Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Iesu​—Te Auala, te Munatonu, te Ola

 MATAUPU E 58

Ne Fakauke ne Ia a Falaoa Kae Fakailoa Atu ke Fakaeteete i te Mea Faka‵fete

Ne Fakauke ne Ia a Falaoa Kae Fakailoa Atu ke Fakaeteete i te Mea Faka‵fete

MATAIO 15:32–16:12 MALEKO 8:1-21

  • KO FAGAI NE IESU A TĀGATA E TOKO 4,000

  • NE FAKAILOA ATU NE IA KE FAKAETEETE I TE MEA FAKA‵FETE A TE KAU FALESAIO

Ne ua‵lolo atu a te vaitino e tokouke ki a Iesu i te kogā koga o Tekapoli, i te feitu ki te saegala o te Tai o Kalilaia. Ne olo atu latou ki a ia kae ke faka‵lei aka, kae avatu ne latou a tapola ‵lasi o mea‵kai.

Kae oti aka loa, ne fai atu a Iesu ki ana soko: “Ko oko eiloa i toku alofa i te vaitino, me ko tolu nei aso ne ‵nofo i ei au mo latou kae e seai eiloa ne olotou mea ne kai. Kafai e uga ne au latou ki olotou fale mo te fia‵kai, e mafai o mata‵po latou i te auala kae ko nisi o latou ne ‵mai i koga ‵mao.” Ne fesili atu ana soko ki a ia: “Tefea te koga e maua ei ne se tino a falaoa e lava i te koga ‵mao tenei ke fagai ki ei a tino konei ke ma‵kona?”—Maleko 8:2-4.

Ne tali atu a Iesu: “E fia otou falaoa?” Ne fai atu a soko: “E fitu, mo nai tamā ika.” (Mataio 15:34) Ne fakatonu atu a Iesu ki tino ke ‵nofo ki lalo i te laukele. Ne puke ne ia a falaoa mo ika, ‵talo atu ki te Atua, kae tuku atu ki ana soko ke tufatufa atu ne latou. Se mea fakaofoofogia, me ne ‵kai kae ma‵kona ‵lei a tino katoa. Ne taetae mai a toegā meakai, kae ne ‵fonu i ei a tapola ‵lasi e fitu, faitalia me ko oti ne ‵kai ki ei a tāgata e toko 4,000, penā foki loa mo fāfine mo tama‵liki!

Ne uga atu ne Iesu te vaitino ke olo, kae ne olo atu latou mo ana soko i te poti ki Makatani i te feitu ki togala o te Tai o Kalilaia. I konā loa, ne taumafai te kau Falesaio fakatasi mo nisi tino mai i te potukau fakalotu ko Satukaio, o tofotofo a Iesu mai te fakamolemole atu ke fakaasi atu se fakailoga mai te lagi.

Ne iloa ‵lei ne Iesu olotou mafaufauga, telā ne tali atu ei a ia: “Kafai ko afiafi e fai aka koutou penei, ‘Ka ‵lei te aso, me e ‵kula malosi te lagi,’ kae i te taeao, ‘Ka ‵moko kae ‵to te vaiua i te aso nei, me e ‵kula malosi te lagi kae pouli te aso.’ E iloa ne koutou o fakamatala a foliga o te lagi, kae e se iloa ne koutou o fakamatala a fakailoga o taimi.” (Mataio 16:2, 3) Ne fai atu ei a Iesu ki te kau Falesaio mo Satukaio me ka seai se fakailoga e tuku atu kae na ko te fakailoga o Iona.

Ne ‵sopo a Iesu mo ana soko ki te poti kae ne olo atu ki Petesaita, telā e tu i te matafaga o te tai i te feitu ki matū saegala. A koi ma‵laga atu latou, ne iloa aka ne te kau soko me ne puli i a latou ke puke mai ne falaoa ke lava. E tasi fua te lotou falaoa. A koi mafaufau eiloa a Iesu ki tena fe‵pakiga fakamuli mo te kau Falesaio mo te kau Satukaio kolā ne ‵lago atu ki a Helota, ne fakamalosi atu a ia: “Ke matapula‵pula koutou; kae fakaeteete i te mea faka‵fete a Falesaio mo te mea faka‵fete a Helota.” Ne mafau‵fau te kau soko, me i a Iesu ko fakauiga ana pati ki falaoa kolā ne puli i a latou o puke mai. Ne lavea ne Iesu a te lotou mea ‵se, telā ne fai atu ei a ia: “Kaia e kinau ei koutou ona ko te mea e seai ne falaoa?”—Maleko 8:15-17.

Ne fatoa tuku fakavavega atu ne Iesu a falaoa mō te fia afe o tino. Tela la, ne ‵tau o iloa ne soko me e se manavase a ia ki te sē lava o falaoa ‵tonu. Ne fesili atu a ia: “E a, e se masaua ne koutou i te tofitofiga ne au o falaoa e lima mō te toko 5,000  tāgata, e fia tapola ne faka‵fonu ne koutou ki toegā meakai?” Ne tali atu latou: “E sefululua.” Ne toe fai atu a ia: “I te taimi ne tofitofi ei ne au a falaoa e fitu mō tagata e toko 4,000, e fia tapola ne faka‵fonu ne koutou ki toegā meakai?” Ne fai atu latou ki a ia: “E fitu.”—Maleko 8:18-20.

Ne fesili atu a Iesu: “Kaia ne seki maina ei koutou me i a au ne seki faipati atu ki a koutou e uiga ki falaoa?” Ne toe fai atu a ia: “Ke fakaeteete koutou i te mea faka‵fete a Falesaio mo Satukaio.”—Mataio 16:11.

Ne fatoa maina eiloa a te kau soko. A te mea faka‵fete ne fakaaoga sāle ke fai ki ei a isi kae faka‵fete foki ei a falaoa. Ne fakaaoga ne Iesu i konei a te mea faka‵fete e pelā me se fakailoga o mea ma‵sei. Ne fakailoa atu ne ia ki te kau soko ke fakaeteete i “akoakoga a Falesaio mo Satukaio,” me e ma‵sei a ikuga e maua mai i ei.—Mataio 16:12.