Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 54

Iesu​—“Te Falaoa o te Ola”

Iesu​—“Te Falaoa o te Ola”

IOANE 6:25-48

  • A IESU KO “TE FALAOA TELĀ NE FANAIFO MAI TE LAGI”

I te feitu ki saegala o te Tai o Kalilaia, ne fagai fakavavega ne Iesu te fia afe o tino kae oti aka, ne tele keatea a ia i te taimi ne ma‵nako ei latou ke fai a ia mo fai te tupu. I te po eiloa tenā ne sasale atu ei a ia i luga i te Tai o Kalilaia telā ne sou malosi kae ne fakasao ne ia a Petelu, telā ne sasale atu foki i luga i te tai kae kamata o goto ifo i te taimi ne gasolo o vāivāi tena fakatuanaki. Ne fakafilemu foki ne Iesu a te matagi, kāti ke faka‵sao ne ia ana soko ke mo a ma kasa te lotou poti.

Ko toe foki atu nei a Iesu i te feitu ki te togala o te tai, i te kogā koga o Kapanaumi. Ne maua a ia ne tino kolā ne fagai fakavavega ne ia kae fesili atu: “Anafea ne oko mai ei koe ki konei?” Ne ‵liko atu a Iesu ki a latou, kae fai me ne ‵sala fua latou ki a ia ko te mea ke toe fagai latou ne ia. Ne fakamalosi atu a ia ki a latou ke sa “ga‵lue ke maua a meakai kolā e se tumau, kae ke maua a meakai kolā e tumau mō te ola se-gata-mai.” Telā ne fesili atu latou: “Se a te mea e ‵tau o fai ne matou ke fakataunu a galuega a te Atua?”—Ioane 6:25-28.

Kāti ne mafau‵fau latou ki galuega kolā ne fakatonu mai i te Tulafono, kae ne fakasino atu a Iesu ki te ‵toe galuega tāua: “Tenei te galuega a te Atua, ke fakatuanaki koutou ki te tino telā ne uga mai ne Ia.” Kae ne seki fakatuanaki eiloa a tino konā ki a Iesu, faitalia a mea katoa ne fai ne ia. Ne ma‵nako latou ke fai ne ia se mea fakaofoofogia ko te mea ke tali‵tonu latou ki a ia. Ne fesili atu latou: “Se a te galuega e fai ne koe? Ne ‵kai omotou tupuga ki te manai i te koga lavaki, e pelā eiloa mo muna ne tusi i te tusi, ‘Ne tuku atu ne ia a falaoa mai te lagi ke ‵kai ei latou.’”—Ioane 6:29-31; Salamo 78:24.

I tena tali atu ki te lotou fakamolemole mō se fakailoga, ne takitaki atu ne Iesu a tino ki te Mafuaga o mea‵kai fakavavega konā: “Au e fai ‵tonu atu ki a koutou, ne seki tuku atu ne Mose ki a koutou a te falaoa mai te lagi, kae e tuku atu ne toku Tamana ki a koutou a te falaoa tonu mai te lagi. Me i te falaoa a te Atua ko te tino telā ne fanaifo mai te lagi ke tuku atu te ola ki te lalolagi.” Ona ko te sē malamalama, ne fai atu ei latou ki a ia: “Te Aliki, tuku mai faeloa te falaoa tenā ki a matou.” (Ioane 6:32-34) Se a te “falaoa” telā ne fakauiga ki ei a Iesu?

Ne fakamatala mai a ia: “Au ko te falaoa o te ola. A te tino e vau ki a au ka se toe fiakai eiloa, kae ko so se tino e fakatuanaki mai ki a au ka se toe fiainu eiloa. Kae e fai atu au ki a koutou, ko oti ne lavea ne koutou au kae e se tali‵tonu eiloa koutou. . . . Au ne fanaifo mai te lagi o fai te loto o ia telā ne uga mai ne ia au kae e se ko toku loto eiloa. Tenei te loto o ia telā ne uga mai ne ia au, ko te mea ke se galo se tino i a latou katoa kolā ne tuku mai ne ia ki a au, kae e ‵tau o faka‵tu aka ne au a latou i te aso fakaoti. Tenei te loto o toku Tamana, ko tino katoa kolā e lavea ne latou te Tama kae fakatuanaki ki a ia ka maua eiloa ne latou te ola se-gata-mai, kae ka toe faka‵tu aka ne au a latou i te aso fakaoti.”—Ioane 6:35-40.

Ne fai ne te mea tenei ke kaitaua a tino, kae ne kamata o mui‵mui te kau Iutaia e uiga ki a ia. E mafai pefea o fai mai a ia me i a ia ko “te falaoa telā ne fanaifo mai te lagi”? (Ioane 6:41) Ne mafau‵fau aka latou me i a ia ko te tama tagata a mātua faka-te-lalolagi mai i Kalilaia, te fa‵kai o Nasaleta. Ne fesili atu a tino: “E se ko Iesu tenei te tama a Iosefa, telā e iloa ne tatou a tena tamana mo tena mātua?”—Ioane 6:42.

Ne tali atu Iesu: “Sa mui‵mui koutou. E seai se tino e mafai o vau ki a au seiloga ke talia a ia ne te Tamana, telā ne uga mai ne ia au; kae ka toe fakatu aka ne au a ia i te aso fakaoti. E tusi mai a te kau Pelofeta penei, ‘Ka akoako eiloa a latou katoa ne Ieova.’ So se tino ne fakalogo kae tauloto mai i te Tamana, e vau eiloa ki a au. E seai se tino kai lavea ne ia te Tamana kae na ko te tino telā ne vau mai te Atua; tenei te tino ne lavea ne ia te Tamana. Au e fai ‵tonu atu ki a koutou, so se tino e talitonu e maua ne ia te ola se-gata-mai.”—Ioane 6:43-47; Isaia 54:13.

I te taimi ne fai‵pati muamua ei lāua mo Nikotemo, ne taku atu ne Iesu a te ola se-gata-mai kae ‵soko ne ia mo te fakatuanaki ki te Tama a te tagata, ana muna: “Ke se fakaseai atu so se tino e fakatuanaki ki a ia [te Tama eiloa e tokotasi a te Atua] kae ke maua ne ia te ola se-gata-mai.” (Ioane 3:15, 16) Kae nei la, ko faipati  a ia ki se kau fakalogo‵logo tai tokouke atu, mai te fai atu me e isi sena tusaga i te tukuatuga ne ia ki a latou te ola se-gata-mai, telā e se mafai o tuku mai ne se manai io me se falaoa lauiloa i Kalilaia. Tela la, e mafai pefea o maua te ola se-gata-mai? Ne toe fai atu ne Iesu ana pati: “Au ko te falaoa o te ola.”—Ioane 6:48.

Ne tumau eiloa te sautalaga tenei e uiga ki te falaoa mai te lagi ke oko atu ki te ‵toe vaega tāua o te fakamatalaga tenā i te taimi ne akoako atu ei a Iesu i se sunako i Kapanaumi.