Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 60

Te ‵Fuliga o Foliga​—Se Ata o Keliso i Tena ‵Malu

Te ‵Fuliga o Foliga​—Se Ata o Keliso i Tena ‵Malu

MATAIO 16:28–17:13 MALEKO 9:1-13 LUKA 9:27-36

  • SE FAKAASIGA O TE ‵FULIGA O FOLIGA

  • NE LAGONA NE APOSITOLO A TE LEO O TE ATUA

I te taimi koi akoako atu ei a Iesu ki tino i te kogā koga o Kaisaleia Filipi, telā kāti e 15 maila te ‵mao mai te Mauga o Helemoni, ne fai atu ne ia se faka‵pulaga fakapoi ki ana apositolo: “Au e fai tonu atu ki a koutou me e isi ne tino e ‵tu mai i konei ka se ‵mate seiloga ke lavea muamua ne latou te Tama a te tagata e vau i tena Malo.”—Mataio 16:28.

Kāti ne mafau‵fau te kau soko me se a te mea ne fakauiga ki ei a Iesu. Ko tai kātoa te vaiaso mai tua ifo, kae ne ave ne ia ana apositolo e tokotolu—ko Petelu, Iakopo mo Ioane—kae olo atu ki luga i te mauga maluga. Kāti ko leva te po, me ne fia ‵moe a tāgata konei e tokotolu. A koi ‵talo a Iesu kae ne ‵fuli ana foliga i olotou mua. Ne lavea ne apositolo konei e tokotolu me ko malapu‵lapu mai ana mata e pelā mo te la kae ko ‵kena pakipaki foki ana gatu e pelā me se mainaga, telā ko ‵kena malapulapu aka eiloa.

Oti aka loa ne ‵sae mai ei a foliga o tino e tokolua kolā ne fakailoa mai me ko “Mose mo Elia.” Ne kamata lāua o sau‵tala mo Iesu “e uiga ki te taimi ka tiaki ei ne ia te lalolagi, telā ko pili o fakataunu ne ia i Ielusalema.” (Luka 9:30, 31) E manino i ei me ne fakauiga ki te mate o Iesu mo tena toetuga mai tua ifo i ei, telā ne fatoa faipati mai a ia e uiga ki ei. (Mataio 16:21) Ne ‵kese eiloa te sau‵talaga tenei mo te mea ne fakamalosi atu ne Petelu, me i te mate fakalumalumagina o Iesu e se ‵tau o fakaseke ki ei.

Ko ala ‵lei eiloa nei a apositolo konei e tokotolu, telā ne onoono kae fakalogo‵logo atu latou mo te ōfo. Ne foliga tonu mai eiloa te fakaasiga tenā, kae ne kamata o kau atu a Petelu ki ei, ana muna: “Te Faiakoga, ko ‵lei aka eiloa ke ‵nofo matou i konei. Tela la ka faka‵tu ne matou a faleie e tolu, e tasi mō koe, e tasi mō Mose, kae e tasi mō Elia.” (Maleko 9:5) E mata, ne manako a Petelu ke faite a faleie ko te mea ke tumau eiloa te fakaasiga i se taimi tai leva?

A koi faipati atu a Petelu, kae ne oko mai ki luga i a latou se kaumana telā ne maina malosi, kae ne fai mai penei te leo mai te kaumana: “Tenei eiloa taku Tama, ko taku fagasele telā ko oti ne talia ne au. Faka‵logo ki a ia.” I te lagonaga ne latou a te leo o te Atua, ne pu‵nou ki lalo a ulu o apositolo mo te ma‵taku, kae ne fakamalosi atu a Iesu ki a latou: “‵Tu ki luga. Sa ma‵taku.” (Mataio 17:5-7) I te taimi ne ‵tu aka ei a apositolo e tokotolu ki luga, kae ne matea atu fua ne latou a Iesu kae e seai aka foki se isi tino. Ko gata atu te fakaasiga. I te taimi ko ao mai ei, kae ko olo ifo latou mai te mauga, ne fakatonu atu a Iesu: “Ke mo a ma fakailoa atu te fakaasiga tenei ki se isi tino ke oko eiloa ki te taimi e toe fakatu aka ei te Tama a te tagata mai te mate.”—Mataio 17:9

Ona ko te saemaiga o Elia i te fakaasiga tenā ne sae mai foki i ei se fesili. Ne fesili atu te kau apositolo: “Kaia e fai mai ei a failautusi me e ‵tau o vau muamua a Elia?” Ne tali atu Iesu: “A Elia ko leva ne vau kae ne seki lavea ne latou a ia.” (Mataio 17:10-12) Ne fakauiga eiloa a Iesu ki a Ioane te Papatiso, telā ne fakataunu ne ia se galuega e tai ‵pau mo te galuega a Elia. Ne fakatoka ne Elia te auala mō Elisaia, kae penā foki a Ioane ki a Keliso.

Ko oko eiloa i te fakamalosi loto o te fakaasiga tenā ki a Iesu, penā foki loa ki apositolo! Se tamā fakaasiga o te ‵malu o te Malo o Keliso. Tela la, ne lavea ne soko a “te Tama a te tagata e vau i tena Malo,” e pelā mo te mea ne folafola mai ne Iesu. (Mataio 16:28) A koi ‵nofo atu i luga i te mauga, ‘ne molimau olotou mata ki tena ‵malu.’ E tiga eiloa ne ma‵nako te kau Falesaio ki se fakailoga ke fakamaoni aka ei me i a Iesu ko te Tupu filifilia a te Atua, ne seki tuku atu eiloa ne ia se mea e tasi ki a latou. Kae ne taliagina a soko pele o Iesu ke matea atu ne latou a te ‵fuliga o foliga o Iesu, kolā e fakamautinoa mai i ei a valoaga e uiga ki te Malo. Tela la, ne mafai o tusi fakamuli mai a Petelu penei: “Tela la, ne fakapa‵tonu mai i ei ki a matou te muna fakavaloaga.”—2 Petelu 1:16-19.