIO 5:1–7:29 LUKA 6:17-49

  • TE LĀUGA I LUGA I TE MAUGA

Ne mafai loa o fi‵ta a Iesu i te fakamāumāuga ne ia o te po kātoa i te faiga o tena ‵talo, kae oti aka, ne filifili ne ia ana soko e toko 12 ke fai mo fai ne apositolo. Nei la ko ao, kae koi maua eiloa ne ia a te malosi mo te manakoga ke fesoasoani atu ki tino. Ne fai eiloa a ia penā i se feitu mauga i Kalilaia, kāti e se ‵mao mai te koga ne fai sāle ei ana galuega i Kapanaumi.

Ne olo atu a te vaitino e tokouke ki a ia mai koga ‵mao. Ne o‵mai a nisi tino mai te feitu ki saute, mai Ielusalema mo kogā koga i Iuta. Kae ko nisi tino ne o‵mai mai fa‵kai i te tafātai o Tulo mo Saitonu i te feitu ki matū togala. Kaia ne o‵mai ei latou o ‵sala atu ki a Iesu? Ke “fakalogo‵logo ki a ia kae ke faka‵lei foki olotou masaki.” Kae tenā eiloa te mea ne tupu—ne faka‵lei ne Iesu a “latou katoa.” Mafaufau ki te mea tenā! Ne ‵lei a tino ma‵saki “katoa.” Ne tavini atu foki a Iesu ki “tino kolā ne fakalavelavegina ne agaga ma‵sei,” ko agelu ma‵sei a Satani.—Luka 6:17-19.

Ne toe maua ne Iesu se koga laugatasi i te feitu mauga kae ne maopoopo atu a te vaitino ki ana tafa. Kāti ne ‵nofo pili atu eiloa ki a ia ana soko, kae maise eiloa ana apositolo e toko 12. Ne fia fakalogo‵logo a tino katoa ki te faiakoga telā e mafai o fai ne ia a galuega ‵mana penā. Ne fai eiloa ne Iesu se lāuga telā ne aoga malosi ki ana tino fakalogo‵logo. Talu mai te taimi tenā, e tokouke foki a nisi tino ne maua ne latou a mea aoga mai i ei. E mafai foki o maua ne tatou a mea aoga, ona ko te ‵loto o fakamatalaga faka-te-agaga mo te faigofie kae manino ‵lei a te auala ne fakamatala atu i ei. Ne fakaaoga ne Iesu a tala masani mo mea kolā ne iloa ne tino. Ne fai ne te mea tenei ke maina faka‵lei a tino katoa kolā e ‵sala ki se olaga tai ‵lei atu i te auala o te Atua. Ne a manatu tāua i te lāuga a Iesu kolā e aoga malosi?

KO OI E FIA‵FIA TONU?

E ma‵nako a tino katoa ke fia‵fia. Ona ko te mea tenei, ne kamata ne Iesu tena fakamatalaga e uiga ki tino kolā e fia‵fia tonu. Ke fakaataata i ‵tou mafaufau a te ‵saga fakavave atu o ana tino fakalogo‵logo ki te fakamatalaga tenei. Kae kāti ne ‵numi latou i nisi mea.

Ana muna: “E fia‵fia a latou kolā e iloa ‵lei ne latou olotou manakoga faka-te-agaga, me ka fai mō latou te Malo o te lagi. E fia‵fia a latou kolā e fanoa‵noa, me ka fakamafanafanagina latou. . . . E fia‵fia a latou kolā e fia‵kai kae fiainu ki te amiotonu, me ka ma‵kona eiloa latou. . . . E fia‵fia a latou kolā e fakasauagina ona ko te amiotonu, me ka fai mō latou te Malo o te lagi. E fia‵fia koutou māfai e fakatauemu kae fakasauagina koutou ne tino, . . . ona ko au. Ke fia‵fia kae ‵lifu.”—Mataio 5:3-12.

Se a te mea ne fakauiga ki ei a Iesu i te faiatuga “e fia‵fia”? E seki fakasino atu a ia ki te mata katakata e pelā mo te tino telā e fakafiafiagina. A te fiafia tonu e tai ‵loto atu tena uiga. E aofia i ei a te lotomalie tonu, te tokagamalie mo te aoga o te olaga.

E fai mai a Iesu me i tino kolā e iloa ne latou olotou manakoga faka-te-agaga, e fanoa‵noa ona ko olotou tulaga agasala, ko iloa ne latou te Atua kae tavini atu ki a ia, ka maua eiloa ne latou konā a te fiafia tonu. Faitalia eiloa me e takalia‵lia atu ki a latou kae fakasauagina foki ona ko te faiga o te loto o te Atua, e fia‵fia eiloa latou ona ko te iloa atu me e fakafiafia ne latou te Atua kae ka taui ne ia latou ki te ola se-gata-mai.

E mafau‵fau a tino e tokouke me i te maumea mo te kausaki atu ki fakafiafiaga ko mea kolā e fai ei se tino ke fiafia. Kae e ‵kese a mea ne fai mai ne Iesu. A te taku atu o te ‵kesega tenā kāti ne fai ei ana tino fakalogo‵logo ke mafau‵fau faka‵lei, ne fai atu a ia:  “Kae kalofa eiloa i a koutou tino mau‵mea, me konā eiloa a mea e maua ne koutou. Kalofa eiloa i a koutou kolā e ma‵kona nei, me i a koutou ka fia‵kai. Kalofa eiloa i a koutou kolā e kata‵kata nei, i a koutou ka fanoa‵noa kae ‵tagi mautuutu. Kalofa eiloa i a koutou māfai e tavaegina ne tino katoa, me tenei eiloa te mea ne fai ne olotou tupuga ki pelofeta ‵loi.”—Luka 6:24-26.

Kaia e malaia ei a te tino telā e maumea, e katakata, kae maua a tavaega mai nisi tino? Ona ko te mea kafai ko maua ne se tino a mea konā kae fakatāua ne ia, ka se saga atu ei a ia o fai faka‵lei tena taviniga ki te Atua, telā ko te auala fua e tasi e maua ei te fiafia tonu. Kae ne seki fakauiga fua a Iesu me i te mativa io me ko te fiakai e fai ei se tino ke fiafia. A te ‵tonuga loa, ko vaegā tino fakaa‵lofa penā e masani o talia ne latou a akoakoga a Iesu kae maua foki ne latou a te fakamanuiaga ko te fiafia tonu.

Ne fai atu a Iesu mo te mafaufau ki ana soko: “A koutou ko te masima o te lalolagi.” (Mataio 5:13) A te ‵tonuga loa, a latou e se ne masima ‵tonu. I lō te fai penā, e fakatumau ne te masima a te ‵lei o mea. Ne tausi a masima e uke i tafa o te fatafaitaulaga i te faletapu o te Atua, kae ne fakaaoga ke fakamasima ki ei a taulaga. E fakaata mai foki i ei a te fakasaolotoga mai faifaiga sē fakamaoni io me ko amioga ma‵sei. (Levitiko 2:13; Esekielu 43:23, 24) A soko o Iesu ko te “masima o te lalolagi” me e tumau te aoga o te lotou fesoasoani atu ki tino ke ‵kalo keatea mai i fakamaseiga ki te lotou malosi faka-te-agaga mo olotou amioga. Ao, e mafai o fakatumau ne te lotou fekau a ola o tino katoa kolā e talia ne latou.

Ne fai atu foki a Iesu ki soko: “A koutou ko te mainaga o te lalolagi.” E se tuku te moli ki lalo i se kete kae tuku atu eiloa ki luga i se tulaga moli, ko te mea ke mafai o maina atu. Tela la, ne fakamalosi atu a Iesu penei: “Ke penā foki o maina atu te otou mainaga ki tino, ko te mea ke mafai o matea ne latou otou galuega ‵lei kae ‵viki atu ei ki te otou Tamana telā i te lagi.”—Mataio 5:14-16.

TULAGA MA‵LUGA I MEA TAU AMIOGA MŌ ANA SOKO

Ne ‵kilo atu a takitaki lotu ki a Iesu e pelā me se tino ‵teke ki te Tulafono a te Atua kae ne fatoa aofaga fakatasi latou ke tamate a ia. Tela la, ne faipati ‵tonu atu a Iesu: “Sa mafaufau i a au ne vau o ofa te Tulafono io me ko muna a Pelofeta. Au ne seki vau o ofa kae o fakataunu faka‵lei.”—Mataio 5:17.

Ne fakatāua malosi ne Iesu a te Tulafono a te Atua  kae ne fakamalosi atu foki ki nisi tino ke fai penā. A te ‵tonuga loa, ne fai atu a ia penei: “Tela la, so se tino e soli ne ia se fakatonuga foliki e tasi i konei kae akoako atu a nisi tino ke fai penā, ka takugina a ia ko te ‵toe tino fatauva i te Malo o te lagi.” Ne fakauiga a ia me ka se ulu atu eiloa a te vaegā tino tenā ki te Malo. Ne toe fai mai a ia: “Kae ko so se tino e fai kae akoako ne ia a mea konā, ka takugina a ia se tino maluga i te Malo o te lagi.”—Mataio 5:19.

Ne taku fakamasei ne Iesu a manatu kolā e fai ei ke solitulafono se tino ki te Tulafono a te Atua. I te otiga ne siki mai ne Iesu a pati konei i te Tulafono “Sa tatino,” ne toe fai atu a ia: “So se tino e tumau tena ita ki tena taina ka fakamasino a ia i te fono.” (Mataio 5:21, 22) E fakamataku te tumau i te ita ki se takaga, me e mafai o iku atu i ei ki te tatino. Tela la, ne fakamatala mai ne Iesu a te lasi o te taumafaiga e ‵tau o fai ke maua mai ei te filemu: “Tela la, kafai e avatu ne koe tau meaalofa ki te fatafaitaulaga kae masaua ne koe me e isi se mea e ita ei tou taina ki a koe, tuku la tau meaalofa i tafa o te fatafaitaulaga. Fano muamua o faka‵lei mo tou taina ko foki mai ei koe o ofo atu tau meaalofa.”—Mataio 5:23, 24.

A te suā fakatonuga i te Tulafono ko te ‵teke atu ki te mulilua. Ne fai mai a Iesu: “Ne lagona ne koutou a pati konei: ‘Sa mulilua.’ Kae e fai atu au ki a koutou me ko so se tino e onoono ki se fafine kae e fiafai ki ei ko mulilua a ia i tena loto.” (Mataio 5:27, 28) Ne seki faipati fua a Iesu e uiga ki te mafaufau malie ki se amioga sē ‵tau kae i lō te fai penā, ne faka‵mafa atu ne ia a te fakamataku o ‘te onoono atu faeloa ki ei.’ A te onoono atu faeloa e fakamalosi aka ei a manakoga ma‵sei. Kae kafai e sae aka se avanoaga, e mafai o iku atu ei ki te mulilua. E mafai pefea ne se tino o puipui a te mea tenei ke mo a ma tupu? E mafai o manakogina a te faiga o toe mea faiga‵ta. Ne fai mai a Iesu: “Kafai ko tou mata fakaatamai e fai ne ia koe ke agasala, ‵kape kae ‵pei kea‵tea. . . . Kafai foki ko tou lima fakaatamai e fai ne ia koe ke agasala, ‵kati kae ‵pei kea‵tea.”—Mataio 5:29, 30.

Ke tumau i te ola, ne loto fia‵fia a nisi tino ke ‵kati se vaega o te foitino telā ko masei ‵ki. Ko maina ei i pati a Iesu me e sili atu te tāua ke “‵pei kea‵tea” so se mea, ke oko foki eiloa ki toe mea tāua ‵ki e pelā mo te mata io me se lima, ko te mea ke ‵kalo keatea mai i mafaufauga sē ‵tau mo faifaiga sē ‵tau kolā e iku mai i ei. Ne fakamatala mai a Iesu: “Me e ‵lei atu ki a koe ke galo se vaega e tasi o tou foitino i lō te ‵pei o tou foitino kātoa ki loto i Kena,” (ko te koga ne ‵sunu ei a kaiga mai tua o Ielusalema), telā e fakauiga ki te fakaseaiga se-gata-mai.

Ne tuku mai foki ne Iesu a pati fakatonutonu e uiga ki faifaiga kolā e ‵tau o fai ki tino kolā e fakapakia mai io me fakaitaita mai. Ne fai mai a ia: “Sa ‵teke ki te tino masei, kae ko so se tino e ‵pa ne ia tou kalafou fakaatamai, toe ‵fuli atu ki ei tou suā kalafou.” (Mataio 5:39) E se fakauiga i ei me e se ‵tau o puipui ne se tino a ia io me ko tena kāiga māfai e kaitaua atu se tino. Ne fai mai a Iesu me i te ‵pa mai, e se ko te fakalogo‵mae malosi atu io me ko te tamate o te suā tino; kae se mea fakaitaita. Ne fai mai a ia me kafai  e taumafai se tino o fakaitaita mai ke tupu ei se taua io me se kinauga, faitalia me e ‵pa tonu mai tena lima io me e fakaaoga ne ia a pati fakalogo‵mae, ke mo a ma toe taui atu.

E fetaui ‵lei te fakatakitakiga tenā mo te tulafono a te Atua ke alofa ki tou tuakoi. Tela la, ne fakamalosi atu a Iesu ki ana tino fakalogo‵logo: “Kae e fai atu au ki a koutou: Tumau i te a‵lofa ki otou fili kae ‵talo mō latou kolā e fakasaua atu ki a koutou.” Ne tuku atu ne ia se pogai tāua mō te mea tenā: “Ko te mea ke fai koutou mo tama a te otou Tamana telā i te lagi, me e fakamaina mai ne ia a te la ki luga i tino ma‵sei mo tino ‵lei kae e faka‵to ne ia te vaiua ki luga i tino amio‵tonu mo tino sē amio‵tonu.”—Mataio 5:44, 45.

Ne fakatoetoe aka ne Iesu a te vaega tenei o tena lāuga, ana pati: “Tela la, e ‵tau o ‵lei katoatoa koutou e pelā mo te otou Tamana i te lagi e ‵lei katoatoa.” (Mataio 5:48) E tonu, ne seki fakauiga eiloa ne Iesu me i tino e mafai o ‵lei katoatoa. Kae mai te fakaakoako atu ki te Atua, e mafai ei o fakaasi atu ne tatou a te ‵tou a‵lofa ki nisi tino, e aofia i ei ‵tou fili. E fai mai penei i te suā auala: “Ke tumau i te loto fakamagalo, e pelā eiloa mo te otou Tamana e loto fakamagalo.”—Luka 6:36.

TE ‵TALO MO TE TALITONU KI TE ATUA

I te taimi ne faka‵soko atu ei ne Iesu tena lāuga, ne fakamalosi atu a ia ki ana tino fakalogo‵logo: “Fakaeteete ke mo a ma fakaasiasi te otou amiotonu i mua o tino ko te mea ke matea ne latou.” Ne taku fakamasei ne Iesu a tino kolā ne fakaasi fakaloiloi atu te lotou amioatua, mai te ‵toe fai atu: “Kafai e avatu ne koe au meaalofa, sa fakatagi mua ne koe se pu e pelā mo mea e fai ne tino ‵loi.” (Mataio 6:1, 2) E ‵lei atu ke avatu a meaalofa i se auala telā e se iloa ne tino.

Ne toe fai atu a Iesu: “Kafai foki e ‵talo koutou, sa fai pelā mo tino ‵loi me e ma‵nako latou o ‵talo i sunako mo maga o auala ko te mea ke matea latou ne tino.” I lō te fai penā, ne fai atu a ia: “Kae kafai koe e ‵talo, ulu ki loto i tou potu, ‵pono te mataloa, kae ‵talo atu ki tou Tamana telā e nofo i te koga sē lavea.” (Mataio 6:5, 6) E se ‵teke atu a Iesu ki ‵talo katoa kolā e fai i mua o tino, me ne fai atu foki ne ia a vaegā ‵talo penā. Ne taku fakamasei ne ia a ‵talo kolā ne fai atu ko te mea ke ofo a tino fakalogo‵logo kae ke maua foki ne latou a tavaega.

Ne fakatonutonu atu a ia ki te vaitino: “Kafai koe e ‵talo, sa fakafoki‵foki au pati, e pelā mo mea e fai ne tino o fenua fakaa‵tea.” (Mataio 6:7) E seki fakauiga ne Iesu me e ‵se a te ‵talo atu faeloa ki te mataupu e tasi. E fakaasi mai ne ia a te sē ‵lei o tugāpati kolā e “fakafoki‵foki” atu, mai te faiga o te ‵talo e pelā me se mea tauloto. Ne tuku atu ne ia se ‵talo fakaakoako telā e aofia i ei a fakamolemole e fitu. A fakamolemole muamua e tolu e fakaasi mai i ei me e ‵tau o pule mai te Atua, e penā foki mo ana fuafuaga—ko tena igoa ke faka‵malugina, tena Malo ke oko mai, mo tena loto ke fai. Kafai ko oti ne taku atu a mea muamua konā, ko ‵tau ei o fai atu ‵tou fakamolemole totino mō ‵tou mea‵kai i aso takitasi mo te fakamagaloga o agasala, e pelā foki mo te fakamolemole  ke mo a ma fakaosoosogina ke sili atu i mea kolā e mafai o kufaki i ei, kae ke fakasao mai i te tino masei.

E ‵tau o pefea te tāua o ‵tou kope ki a tatou? Ne fakamalosi atu a Iesu ki te vaitino: “Ko lava te fakaputu o koloa mō koutou i te lalolagi nei, me e oko ki ei a anufe mo te pala kae oko foki ki ei a tino o kaisoa ne latou.” Ko oko eiloa i te ‵tonu o te manatu tenā! E mafai kae ma‵sei eiloa a koloa faka-te-foitino, kae e seai eiloa se lotou aoga ki te ‵tou fesokotakiga mo te Atua. E ‵tusa mo te mea tenā, ne toe fai atu a Iesu: “Kae fakaputu ne otou koloa i te lagi.” E mafai o fai ne tatou a te mea tenei mai te fakamuamua o te taviniga ki te Atua i te olaga. E seai se tino e mafai o ave keatea ne ia ‵tou tulaga ‵lei mo te Atua io me ko te taui o te ola se-gata-mai. E ‵tonu eiloa a pati a Iesu konei: “Me ko te koga e tuku i ei ou koloa, e tuku foki i ei tou loto.”—Mataio 6:19-21.

Ke faka‵mafa atu te manatu tenei, ne fai atu ne Iesu se tala fakatusa: “A te mōli o te foitino ko mata. Tela la, kafai e ‵saga tonu atu ou mata, ka maina tou foitino kātoa. Kae kafai ou mata e kaisanosano, ka pouli tou foitino kātoa.” (Mataio 6:22, 23) Kafai e galue ‵lei ‵tou mata, e fai eiloa e pelā me se moli ki ‵tou foitino. Kae ke fai penā, e ‵tau o ‵kilo faka‵lei atu ki se mea fua e tasi; me kafai e se fai penā, e mafai o ‵se a fakatautauga ki te olaga. A te saga tonu atu ki mea faka-te-foitino i lō te taviniga ki te Atua, ka mafai ei o “pouli tou foitino kātoa,” kāti mai te tosina atu ki mea kolā e se maina malosi io me e pouli.

Ne tuku atu ei ne Iesu se fakaakoakoga aoga: “E seai se tino e mafai o tavini ki matai e tokolua, me ka takalialia a ia ki te tino e tokotasi kae alofa ki te suā tino, io me ka ‵piki a ia ki te tino e tokotasi kae ka manatu fatauva ki te suā tino. E se mafai o tavini koutou ki te Atua fakatasi mo Koloa.”—Mataio 6:24.

Kāti ne manava‵se a nisi tino kolā ne lagona ne latou a pati a Iesu ki te kilokiloga e ‵tau o maua ne latou ki olotou manakoga faka-te-foitino. Tela la, ne fakatalitonu atu a ia me e se ‵tau o manava‵se latou māfai e fakamuamua ne latou a te taviniga ki te Atua. “Onoono faka‵lei ki manu eva i te lagi; e se ‵toki fuaga  io me tau fuataga io me fakaputu meakai ki olotou fale koloa, kae e fagai eiloa latou ne te otou Tamana i te lagi.”—Mataio 6:26.

Kae e a pulalakau o te vao i luga i mauga? Ne fai atu a Iesu me “ke oko foki eiloa ki a Solomona i tena ‵malu katoatoa ne seki pei eiloa ki se gatu gali e penei mo se pulalakau e tasi i pulalakau konei.” Se a te mea e fakaasi mai i te mea tenei? “Kafai tenei te auala ne fakalavalava ei ne te Atua a lakau o te vao kolā e ola mai i te aso nei kae taeao ko ‵pei ki te afi, ka se sili atu la te fakalavalava ne ia o koutou konā e fo‵liki otou fakatuanaki?” (Mataio 6:29, 30) Ne fakamalosi atu eiloa a Iesu mo te poto penei: “Ke mo a e manava‵se koutou kae fai aka, ‘Ne a ‵tou mea ka kai?’ io me, ‘Ne a ‵tou mea ka inu?’ io me ‘Ne a mea ka ‵pei tatou ki ei?’ . . . E iloa ne te otou Tamana i te lagi me ma‵nako koutou ki mea konei. Tela la, ke ‵sala muamua faeloa ne koutou te Malo mo tena amiotonu, kae ka fakaopoopo atu a mea katoa konei ki a koutou.”—Mataio 6:31-33.

TE AUALA KI TE OLA

Ne ma‵nako eiloa a te kau apositolo mo tino loto fakamaoni ke ola i se auala telā e fakafiafia atu ki te Atua, kae e sē se mea faigofie ona ko olotou fakanofonofoga. E pelā mo te tokoukega o Falesaio, ne mataonoono kae tō ‵mafa te fakamasinoga ne latou a nisi tino. Tela la, ne fakamalosi atu a Iesu ki ana tino fakalogo‵logo: “Sa fakamasino atu ko te mea ke se fakamasinogina koutou, me i te fakamasinoga telā e fai ne koutou ka fakamasino foki koutou ki ei.”—Mataio 7:1, 2.

Se mea fakamataku ‵ki ke tautali atu ki amioga a te kau Falesaio, e pelā mo te tala fakatusa ne fai mai ne Iesu: “E mata, e mafai ne se tino ‵kivi o takitaki te suā tino ‵kivi? E mata, ka se ‵to tokolua atu lāua ki te lua?” Tela la, ne ‵tau o pefea te kilokiloga o tino fakalogo‵logo a Iesu ki nisi tino? E se ko te mataonoono atu, me e mafai o fai mo fai se matugā mea ‵se. Ne fesili atu a ia: “E mafai pefea o fai atu koe ki tou taina, ‘Taina, talia mai ke tapale ne au te mouku tenā i tou mata,’ kae e se lavea ne koe te potu lakau i tou mata? A koe se tino loi! Tapale muamua te potu lakau i tou mata, ko matea faka‵lei ei ne koe te auala ke tapale ei keatea te mouku i te mata o tou taina.”—Luka 6:39-42.

E se fakauiga i ei me e se ‵tau o fai ne soko so se fakamasinoga. Ne fakamalosi atu a Iesu ki a latou: “Sa tuku atu a mea tapu ki kuli io me ‵pei atu a penina a koutou ki mua o puaka.” (Mataio 7:6) E tāua ‵ki eiloa a muna‵tonu mai i te Muna a te Atua, e pelā me ne penina fakatusa. Kafai e isi ne tino kolā e fai pelā me ne manu, kolā e se fakatāua ne latou a muna‵tonu tāua konā, e ‵tau o fulitua atu a soko ki a latou kae salasala atu ki tino kolā e fia‵fia.

I te ‵toe mafau‵fau ki te mataupu e uiga ki te ‵talo, ne toe faka‵mafa atu foki ne Iesu a te aoga ke tumau i ei. “Tumau i te fakamolemole atu.” E toka te Atua o tali a ‵talo, e pelā eiloa mo te mea ne faka‵mafa mai ne Iesu i tena fesili: “Ko oi te tino i a koutou e mafai o tuku atu ne ia se fatu ki tena tama, māfai e fakamolemole mai ki se falaoa? . . . Tela la, kafai a koutou ne tino ma‵sei, kae e iloa ne koutou o tuku atu a mea ‵lei ki otou tama‵liki, e sili fakafia atu la te fia tuku atu ne te otou Tamana telā i te lagi a mea ‵lei ki tino kolā e fakamolemole atu ki a ia!”—Mataio 7:7-11.

Ne tuku mai ei ne Iesu a te tulafono takutakua e uiga ki amioga: “Tela la, a mea katoa kolā e ma‵nako koutou ke fai atu ne tino ki a koutou, e ‵tau foki o fai ne koutou ki a latou.” E mata, e se ‵tau mo tatou katoa o fakatāua kae fakagalue aka a te fakamalosiga  aoga tenā i ‵tou faifaiga ki nisi tino? Kae e mafai eiloa o faigata a te mea tenā, e pelā mo te mea e fakaasi mai i te akoakoga a Iesu: “Ulu atu koutou ki te mataloa mataliki me i te auala telā e tau atu ki te fakaseaiga e lauefa kae saosao, kae e tokouke a tino e olo atu i ei; kae e mataliki te mataloa kae sai‵tia te auala telā e tau atu ki te ola, kae e mu‵tana fua a tino e maua ne latou.”—Mataio 7:12-14.

E isi ne tino kolā ka taumafai o takitaki atu keatea a soko mai te auala telā e tau atu ki te ola, tela la ne fakailoa atu a Iesu: “Ke fakaeteete koutou i pelofeta ‵loi kolā e ‵mai ki a koutou kae fakafoliga mai pelā me ne mamoe, kae i loto i a latou e fe‵kai eiloa e pelā me ne kuli vao.” (Mataio 7:15) E mafai o matea ‵lei atu a lakau ‵lei mo lakau ma‵sei i olotou fuataga, e pelā mo te mea ne fai mai ne Iesu. E penā foki loa mo tino. E mafai eiloa o iloa ne tatou a pelofeta ‵loi i olotou akoakoga mo faifaiga. Ao, ne fakamatala mai ne Iesu, me e se ko pati fua a te tino e fai ei a ia mo fai sena soko kae e aofia foki i ei ana faiga. E fai mai a nisi tino me i a Iesu ko te lotou Aliki, kae e a māfai e se fai ne latou te loto o te Atua? Ne fai mai a Iesu: “Kae ka fakailoa atu ne au ki a latou: ‘E se iloa lele ne au koutou! Olo kea‵tea mai i a au, koutou tino amio ma‵sei!’”—Mataio 7:23.

I te fakaotiga o tena lāuga, ne folafola atu a Iesu: “So se tino e lagona ne ia aku pati konei kae fai ne ia ka fai pelā me se tagata poto, telā e fakatu tena fale i luga i te papa. Kae ne ‵to ‵lotu te vaiua, ne oko mai te lofiaga, ne agi te matagi ki luga i te fale; kae ne seki siga eiloa, me ne tu tena fakavae i luga i te papa.” (Mataio 7:24, 25) Kaia ne tu ‵mautakitaki ei a te fale? Ona ko te tagata “ne keli ne ia ke ‵poko ki lalo kae fakatakato tena fakavae i luga i te papa.” (Luka 6:48) Tela la, e uke atu a mea ne aofia i ei i lō te fakalogologo fua ki pati a Iesu. E ‵tau o fakaoti ‵tou mafi ke ‘fai a mea konā.’

Kae e a te tino telā “e lagona ne ia aku pati konei kae e se fai ne ia”? Ne fakatusa ne ia ki “se tagata valea telā e fakatu tena fale i luga i te one.” (Mataio 7:26) Ne mafai eiloa o lepe ne te vaiua, lofiaga, mo te matagi a te vaegā fale penā.

Ne ōfo malosi te vaitino i te auala ne akoako atu ei a Iesu i tena lāuga tenei. Ne akoako atu a ia e pelā me se tino e isi sena pule kae e se pelā mo takitaki lotu. Kāti ne fai eiloa mo fai ana soko a te tokoukega o latou kolā ne fakalogo‵logo ki a ia.