Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 39

Ne Malaia Eiloa se Kautama Fuifai

Ne Malaia Eiloa se Kautama Fuifai

MATAIO 11:16-30 LUKA 7:31-35

  • NE TAKU FAKAMASEI NE IESU A NISI FA‵KAI

  • NE FESOASOANI KAE FAKAMALOSI ATU A IA

Ne tavae malosi ne Iesu a Ioane te Papatiso, kae ne pefea te kilokiloga a te tokoukega o tino ki a Ioane? “A te kautama tenei,” ne folafola mai a Iesu, “e pelā me ne tama‵liki fo‵liki e saga‵saga i te maketi kae ka‵laga atu ki olotou taugasoa, olotou muna: ‘Ne fakatagi ne matou te pu mō koutou, kae e se ‵saka koutou; ne ‵tagi mautuutu matou, kae e se ‵tagi fanoa‵noa koutou.’”—Mataio 11:16, 17.

Se a te uiga o pati konā a Iesu? Ne fakamaina mai ne ia te manatu: “E penā foki te vauga a Ioane, e se kai kae se inu, kae fai mai a tino, ‘E isi se temoni i a ia.’ I te vauga a te Tama a te tagata, ne kai kae inu, kae fai mai a tino, ‘Kiloke! A te tagata tenei se tino gafula kae inu uaina, se taugasoa o tino ao lafoga mo tino agasala.’” (Mataio 11:18, 19) I te suā feitu, ne ola a Ioane i se olaga faigofie e pelā me se Naseli, ke oko foki eiloa ki te ‵kalo keatea mai uaina, kae ne fai mai te kautama tenei me e isi se temoni i a ia. (Numela 6:2, 3; Luka 1:15) Kae i te suā feitu, ne ola eiloa a Iesu e pelā mo nisi tāgata. Ne kai kae inu a ia i se auala paleni ‵lei, kae ne ‵losi atu me i a ia se tino gafula. E foliga mai me ne seki mafai eiloa o fakafiafia atu ki tino.

Ne faka‵pau ne Iesu a te kautama ki “tama‵liki fo‵liki e saga‵saga i te maketi” kolā ne ita fitifiti ma ‵saka i te taimi ne faka‵tagi atu ne nisi tama‵liki olotou pese io me loto fanoanoa māfai ko ‵tagi a nisi tino. E fai mai a ia: “Kae e fakatalitonugina te poto o te tagata e auala i ana galuega amio‵tonu.” (Mataio 11:16, 19) E tonu, ko “galuega”—ko fakamaoniga kolā ne tuku mai ne Ioane mo Iesu—e fakatalitonu atu ei a te ‵se o ‵losiga kolā ne fai e uiga ki a lāua.

I te otiga ne fai atu a Iesu e uiga ki te kautama fuifai, ne taku fakamasei ne ia a Koasini, Petesaita, mo Kapanaumi, ko fa‵kai kolā ne fai ei ana galuega ‵mana. Ne fai mai a Iesu me moi ne fai ne ia a galuega ‵mana penā i fa‵kai o Foinikia, ko Tulo mo Saitonu, penei ko oti ne sala‵mō a tino i fa‵kai konā. Ne taku mai foki ne ia me i Kapanaumi, ko te koga ne afe sāle atu a ia ki ei i te ukega o taimi. Kae ko te tokoukega o tino i ei ne seki fia‵fia ki tena galuega. Ne fai atu a Iesu e uiga ki te fa‵kai tenā: “Ka māmā atu a te fakasalaga o te fenua o Sotoma i te Aso Fakamasino i lō koutou.”—Mataio 11:24.

Ne tavae ne Iesu tena Tamana, telā ne ‵funa ne ia a muna‵tonu faka-te-agaga tāua “mai i tino ‵poto mo tino ne a‵koga ma‵luga” kae fakaasi atu a mea konā ki tama‵liki fo‵liki. (Mataio 11:25) Ne fai atu ei ne Iesu te ‵kamiga gali tenei ki vaegā tino penā: “‵Mai ki a au, a koutou katoa kolā e fi‵ta kae ‵mafa otou amoga, me ka tuku atu ne au ki a koutou se malosi fou. Ke puke ne koutou taku amo kae fakaakoako mai ki a au, me i a au e agamalu kae loto maulalo, kae ka maua ne koutou i ei se malosi fou. Me e māmā taku amo, kae amogofie foki taku amoga.”—Mataio 11:28-30.

E tuku mai pefea ne Iesu a fakamalosiga? Ne fakapologa ne takitaki lotu a tino ki tuu, e pelā mo te ‵mafa o fakatonuga i te Sapati. Kae ne fakamalosi atu a Iesu ki a latou mai te akoako atu o te munatonu a te Atua, telā ne fakasaoloto ei latou mai te sē ‵lei o tuu konā. Ne fakaasi atu foki ne ia te auala e maua ei se fakatapūga mō latou kolā e taotaomaki ne pulega a tino fakapolitiki, penā foki loa mo tino kolā e loto vāi‵vai ona ko te agasala. Ao, ne fakaasi atu ne Iesu ki a latou a te auala e mafai ei o fakamagalo olotou agasala mo te auala ke maua se fesokotakiga filemu mo te Atua.

A latou katoa kolā e talia ne latou a te amoga māmā a Iesu, e mafai o tuku atu latou ki te Atua kae tavini atu ki te ‵tou Tamana faka-te-lagi atafai kae loto fakamagalo. A te faiga o te mea tenā e seai se amoga ‵mafa e aofia i ei, me e se ‵mafa lele eiloa a mea kolā e manako ki ei te Atua ke fai ne tatou.—1 Ioane 5:3.